ವಿಶ್ವ ಕುಸ್ತಿ ಚಾಂಪಿಯನ್‌ ಶಿಪ್‌: ಭಜರಂಗ್‌: ಚಿನ್ನಕ್ಕೆ ಒಂದೇ ಹೆಜ್ಜೆ

Team Udayavani, Oct 23, 2018, 6:00 AM IST

ಬುಡಾಪೆಸ್ಟ್‌: ಹಂಗೇರಿಯಲ್ಲಿ ನಡೆಯುತ್ತಿರುವ “ವಿಶ್ವ ಕುಸ್ತಿ ಚಾಂಪಿಯನ್‌ಶಿಪ್‌’ನಲ್ಲಿ ಭಾರತದ ಕುಸ್ತಿಪಟು ಭಜರಂಗ್‌ ಪೂನಿಯ ಫೈನಲ್‌ ಪ್ರವೇಶಿಸಿದ್ದು, ಈ ಕೂಟದಲ್ಲಿ ಚಿನ್ನದ ಪದಕ ಗೆದ್ದ 2ನೇ ಭಾರತೀಯ ಕುಸ್ತಿಪಟು ಎನಿಸಿಕೊಳ್ಳಲು ಕೇವಲ ಒಂದು ಹೆಜ್ಜೆ ಹಿಂದಿದ್ದಾರೆ. ಸೋಮವಾರ ತಡ ರಾತ್ರಿ ನಡೆಯುವ ಫೈನಲ್‌ನಲ್ಲಿ ಭಜರಂಗ್‌ ಜಪಾನಿನ ತಾಕುಟೊ ಒಟೊಗುರೊ ಅವರನ್ನು ಎದುರಿಸಲಿದ್ದಾರೆ.

ರವಿವಾರ ರಾತ್ರಿ ನಡೆದ ಪುರುಷರ ಫ್ರಿಸ್ಟೈಲ್‌ ಸ್ಪರ್ಧೆಯ 65 ಕೆಜಿ ವಿಭಾಗದ ಸೆಮಿ ಪೈನಲ್‌ ಪಂದ್ಯದಲ್ಲಿ ಭಜರಂಗ್‌ ಕ್ಯೂಬಾದ ಅಲೆ ಜಾಂಡ್ರೊ ಎನ್ರಿಕ್‌ ವಲೆಸ್‌ ಟೋಬಿಯರ್‌ ಅವರನ್ನು 4-3 ಅಂಕಗಳಿಂದ ಸೋಲಿಸಿದರು. ಭಜರಂಗ್‌ ಹಾಗೂ ಅಲೆ ಜಾಂಡ್ರೊಗೆ ಗೆಲುವಿಗಾಗಿ ತೀವ್ರ ಪೈಪೋಟಿಯೇ ನಡೆಯಿತು. ಆರಂಭದಲ್ಲಿ 4-1 ಅಂಕಗಳ ಮುನ್ನಡೆಯಲ್ಲಿದ್ದ ಭಜರಂಗ್‌ಗೆ ಅಘಾತ ನೀಡಿದ ಅಲೆ ಜಾಂಡ್ರೊ ಸತತ 2 ಅಂಕಗಳನ್ನು ತಮ್ಮದಾಗಿಸಿಕೊಂಡರು. ಅಂತಿಮವಾಗಿ ಭಜರಂಗ್‌ ಒಂದು ಅಂಕಗಳ ಮುನ್ನಡೆಯಿಂದ ಗೆಲುವು ದಾಖಲಿಸಿದರು. 2010ರಲ್ಲಿ ಮಾಸ್ಕೋದಲ್ಲಿ ನಡೆದ “ವಿಶ್ವ ಕುಸ್ತಿ ಚಾಂಪಿಯನ್‌ಶಿಪ್‌’ನಲ್ಲಿ ಸುಶೀಲ್‌ ಕುಮಾರ್‌ ಭಾರತಕ್ಕೆ ಮೊದಲ ಚಿನ್ನದ ಪದಕ ತಂದಿತ್ತಿದ್ದರು. 

“ದೇಶಕ್ಕಾಗಿ ಚಿನ್ನ ಗೆಲ್ಲಬೇಕು’
“ಎದುರಾಳಿ ಉತ್ತಮ ಕುಸ್ತಿ ಪಟು. ಆದರೆ ಎರಡನೇ ಅವಧಿಯಲ್ಲಿ ಅವರು ಬಹಳ ಹತಾಶರಾಗಿದ್ದರು. ಕೊನೆಯ ನಿಮಿಷದಲ್ಲಿ ಆಕ್ರಮಣಕಾರಿ ಆಟವಾಡಿದ ಕಾರಣ 2 ಅಂಕಗಳನ್ನು ಗಳಿಸಿದರು. ಕೊನೆಯ ನಿಮಿಷದಲ್ಲಿ ನಾನು ಮುನ್ನಡೆಯನ್ನು ಕಾಯ್ದುಕೊಳ್ಳಬೇಕಾಗಿತ್ತು. ಹೀಗಾಗಿ ಅತ್ಯಂತ ಜಾಗೃತನಾಗಿ ಆಡಬೇಕಾಯಿತು. ನನ್ನ ಪಂದ್ಯ ಬಳಿಕ ತಾಕುಟೊ ಅವರ ಪಂದ್ಯವನ್ನು ವೀಕ್ಷಿಸಿದ್ದೇನೆ. ರಶ್ಯದ ಎದುರಾಳಿ ವಿರುದ್ಧ ಅವರು ಮಿತಿಮೀರಿದ ಶಕ್ತಿ ಹೊಂದಿದ್ದರು. ಅವರ ಆಟದ ವೈಖರಿಯನ್ನು ನೋಡಿ ಕೋಚ್‌ ಹಾಗೂ ನಾನು ಫೈನಲ್‌ಗೆ ತಯಾರಿ ಮಾಡಿಕೊಂಡಿದ್ದೇವೆ. ಸುಶೀಲ್‌ ಕುಮಾರ್‌ ಅವರಂತೆ ನಾನು ಚಿನ್ನ ಗೆಲ್ಲಬೇಕು. ನನ್ನ ದೇಶಕ್ಕಾಗಿ ಚಿನ್ನ ಗೆಲ್ಲಬೇಕು. ಇದಕ್ಕಾಗಿ ದೇಶದ ಪ್ರತಿಯೊಬ್ಬ ಪ್ರಜೆಯ ಆಶೀರ್ವಾದಬೇಕು’ ಎಂದು ಭಜರಂಗ್‌ ಹೇಳಿದ್ದಾರೆ.