ಪ್ರೇಯಸಿಗೆ ಉಡುಗೊರೆ ನೀಡಲು ಕೆಮರಾ ಕದಿಯುತ್ತಿದ್ದ

Team Udayavani, Dec 9, 2018, 6:20 AM IST

ಪ್ರೇಯಸಿಗೆ ದುಬಾರಿ ಉಡುಗೊರೆಗಳನ್ನು ನೀಡುವ ಸಲುವಾಗಿ ಮನೆಯಲ್ಲಿ ಸುಳ್ಳು ಹೇಳಿ ಹಣ ಪಡೆಯುವ ಯುವಕರು ಸಾಕಷ್ಟು ಸಂಖ್ಯೆಯಲ್ಲಿದ್ದಾರೆ. ಅದು ಸಾಲದು ಎಂದು ಕಳ್ಳತನ, ವಂಚನೆಗಿಳಿಯುವ ಯುವಕರ ಬಗ್ಗೆಯೂ ನಾವು ಆಗಾಗ ಓದುತ್ತಿರುತ್ತೇವೆ. ಅದರಂತೆಯೇ, ಅಪ್ರಾಪ್ತ ವಯಸ್ಸಿನ ಗರ್ಲ್ಫ್ರೆಂಡ್‌ಗೆ ದುಬಾರಿ ಉಡುಗೊರೆ ಕೊಡುವ ಸಲುವಾಗಿ ಕೆಮರಾಗಳನ್ನು ಕದಿಯುತ್ತಿದ್ದ 22 ವರ್ಷ ವಯಸ್ಸಿನ ಯುವಕ ಆಕಾಶ್‌ ಭಿಸೆಯನ್ನು ಪೊಲೀಸರು ಬಂಧಿಸಿರುವ ಘಟನೆ ಪುಣೆಯಲ್ಲಿ ನಡೆದಿದೆ. ಡಿಪ್ಲೊಮಾ ಓದಿರುವ ಆಕಾಶ್‌, ಛಾಯಾಚಿತ್ರಗ್ರಾಹಕನಾಗಿ ಸಂಪಾದನೆ ಮಾಡುತ್ತಿದ್ದಾನೆ. ಈತ ಪ್ರತ್ಯೇಕ ಇಬ್ಬರು ಬಾಡಿಗೆದಾರರಿಂದ 5 ಕೆಮರಾಗಳನ್ನು ಕದ್ದಿದ್ದ. ಪರಿಶೀಲನೆ ನಡೆಸಿದಾಗ 5 ಕೆಮರಾಗಳು, 8 ಲೆನ್ಸ್‌ಗಳು ದೊರೆತವು.

ಇವುಗಳ ಅಂದಾಜು ಬೆಲೆ 26 ಲಕ್ಷ ರೂ.ಗಳು. ಈತ ತನ್ನ ಗೆಳತಿಗೆ ಬೈಕು, ಚಿನ್ನದ ಸರ, ಉಂಗುರಗಳು ಮುಂತಾದ ಬೆಲೆಬಾಳುವ ವಸ್ತುಗಳನ್ನು ನೀಡಿದ್ದಾನೆ. ಅಲ್ಲದೇ 15,000 ರೂ. ತೆರುವಂತಹ ದುಬಾರಿ ಹೊಟೇಲ್‌ಗ‌ಳಿಗೆ ಊಟಕ್ಕೆ ಕರೆದೊಯ್ದಿದ್ದಾನೆ. ಇಷ್ಟಾದರೂ ಬಾಲಕಿಯ ಹೆತ್ತವರು ಬಾಲಕಿಯನ್ನು ಉಡುಗೊರೆಗಳ ಕುರಿತು ಪ್ರಶ್ನೆ ಮಾಡಿಲ್ಲ ಎಂಬುದೇ ಸೋಜಿಗ.