CONNECT WITH US  

ಕಾರ್ಗಿಲ್‌ ಗೆದ್ದ ವಾಜಪೇಯಿ

ಇದು ಅಟಲ್‌ ಬಿಹಾರಿ ವಾಜಪೇಯಿ ಅವರ ಕಾಲದಲ್ಲಿನ ಅಭೂತ ಪೂರ್ವ ಗೆಲುವು. 1998ರಲ್ಲಷ್ಟೇ ಭಾರತ ಪರಮಾಣು ಅಸ್ತ್ರ ಪ್ರಯೋಗ ಮಾಡಿ ಯಶಸ್ವಿಯಾಗಿತ್ತು. ಅತ್ತ ಪಾಕಿಸ್ತಾನ ಕೂಡ ಅಣ್ವಸ್ತ್ರ ಪರೀಕ್ಷೆ ನಡೆಸಿತ್ತು. ಆದರೆ, 1999ರ ಆರಂಭದಲ್ಲೇ ಪಾಕಿಸ್ತಾನ, ಅಂತಾರಾಷ್ಟ್ರೀಯ ಗಡಿ ನಿಯಂತ್ರಣ ರೇಖೆ ಮೀರಿ ಭಾರತದೊಳಗೆ ನುಸುಳುವ ಕೆಲಸ ಮಾಡುತ್ತಲೇ ಇತ್ತು. ಅಲ್ಲದೆ ಆ ದೇಶದ ನಾಯಕರ ಮಾತುಗಳೂ ಪರೋಕ್ಷವಾಗಿ ಯುದ್ಧಕ್ಕೆ ತಯಾರಾಗಿರುವ ಮುನ್ಸೂಚನೆ ನೀಡುತ್ತಲೇ ಇದ್ದವು. ಆದರೆ ಈ ಸಂದರ್ಭದಲ್ಲಿ ಸುಮ್ಮನಿದ್ದ ಭಾರತ ಯಾವುದೇ ಕಾರಣಕ್ಕೂ ತಾನೇ ತಾನಾಗಿ ಇನ್ನೊಂದು ದೇಶದ ಮೇಲೆ ಯುದ್ಧ ಸಾರುವುದಿಲ್ಲ ಎಂಬ ನೀತಿಗೆ ಅನ್ವಯವಾಗಿ ಸುಮ್ಮನಿತ್ತು. 

ಆದರೆ ನಿಜವಾಗಿ ಈ ಘರ್ಷಣೆ ಶುರುವಾಗುವುದು ಮೇನಲ್ಲಿ. ಮೇ 3 ರಂದು ಪಾಕಿಸ್ತಾನದ ಸೈನಿಕರು ಗಡಿಯೊಳಗೆ ನುಗ್ಗಿದ್ದು ಖಚಿತವಾಗಿತ್ತು. ಅಲ್ಲದೆ ಮೇ 5 ರಂದು ಪಾಕಿಸ್ತಾನ ತನ್ನ ರಕ್ಕಸತನ ಪ್ರದರ್ಶನ ಮಾಡಿತ್ತು. ಇದರಿಂದಾಗಿ ಭಾರತದ ಐವರು ಯೋಧರು ಹುತಾತ್ಮರಾಗಿದ್ದರು. ಇವರನ್ನು ಕಿರುಕುಳ ನೀಡಿ ಹತ್ಯೆ ಮಾಡಲಾಗಿತ್ತು. ಇದಾದ ನಂತರ ಅಟಲ್‌ ನೇತೃತ್ವದ ಕೇಂದ್ರ ಸರ್ಕಾರ ಆಪರೇಶನ್‌ ವಿಜಯ್‌ ಘೋಷಣೆ ಮಾಡಿಯೇ ಬಿಟ್ಟಿತು. 

