ಉಸ್ಮಾನ್‌ ಖ್ವಾಜಾ ಸಾಹಸ: ಡ್ರಾ ಸಾಧಿಸಿದ ಆಸ್ಟ್ರೇಲಿಯ

Team Udayavani, Oct 12, 2018, 11:36 AM IST

ದುಬಾೖ: ಆರಂಭಕಾರ ಉಸ್ಮಾನ್‌ ಖ್ವಾಜಾ ಅವರ ಅಮೋಘ 141 ರನ್‌ ಸಾಹಸದಿಂದ ಪಾಕಿಸ್ಥಾನ ವಿರುದ್ಧದ ದುಬಾೖ ಟೆಸ್ಟ್‌ ಪಂದ್ಯವನ್ನು ಡ್ರಾ ಮಾಡಿಕೊಳ್ಳುವಲ್ಲಿ ಆಸ್ಟ್ರೇಲಿಯ ಯಶಸ್ವಿಯಾಗಿದೆ.

462 ರನ್ನುಗಳ ಗುರಿ ಪಡೆದಿದ್ದ ಆಸ್ಟ್ರೇಲಿಯ, 4ನೇ ದಿನದಾಟದ ಅಂತ್ಯಕ್ಕೆ 3 ವಿಕೆಟಿಗೆ 136 ರನ್‌ ಮಾಡಿ ಸೋಲಿನ ಭೀತಿಯಲ್ಲಿತ್ತು. ಆದರೆ ಅಂತಿಮ ದಿನವಾದ ಗುರುವಾರ ಖ್ವಾಜಾ ಕ್ರೀಸಿಗೆ ಅಂಟಿಕೊಂಡು ನಿಂತು ಪಾಕ್‌ ಬೌಲರ್‌ಗಳನ್ನು ಕಾಡಿದರು. 

ಟ್ರ್ಯಾವಿಸ್‌ ಹೆಡ್‌ (72) ಮತ್ತು ನಾಯಕ ಟಿಮ್‌ ಪೇನ್‌ (ಔಟಾಗದೆ 61) ಕೂಡ ಪಾಕ್‌ ದಾಳಿಗೆ ಸವಾಲಾದರು. ಟೆಸ್ಟ್‌ಗೆ ಡ್ರಾ ಮುದ್ರೆ ಬೀಳುವಾಗ ಆಸೀಸ್‌ 8 ವಿಕೆಟಿಗೆ 362 ರನ್‌ ಮಾಡಿತ್ತು.

524 ನಿಮಿಷಗಳ ಕಾಲ ಕ್ರೀಸಿನಲ್ಲಿ ಉಳಿದ ಖ್ವಾಜಾ 302 ಎಸೆತಗಳಿಂದ ಈ ಮಹೋನ್ನತ ಇನ್ನಿಂಗ್ಸ್‌ ಕಟ್ಟಿದರು. ಮೊದಲ ಇನ್ನಿಂಗ್ಸ್‌ನಲ್ಲೂ ತಂಡದ ರಕ್ಷಣೆಗೆ ನಿಂತಿದ್ದ ಖ್ವಾಜಾ 85 ರನ್‌ ಹೊಡೆದಿದ್ದರು.