ಪಂಥ್, ರಹಾನೆ ಶತಕ ವಂಚಿತ: ಕುಸಿದ ಭಾರತ
Team Udayavani, Oct 14, 2018, 11:49 AM IST
ಹೈದರಾಬಾದ್ : ಪ್ರವಾಸಿ ವೆಸ್ಟ್ ಇಂಡೀಸ್ ವಿರುದ್ಧ ನಡೆಯುತ್ತಿರುವ ದ್ವಿತೀಯ ಟೆಸ್ಟ್ ಪಂದ್ಯದಲ್ಲಿ ರವಿವಾರ ಭಾರತದ ಬ್ಯಾಟಿಂಗ್ ಕುಸಿತ ಕಂಡಿದೆ. ವಿಂಡೀಸ್ ಬೌಲರ್ ಗಳ ಕರಾರುವಕ್ಕಾದ ದಾಳಿಗೆ ಟೀಮ್ ಇಂಡಿಯಾ 367 ರನ್ ಗಳಿಗೆ ಎಲ್ಲ ವಿಕೆಟ್ ಗಳನ್ನು ಕಳೆದುಕೊಂಡಿದೆ.
ಹೈದೆರಾಬಾದ್ ಪಂದ್ಯದ ಎರಡನೇ ದಿನದ ಅಂತ್ಯಕ್ಕೆ ಕೇವಲ ನಾಲ್ಕು ವಿಕೆಟ್ ಕಳೆದುಕೊಂಡು 308 ರನ್ ಗಳಿಸಿದ್ದ ಭಾರತ ರವಿವಾರ ನಿನ್ನೆಯ ಮೊತ್ತಕ್ಕೆ 59 ರನ್ ಸೇರಿಸಲಷ್ಟೇ ಶಕ್ತವಾಯಿತು.
ಶತಕದ ಭರವಸೆ ಮೂಡಿಸಿದ್ದ ಉಪನಾಯಕ ಅಜಿಂಕ್ಯ ರಹಾನೆ ಮತ್ತು ಯುವ ಆಟಗಾರ ರಿಷಬ್ ಪಂಥ್ ಇಂದು ಕ್ರಮವಾಗಿ 80 ಮತ್ತು 95 ರನ್ ಗಳಿಸಿ ಔಟ್ ಆಗುವುದರ ಮೂಲಕ ಶತಕದಿಂದ ವಂಚಿತರಾದರು.
ರಹಾನೆ – ಪಂಥ್ ಜೋಡಿ ಬೇರ್ಪಟ್ಟ ನಂತರ ಭಾರತ ಬಾಲಂಗೋಚಿಗಳು ವಿಂಡೀಸ್ ಬೌಲಿಂಗ್ ಗೆ ಉತ್ತರಿಸಲು ವಿಫಲರಾದರು. ಕಳೆದ ಪಂದ್ಯದ ಶತಕವೀರ ಜಡೇಜಾ ಇಂದು ರನ್ ಗಳಿಸದೆ ಪೆವಿಲಿಯನ್ ಸೇರಿದರೆ, ಉಮೇಶ್ ಮತ್ತು ಕುಲದೀಪ್ ಯಾದವ್ ಅವರ ಹಿಂದೆ ಔಟ್ ಆದರು. ಒಂದು ಕಡೆ ವಿಕೆಟ್ ಉರುಳುತ್ತಿದ್ದಂತೆ ಇನ್ನೊಂದೆಡೆ ಅಶ್ವಿನ್ ದಿಟ್ಟ ಬ್ಯಾಟಿಂಗ್ ನಡೆಸಿದರು. ಕೊನೆಯ ವಿಕೆಟ್ ಗೆ ಶಾರ್ದುಲ್ ಠಾಕೂರ್ ಜೊತೆ ಬ್ಯಾಟಿಂಗ್ ನಡೆಸಿದ ಅಶ್ವಿನ್ 35 ರನ್ ಗಳಿಸಿ ಗ್ಯಾಬ್ರಿಯೆಲ್ ಗೆ ವಿಕೆಟ್ ಒಪ್ಪಿಸಿದರು.
ಜೇಸನ್ ಹೋಲ್ಡರ್ 5 ವಿಕೆಟ್, ಶಾನಾನ್ ಗ್ಯಾಬ್ರಿಯೆಲ್ 3 ವಿಕೆಟ್ ಮತ್ತು ವ್ಯಾರಿಕಾನ್ ಎರಡು ವಿಕೆಟ್ ಪಡೆದರು. ಒಟ್ಟಾರೆ ಭಾರತ ಈ ಪಂದ್ಯದಲ್ಲಿ 56 ರನ್ ಗಳ ಲೀಡ್ ಹೊಂದಿದೆ.