ಮೇ ಮಧ್ಯಭಾಗದಲ್ಲಿ ನಿಜವಾದ ಕಾರ್ಗಿಲ್‌ ಯುದ್ಧ ಆರಂಭ ವಾಯಿತು. ಐಎಎಫ್ ಯುದ್ಧವಿಮಾನಗಳು ಪಾಕಿಸ್ತಾನದ ಭಾಗದ ಮೇಲೆ ದಾಳಿ ಆರಂಭಿಸಿದವು. ಆದರೆ ಭಾರತದ ಎರಡು ಯುದ್ಧ ವಿಮಾನಗಳು ಪತನಗೊಂಡವು. ಇದಾದ ಬಲಿಕ ಜೂ 6 ರಂದು ಭಾರತ ತನ್ನ ದಾಳಿಯನ್ನು ತೀವ್ರಗೊಳಿಸಿತು. ಜಮ್ಮು ಕಾಶ್ಮೀರದ ಬಟಾಲಿಕ್‌ನಲ್ಲಿ ಎರಡು ಪ್ರದೇಶಗಳನ್ನು ಭಾರತ ಸೇನೆ ವಾಪಸ್‌ ಪಡೆಯಿತು. ಇದರ ನಡುವೆಯೇ ಭಾರತ, ಪಾಕಿಸ್ತಾನ ಸೇನಾ ಮುಖ್ಯಸ್ಥ ಜನರಲ್‌ ಪರ್ವೇಜ್‌ ಮುಷರಫ್ ಮತ್ತು ಚೀನಾ ನಡುವಿನ ಸಂಭಾಷಣೆ ಭಾಗವನ್ನು ಬೇಧಿಸಿತು. ಈ ಮೂಲಕವೇ ಇಡೀ ಕಾರ್ಯಾಚರಣೆಯಲ್ಲಿ ಪಾಕಿಸ್ತಾನ ಸೇನೆಯ ನೇರ ಕೈವಾಡವಿರುವುದನ್ನು ಇಡೀ ಜಗತ್ತಿಗೇ ಸಾರಿ ಹೇಳಿತು. ಇದರ ನಡುವೆಯೇ ದ್ರಾಸ್‌ ಭಾಗವನ್ನು ಭಾರತೀಯ ಸೇನೆ ಮರು ಪಶವಡಿಸಿಕೊಂಡಿತು. 

ಇತ್ತ ಈ ಎರಡು ದೇಶಗಳು ಕಾರ್ಗಿಲ್‌ ಸಮರದಲ್ಲಿ ಭಾಗಿಯಾಗಿದ್ದರೆ ಅತ್ತ ಇಡೀ ಜಗತ್ತೇ ಭಯಭೀತಗೊಂಡಿತ್ತು. ಎರಡೂ ಅಣು ಶಕ್ತಿ ಹೊಂದಿದ್ದ ದೇಶಗಳಾಗಿದ್ದು ಎಲ್ಲಿ ಪ್ರಯೋಗ ಮಾಡಿಬಿಡುತ್ತವೆಯೋ ಎಂಬ ಆತಂಕದಲ್ಲಿದ್ದವು. ಈ ಮಧ್ಯೆ ಆಗಿನ ಅಮೆರಿಕ ಅಧ್ಯಕ್ಷ ಬಿಲ್‌ ಕ್ಲಿಂಟನ್‌ ಅವರು ಪಾಕಿಸ್ತಾನದ ಪ್ರಧಾನಿ ನವಾಜ್‌ ಷರೀಫ್ ಅವರಿಗೆ ಕರೆ ಮಾಡಿ ಸೇನೆ ವಾಪಸ್‌ ಪಡೆಯುವಂತೆ ಸೂಚಿಸಿದರು. 

ಯುದ್ಧ ಮುಂದುವರಿದೇ ಇತ್ತು. ಜೂ 29 ರಂದು ಭಾರತದ ಯೋಧರು ಟೈಗರ್‌ ಹಿಲ್‌ನ ಎರಡು ಪೋಸ್ಟ್‌ಗಳನ್ನು ಮರುಪಶಪಡಿಸಿ ಕೊಂಡರು. ಜು.2 ರಿಂದ ಜು.6 ರವರೆಗೆ ಯೋಧರು ಪಾಕಿಸ್ತಾನದ ಮೇಲೆ ಅವಿರತ ದಾಳಿ ನಡೆಸಿದರು. ಇದರಿಂದ ಪೂರ್ಣವಾಗಿ ಬಸವಳಿದ ಪಾಕಿಸ್ತಾನ, ತನ್ನ ಸೇನೆಯನ್ನು ವಾಪಸ್‌ ಕರೆಸಿಕೊಂಡಿತು. ಜು. 11ಕ್ಕೆ ಪಾಕ್‌ ಸೇನೆ ವಾಪಸ್‌ ಹೋದ ಮೇಲೆ ಬಾಟಾಲಿಕ್‌ನಲ್ಲಿನ ಎಲ್ಲ ಪೋಸ್ಟ್‌ಗಳನ್ನು ವಶಕ್ಕೆ ತೆಗೆದುಕೊಳ್ಳಲಾಯಿತು. ಜು. 14 ರಂದು ಅಟಲ್‌ ಅವರು ಕಾರ್ಗಿಲ್‌ ಯುದ್ಧದಲ್ಲಿನ ವಿಜಯವನ್ನು ಘೋಷಿಸಿದರು. ಕಾರ್ಗಿಲ್‌ ಸಂಘರ್ಷ ಅಧಿಕೃತವಾಗಿ ಮುಗಿಯಿತು.

Trending videos

Back to Top