ಲಕ್ನೋ-ಆಗ್ರಾ ಎಕ್ಸ್ಪ್ರೆಸ್ವೇ ಅಪಘಾತ: 6 ಸಾವು, 18 ಮಂದಿಗೆ ಗಾಯ
Team Udayavani, Feb 21, 2019, 10:02 AM IST
ಉನ್ನಾವೋ, ಉತ್ತರ ಪ್ರದೇಶ : ಲಕ್ನೋ – ಆಗ್ರಾ ಎಕ್ಸ್ಪ್ರೆಸ್ ವೇ ಯಲ್ಲಿನ ಮಿರ್ಜಾಪುರ ಅಜಿಗಾವನ್ ಗ್ರಾಮದಲ್ಲಿಂದು ಮೂರು ವಾಹನಗಳು ಒಳಗೊಂಡ ಭೀಕರ ಅಪಘಾತದಲ್ಲಿ ಆರು ಮಂದಿ ಮಡಿದು ಇತರ 18 ಮಂದಿ ಗಾಯಗೊಂಡ ಘಟನೆ ನಡೆದಿದೆ.
ನಸುಕಿನ 2 ಗಂಟೆಯ ವೇಳೆಗೆ ಪೈಪುಗಳನ್ನು ಸಾಗಿಸುತ್ತಿದ್ದ ಟ್ರಕ್ ಒಂದು ನಿಯಂತ್ರಣ ಕಳೆದುಕೊಂಡು ಡಿವೈಡರ್ ಗೆ ಢಿಕ್ಕಿ ಹೊಡೆಯಿತು. ಪರಿಣಾಮವಾಗಿ ರಸ್ತೆ ತುಂಬ ಪೈಪುಗಳು ಹರಿಡಿಕೊಂಡವು. ಇದೇ ವೇಳೆ ಈ ಮಾರ್ಗವಾಗಿ ಬಂದ ಬಸ್ಸೊಂದು ಪೈಪುಗಳ ಮೇಲೆ ಸಾಗಿ ಮಗುಚಿಕೊಂಡಾಗ ಅದು ತನ್ನ ಮುಂದಿದ್ದ ಕಾರಿಗೆ ಢಿಕ್ಕಿ ಹೊಡೆಯಿತು.
ಸ್ಥಳದಲ್ಲೇ ಮೃತಪಟ್ಟಿರುವ ಆರು ಮಂದಿಯಲ್ಲಿ ಮೂವರು ಮಹಿಳೆಯರು ಮತ್ತು ಇಬ್ಬರು ಮಕ್ಕಳು ಸೇರಿದ್ದಾರೆ; 18 ಗಾಯಾಳುಗಳನ್ನು ಆಸ್ಪತ್ರೆಗೆ ಸೇರಿಸಲಾಗಿದೆ ಎಂದು ಸರ್ಕಲ್ ಆಫೀಸರ್ ಅಂಬರೀಷ್ ಭಡೋರಿಯಾ ತಿಳಿಸಿದ್ದಾರೆ.
ಬಸ್ಸು ದಿಲ್ಲಿಯಿಂದ ಬರುತ್ತಿದ್ದು ಬಿಹಾರದ ಮುಜಫರಪುರಕ್ಕೆ ಹೋಗುತ್ತಿತ್ತು ಎಂದವರು ತಿಳಿಸಿದ್ದಾರೆ. ಮೃತರ ಗುರುತು ಪತ್ತೆ ಹಚ್ಚುವ ಕೆಲಸ ಈಗ ನಡೆಯುತ್ತಿದೆ ಎಂದವರು ಹೇಳಿದರು.