ಕ್ಯಾಲಿಕಟ್ ಹೀರೋಸ್ ಅಜೇಯ ಓಟ
Team Udayavani, Feb 14, 2019, 12:55 AM IST
ಕೊಚ್ಚಿ: ಪ್ರೊ ವಾಲಿಬಾಲ್ ಲೀಗ್ ಕೊಚ್ಚಿ ಚರಣದ ಮುಖಾಮುಖೀಯಲ್ಲಿ ಕ್ಯಾಲಿಕಟ್ ಹೀರೋಸ್ ಅಜೇಯ ಅಭಿಯಾನ ಮುಂದುವರಿಸಿದೆ. ಬುಧವಾರದ ಪಂದ್ಯದಲ್ಲಿ ಅಹ್ಮದಾಬಾದ್ ಡಿಫೆಂಡರ್ಗೆ 4-1 ಅಂತರದ ಸೋಲುಣಿಸಿ ಸತತ 5 ಜಯ ಸಾಧಿಸಿ ಮೆರೆದಿದೆ.
ಕೂಟದ ಆರಂಭದಿಂದಲೂ ಅಮೋಘ ಪ್ರದರ್ಶನ ಕಾಯ್ದುಕೊಂಡು ಬಂದ ಕ್ಯಾಲಿಕಟ್, ಬುಧವಾರ ಮೇಲಾಟದಲ್ಲಿ ನಾಯಕ ಜೆರೋಮ್ ವಿನಿತ್ (17 ಅಂಕ), ಪೌಲ್ ಲೋಟ್ಮನ್ (14 ಅಂಕ) ಸಾಹಸದಿಂದ ಮೇಲುಗೈ ಸಾಧಿಸಿತು. ಪರಾಜಿತ ತಂಡದ ಪರ ನೊಲಿಕ ಬೆಲಿಕ್, ವೈಷ್ಣವ್ ಮತ್ತು ಮನ್ದೀಪ್ ಸಿಂಗ್ ತಲಾ 8 ಅಂ ಕ ಸಂಪಾದಿಸಿದರು. ದ್ವಿತೀಯ ಸೆಟ್ ಮಾತ್ರ ಗೆಲ್ಲಲು ಅಹ್ಮದಾಬಾದ್ ವಿಫಲವಾಯಿತು (15-11). ಉಳಿದಂತೆ ಕ್ಯಾಲಿಕಟ್ 15-14, 15-11, 15-9, 15-8 ಅಂತರದ ಮೇಲುಗೈ ಸಾಧಿಸಿತು. ಅಹ್ಮದಾಬಾದ್ ಆಡಿದ ಮೂರೂ ಪಂದ್ಯಗಳನ್ನು ಸೋತು ಅಂಕಪಟ್ಟಿಯಲ್ಲಿ ತಳ ಕಂಡಿದೆ.
ಇದರೊಂದಿಗೆ ಕೊಚ್ಚಿ ಸ್ಪರ್ಧೆಗಳು ಮುಕ್ತಾಯಗೊಂಡಿದ್ದು, ಶನಿವಾರದಿಂದ ಚೆನ್ನೈ ಚರಣದ ಸುತ್ತು ಮೊದಲ್ಗೊಳ್ಳಲಿದೆ. ಇಲ್ಲಿನ ಕೊನೆಯ 3 ಲೀಗ್ ಪಂದ್ಯಗಳ ಬಳಿಕ ನಾಕೌಟ್ ಸ್ಪರ್ಧೆಗಳು ಆರಂಭವಾಗುತ್ತವೆ.