ಪ್ಯಾರಿಸ್‌ ಮಾಸ್ಟರ್ ಟೆನಿಸ್‌: ಜೊಕೋಗೆ ಆಘಾತವಿಕ್ಕಿದ ಕಶನೋವ್‌

Team Udayavani, Nov 6, 2018, 6:00 AM IST

ಪ್ಯಾರಿಸ್‌: ಐದನೇ ಬಾರಿಗೆ ಪ್ಯಾರಿಸ್‌ ಮಾಸ್ಟರ್ ಟೆನಿಸ್‌ ಕಿರೀಟ ಏರಿಸಿಕೊಂಡು ತಮ್ಮ ನಂಬರ್‌ ವನ್‌ ರ್‍ಯಾಂಕಿಂಗ್‌ ಪುನರಾಗಮನದ ಸಂಭ್ರಮವನ್ನು ದೊಡ್ಡ ರೀತಿಯಲ್ಲಿ ಆಚರಿಸಬೇಕೆಂಬ ನೊವಾಕ್‌ ಜೊಕೋವಿಕ್‌ ಕನಸಿಗೆ ರಶ್ಯದ ಯುವ ಆಟಗಾರ ಕರೆನ್‌ ಕಶನೋವ್‌ ತಣ್ಣೀರೆರಚಿದ್ದಾರೆ. ರವಿವಾರ ರಾತ್ರಿ ನಡೆದ ಪ್ರಶಸ್ತಿ ಕಾಳಗದಲ್ಲಿ ಅವರು ಜೊಕೋವಿಕ್‌ಗೆ 7-5, 6-4 ನೇರ ಸೆಟ್‌ಗಳ ಆಘಾತವಿಕ್ಕಿ ಕಿರೀಟ ಏರಿಸಿಕೊಂಡರು.

22ರ ಹರೆಯದ ಪ್ರತಿಭಾನ್ವಿತ ಟೆನಿಸಿಗ ಕಶನೋವ್‌ ಒಂದು ಗಂಟೆ, 37 ನಿಮಿಷಗಳ ಕಾಲ ದಿಟ್ಟ ಹೋರಾಟ ನಡೆಸಿ ತಮ್ಮ ಟೆನಿಸ್‌ ಬಾಳ್ವೆಯ ಬಹುದೊಡ್ಡ ಪ್ರಶಸ್ತಿಯೊಂದನ್ನು ಎತ್ತಿದರು.

ಈ ಹಿನ್ನಡೆಗೆ ಜೊಕೋವಿಕ್‌ ಅವರ ಅನಾರೋಗ್ಯವೂ ಸ್ವಲ್ಪ ಮಟ್ಟಿಗೆ ಕಾರಣವಾಗಿತ್ತು. ಕಳೆದೊಂದು ವಾರದಿಂದ “ಫ‌ೂÉ’ನಿಂದ ಅವರು ಬಳಲುತ್ತಿದ್ದರು. ಅಲ್ಲದೇ ಸೆಮಿಫೈನಲ್‌ನಲ್ಲಿ ರೋಜರ್‌ ಫೆಡರರ್‌ ಜತೆ 3 ಗಂಟೆಗಳ ಹೋರಾಟ ನಡೆಸಿದ ಕಾರಣ ಜೊಕೋ ಬಳಲಿದಂತೆ ಕಂಡುಬಂದರು.  ಇದರೊಂದಿಗೆ ಜೊಕೋವಿಕ್‌ ಕಳೆದ 3 ತಿಂಗಳಲ್ಲಿ ಸಾಧಿಸುತ್ತ ಬಂದ ಸತತ ಗೆಲುವಿನ ಅಭಿಯಾನ 22 ಪಂದ್ಯಗಳಿಗೆ ಕೊನೆಗೊಂಡಿತು.

ಈ ಸಾಧನೆಯ ವೇಳೆ ಕರೆನ್‌ ಕಶನೋವ್‌ ಟಾಪ್‌-10 ಯಾದಿಯ ನಾಲ್ವರು ಟೆನಿಸಿಗರನ್ನು ಮಣಿಸಿದ್ದು ವಿಶೇಷವಾಗಿತ್ತು. ಪ್ರಶಸ್ತಿಯ ಹಾದಿಯಲ್ಲಿ ಅವರು ಜಾನ್‌ ಇಸ್ನರ್‌, ಡೊಮಿನಿಕ್‌ ಥೀಮ್‌, ಅಲೆಕ್ಸಾಂಡರ್‌ ಜ್ವೆರೇವ್‌ ಮೊದಲಾದ ಖ್ಯಾತ ಆಟಗಾರರಿಗೆ ಸೋಲಿನ ರುಚಿ ತೋರಿಸಿದ್ದರು. ವಿಶ್ವ ರ್‍ಯಾಂಕಿಂಗ್‌ನಲ್ಲಿ 18ನೇ ಸ್ಥಾನದಲ್ಲಿದ್ದ ಕಶನೋವ್‌ ಈ ಗೆಲುವಿನೊಂದಿಗೆ 11ಕ್ಕೆ ಜಿಗಿದಿದ್ದಾರೆ.
“ಈ ಪಂದ್ಯದ ಎಲ್ಲ ಶ್ರೇಯ ಕಶನೋವ್‌ಗೆ ಸಲ್ಲಬೇಕು. ಅವರು ಗೆಲುವಿಗೆ ಅರ್ಹರಾಗಿದ್ದರು. ಅವರಿಗೆ ಉಜ್ವಲ ಭವಿಷ್ಯವಿದೆ’ ಎಂಬುದಾಗಿ ಜೊಕೋವಿಕ್‌ ಹಾರೈಸಿದ್ದಾರೆ.