CONNECT WITH US  

ರನ್‌ ಗಳಿಕೆಗೆ ಮುಂದಾಗದೆ ಸೋತ ಇಂಗ್ಲೆಂಡ್‌: ಕೊಹ್ಲಿ

ಇಂಗ್ಲೆಂಡ್‌ ಆರಂಭಿಕರಾದ ಅಲಸ್ಟೇರ್‌ ಕುಕ್‌ - ಹಸೀಬ್‌ ಹಮೀದ್‌ 50 ಓವರ್‌ಗಳಷ್ಟು ಸುದೀರ್ಘ‌ ಜತೆಯಾಟ ನಡೆಸಿಯೂ ರನ್‌ ಗಳಿಕೆಗೆ ಮುಂದಾಗದಿದ್ದುದು ಇಂಗ್ಲೆಂಡಿನ ಹಾದಿಯನ್ನು ಕಠಿನಗೊಳಿಸಿತು, ಆದರೆ ಭಾರತಕ್ಕೆ ಲಾಭವಾಗಿ ಪರಿಣಮಿಸಿತು ಎಂಬುದಾಗಿ ಟೀಮ್‌ ಇಂಡಿಯಾ ನಾಯಕ ವಿರಾಟ್‌ ಕೊಹ್ಲಿ ತಂಡದ ಗೆಲುವನ್ನು ವಿಶ್ಲೇಷಿಸಿದ್ದಾರೆ. ಜತೆಗೆ ಸ್ಪಿನ್ನರ್‌ಗಳ ಸಾಹಸವನ್ನೂ ಪ್ರಶಂಸಿಸಿದ್ದಾರೆ.

'ಇಂಗ್ಲೆಂಡ್‌ ಆರಂಭಿಕರು 50.2 ಓವರ್‌ಗಳ ಜತೆಯಾಟ ನಿಭಾಯಿಸಿದರು. ಆದರೆ ಈ ವೇಳೆ ಅವರು ರನ್‌ ಗಳಿಕೆಗೆ ಮುಂದಾಗಲಿಲ್ಲ. ಓವರಿಗೆ 1.5ರಂತೆ 75 ರನ್‌ ಮಾತ್ರ ಒಟ್ಟುಗೂಡಿತು. ಹೀಗಾಗಿ ಒಂದೆರಡು ವಿಕೆಟ್‌ ಉರುಳಿದರೆ ಗೆಲುವು ನಮ್ಮದಾಗುತ್ತದೆಂಬ ವಿಶ್ವಾಸ ಮೂಡಿತು. ರನ್‌ ಗಳಿಕೆಯ ಇರಾದೆ ಇಲ್ಲದೇ 4ನೇ ಇನ್ನಿಂಗ್ಸಿನ ನಾಲ್ಕೂವರೆಯಷ್ಟು ಅವಧಿಗಳ ಆಟವನ್ನು ರಕ್ಷಣಾತ್ಮಕವಾಗಿ ನಿಭಾಯಿಸುವುದು ಸುಲಭವಲ್ಲ...' ಎಂದು ಕೊಹ್ಲಿ ಅಭಿಪ್ರಾಯಪಟ್ಟರು.

ವಿರಾಟ್‌ ಕೊಹ್ಲಿ ಮಾತಿಗೆ ಸ್ವತಃ ಅವರ ಬ್ಯಾಟಿಂಗೇ ಸಾಕ್ಷಿಯಾಗಿತ್ತು. ಭಾರತದ ಬಹುತೇಕ ಬ್ಯಾಟ್ಸ್‌ಮನ್‌ಗಳು ರಕ್ಷಣಾತ್ಮಕ ಆಟಕ್ಕೆ ಮುಂದಾದಾಗ ಕೊಹ್ಲಿ ಮಾತ್ರ ನುಗ್ಗಿ ಬೀಸಲು ಮುಂದಾಗಿದ್ದರು. ಎರಡೂ ಇನ್ನಿಂಗ್ಸ್‌ಗಳಲ್ಲಿ ಅವರ ಈ ಆಕ್ರಮಣಕಾರಿ ಆಟವನ್ನು ಕಾಣಬಹುದಿತ್ತು. 'ನೀವು ರನ್‌ ಗಳಿಕೆಯ ಇರಾದೆಯನ್ನೇ ಹೊಂದಿಲ್ಲದೆ ಚೆಂಡನ್ನು ನಿಯಂತ್ರಿಸುತ್ತೇವೆ ಎಂದು ಹೊರಟರೆ ಇದು ಸಾಧ್ಯವಾಗದು. ನೀವು ರನ್ನಿಗಾಗಿ ಹಾತೊರೆದರೆ ಆಗ ಚೆಂಡನ್ನು ಅತ್ಯುತ್ತಮ ರೀತಿಯಲ್ಲಿ ನಿಭಾಯಿಸಬಲ್ಲಿರಿ. ಟೆಸ್ಟ್‌ ಕ್ರಿಕೆಟ್‌ ಮಟ್ಟಿಗೆ ಇದು ಅತ್ಯಗತ್ಯ...' ಎಂದರು.

'ಇಂಗ್ಲೆಂಡನ್ನು ನಿಯಂತ್ರಿಸುವಲ್ಲಿ ನಮ್ಮ ಬೌಲರ್‌ಗಳ ಪರಾಕ್ರಮವನ್ನೂ ಮರೆಯುವಂತಿಲ್ಲ. ಅಶ್ವಿ‌ನ್‌ ಎಂದಿನಂತೆ ಘಾತಕವಾಗಿ ಪರಿಣಮಿಸಿದರು. ಮೊದಲ ಟೆಸ್ಟ್‌ ಆಡುತ್ತಿರುವ ಜಯಂತ್‌ ಯಾದವ್‌ ಪ್ರದರ್ಶನ ಅಮೋಘ ಮಟ್ಟದಲ್ಲಿತ್ತು...' ಎಂಬುದಾಗಿ ಕೊಹ್ಲಿ ಹೇಳಿದರು.

Trending videos

Back to Top