ಕ್ಯಾಂಡಿ: ಯಾರಿಗೆ ಸಿಹಿ?

Team Udayavani, Nov 18, 2018, 6:10 AM IST

ಕ್ಯಾಂಡಿ: ಪ್ರವಾಸಿ ಇಂಗ್ಲೆಂಡ್‌ ಟೆಸ್ಟ್‌ ಸರಣಿ ಗೆಲ್ಲುತ್ತದೋ ಅಥವಾ ಆತಿಥೇಯ ಶ್ರೀಲಂಕಾ ಸರಣಿಯನ್ನು ಸಮಬಲಕ್ಕೆ ತರುತ್ತದೋ, ಕ್ಯಾಂಡಿಯಲ್ಲಿ ಸಿಹಿ ಅನುಭವಿಸುವವರು ಯಾರು ಎಂಬ ಕುತೂಹಲದೊಂದಿಗೆ ದ್ವಿತೀಯ ಟೆಸ್ಟ್‌ ಪಂದ್ಯದ 4ನೇ ದಿನದಾಟ ಕೊನೆಗೊಂಡಿದೆ.

ಗೆಲುವಿಗೆ 301 ರನ್‌ ಗುರಿ ಪಡೆದಿರುವ ಶ್ರೀಲಂಕಾ, ಶನಿವಾರದ ಆಟದ ಅಂತ್ಯಕ್ಕೆ 7 ವಿಕೆಟ್‌ ಕಳೆದುಕೊಂಡು 226 ರನ್‌ ಗಳಿಸಿದೆ. ಉಳಿದ 3 ವಿಕೆಟ್‌ಗಳಿಂದ 75 ರನ್‌ ಗಳಿಸಬೇಕಾದ ಒತ್ತಡ ಶ್ರೀಲಂಕಾದ ಮೇಲಿದೆ. ಕೀಪರ್‌ ನಿರೋಷನ್‌ ಡಿಕ್ವೆಲ್ಲ ಕ್ರೀಸ್‌ನಲ್ಲಿದ್ದಾರೆ. ಅಖೀಲ ಧನಂಜಯ, ನಾಯಕ ಸುರಂಗ ಲಕ್ಮಲ್‌ ಮತ್ತು ಮಲಿಂದ ಪುಷ್ಪಕುಮಾರ ಬ್ಯಾಟ್‌ ಹಿಡಿದು ಬರಬೇಕಿದೆ.

ಚಹಾ ವಿರಾಮದ ತನಕ ಪಂದ್ಯ ಶ್ರೀಲಂಕಾದ ಕೈಯಲ್ಲೇ ಇತ್ತು. ಅನುಭವಿ ಏಂಜೆಲೊ ಮ್ಯಾಥ್ಯೂಸ್‌ 80ರ ಗಡಿ ದಾಟಿ ಇಂಗ್ಲೆಂಡ್‌ ಬೌಲರ್‌ಗಳಿಗೆ ಬೆವರಿಳಿಸುತ್ತ ಸಾಗಿದ್ದರು. 5ಕ್ಕೆ 219 ರನ್‌ ಮಾಡಿದ್ದ ಲಂಕಾ ಗೆಲುವಿನತ್ತ ಮುಖ ಮಾಡಿತ್ತು. ಆದರೆ ಟೀ ಬಳಿಕ 20 ಎಸೆತಗಳ ಅಂತರದಲ್ಲಿ ಮ್ಯಾಥ್ಯೂಸ್‌ ಮತ್ತು ದಿಲುÅವಾನ್‌ ಪರೆರ ವಿಕೆಟ್‌ ಹಾರಿಸಿದ ಇಂಗ್ಲೆಂಡ್‌ ಪಂದ್ಯಕ್ಕೆ ಮರಳುವಲ್ಲಿ ಯಶಸ್ವಿಯಾಯಿತು. ಕೊನೆಯ ಅವಧಿಯಲ್ಲಿ ಮಳೆ ಸುರಿದುದರಿಂದ 3.2 ಓವರ್‌ಗಳ ಆಟವಷ್ಟೇ ಸಾಧ್ಯವಾಗಿದೆ.

ಆರಂಭಿಕ ಕುಸಿತಕ್ಕೆ ಸಿಲುಕಿ 26ಕ್ಕೆ 3 ವಿಕೆಟ್‌ ಕಳೆದುಕೊಂಡ ಲಂಕೆಗೆ ಕರುಣರತ್ನೆ (57) ಒಂದಿಷ್ಟು ರಕ್ಷಣೆ ಒದಗಿಸಿದರು. ಬಳಿಕ ಕೆಳ ಕ್ರಮಾಂಕದಲ್ಲಿ ಮ್ಯಾಥ್ಯೂಸ್‌ (88), ರೋಷನ್‌ ಸಿಲ್ವ (37) ಮತ್ತು ಡಿಕ್ವೆಲ್ಲ ಉತ್ತಮ ಹೋರಾಟ ಸಂಘಟಿಸಿದರು. ಇಂಗ್ಲೆಂಡ್‌ ಪರ ಸ್ಪಿನ್ನರ್‌ಗಳಾದ ಜಾಕ್‌ ಲೀಚ್‌ (73ಕ್ಕೆ 4) ಮತ್ತು ಮೊಯಿನ್‌ ಅಲಿ (65ಕ್ಕೆ 2) ಪರಿಣಾಮಕಾರಿ ಬೌಲಿಂಗ್‌ ನಡೆಸಿದರು.

ಇದಕ್ಕೂ ಮುನ್ನ 9ಕ್ಕೆ 324 ರನ್‌ ಮಾಡಿದ್ದ ಇಂಗ್ಲೆಂಡ್‌, ದಿನದಾಟ ಮುಂದುವರಿಸಿ 346ಕ್ಕೆ ಆಲೌಟ್‌ ಆಯಿತು.
ಸಂಕ್ಷಿಪ್ತ ಸ್ಕೋರ್‌: ಇಂಗ್ಲೆಂಡ್‌ 290 ಮತ್ತು 346. ಶ್ರೀಲಂಕಾ-336 ಮತ್ತು 7 ವಿಕೆಟಿಗೆ 226.