CONNECT WITH US  

ಚಿಕ್ಕಮಗಳೂರಲ್ಲಿ ದಾಳಿಗೆ ಸಂಚು ಹೂಡಿದ್ದ ನಕ್ಸಲರು?

ಚಿಕ್ಕಮಗಳೂರು: ರಾಜ್ಯದಲ್ಲಿ ಈಗ ಐದಾರು ಮಂದಿ ನಕ್ಸಲರು ಸಕ್ರಿಯರಾಗಿದ್ದು, ಸೆಪ್ಟೆಂಬರ್‌ ಅಂತ್ಯದೊಳಗೆ ಶೃಂಗೇರಿ ಮತ್ತು ಕೊಪ್ಪ ತಾಲೂಕಿನ ಕೆಲವು ಸರ್ಕಾರಿ ಕಚೇರಿಗಳ ಮೇಲೆ ಬಾಂಬ್‌ ದಾಳಿಗೆ ಪಿತೂರಿ ನಡೆಸಿದ್ದರು ಎಂಬ ವಿಷಯ ಬೆಳಕಿಗೆ ಬಂದಿದೆ. ಇತ್ತೀಚಿನ ಕೆಲವು ವರ್ಷಗಳಿಂದ ಜಿಲ್ಲೆಯಲ್ಲಿ ನಕ್ಸಲರ ಯಾವುದೇ ಕೃತ್ಯವೂ ನಡೆದಿಲ್ಲ. ಹೀಗಾಗಿ ಅಸ್ತಿತ್ವ ಪ್ರದರ್ಶನ ಉದ್ದೇಶದಿಂದ ಮತ್ತು ಕೇಂದ್ರ ಸಮಿತಿ ನಿರ್ದೇಶನದಂತೆ ಸರ್ಕಾರಿ ಕಚೇರಿಗಳ ಮೇಲೆ ದಾಳಿಗೆ ನಕ್ಸಲರು ಯೋಜನೆ ರೂಪಿಸಿ ಅಗತ್ಯ ಸಿದ್ಧತೆ ಮಾಡಿಕೊಂಡಿದ್ದರು ಎಂದು ಪೊಲೀಸ್‌ ಮೂಲಗಳು ತಿಳಿಸಿವೆ. ಹಾಲಿ ರಾಜ್ಯ ನಕ್ಸಲರ ತಂಡದ ನೇತೃತ್ವ ವಹಿಸಿಕೊಂಡಿದ್ದ ರಮೇಶ್‌ ಅಲಿಯಾಸ್‌ ಶಿವಕುಮಾರ್‌ನನ್ನು ಇತ್ತೀಚೆಗಷ್ಟೇ ಪೊಲೀಸರು ಬೆಂಗಳೂರಿನಲ್ಲಿ ಬಂಧಿಸಿದ್ದರು. ಇದು ನಕ್ಸಲರಿಗೆ ಹಿನ್ನಡೆಯಾಗಿದ್ದು, ಈ ಹಿನ್ನೆಲೆಯಲ್ಲಿ ಸರ್ಕಾರಿ ಕಚೇರಿಗಳ ಮೇಲೆ ದಾಳಿ ನಡೆಸುವ ಯೋಜನೆಯನ್ನು ಕೈಬಿಟ್ಟಿದ್ದಾರೆ ಎಂದು ತಿಳಿದುಬಂದಿದೆ.

5-6 ಜನ ನಕ್ಸಲರು: ರಾಜ್ಯದಲ್ಲಿ ಈಗ ಐದಾರು ಮಂದಿ ನಕ್ಸಲರು ಸಕ್ರಿಯರಾಗಿದ್ದಾರೆ. ವನಜಾಕ್ಷಿ, ಮುಂಡಗಾರು ಲತಾ, ಸುರೇಶ್‌ ಅಲಿಯಾಸ್‌ ಪ್ರದೀಪ್‌ ಹಾಗೂ ಜಾನ್‌ ಇವರಲ್ಲಿ ಸೇರಿದ್ದಾರೆ. ಇನ್ನುಳಿದಂತೆ ವಿಕ್ರಂ ಗೌಡ ಮತ್ತು ಬಿ.ಜಿ.ಕೃಷ್ಣಮೂರ್ತಿ ಈಗ ಕೇರಳದಲ್ಲಿ ಸಕ್ರಿಯರಾಗಿದ್ದಾರೆ ಎನ್ನಲಾಗಿದೆ.

ಕುಪ್ಪುಸ್ವಾಮಿ ಪ್ರಮುಖ: ರಾಜ್ಯ ಸೇರಿದಂತೆ ದಕ್ಷಿಣ ಭಾರತದಲ್ಲಿ ನಕ್ಸಲ್‌ ಚಟುವಟಿಕೆಗಳ ನೇತೃತ್ವವನ್ನು ಕುಪ್ಪುಸ್ವಾಮಿ ವಹಿಸಿಕೊಂಡಿದ್ದಾನೆ. ಈತ ಕೇಂದ್ರ ಸಮಿತಿ ಸದಸ್ಯ ಕೂಡ ಎಂದು ಮೂಲಗಳು ತಿಳಿಸಿವೆ. ಈತನನ್ನು ಬಂಧಿಸಿದಲ್ಲಿ ದಕ್ಷಿಣ ಭಾರತದಲ್ಲಿ ನಕ್ಸಲ್‌ ಚಟುವಟಿಕೆಯೇ ನಿಷ್ಕ್ರಿಯವಾಗಲಿದೆ ಎನ್ನುತ್ತವೆ ಪೊಲೀಸ್‌ ಮೂಲಗಳು. ಕಳೆದ ತಿಂಗಳು ಕುಪ್ಪುಸ್ವಾಮಿಯನ್ನು ಬಂಧಿಸಲು ಪೊಲೀಸರು ಯೋಜನೆ ರೂಪಿಸಿ ಚೆನ್ನೈವರೆಗೂ ಈತನನ್ನು ಬೆನ್ನಟ್ಟಿದ್ದರೂ, ಸ್ವಲ್ಪದರಲ್ಲಿ ಆತ ತಪ್ಪಿಸಿಕೊಂಡಿದ್ದ ಎನ್ನಲಾಗಿದೆ.

ಇತ್ತೀಚೆಗಷ್ಟೇ ಬಂಧಿತನಾದ ರಮೇಶನನ್ನು ಕಳೆದ ಹಲವು ದಿನಗಳಿಂದಲೂ ಪೊಲೀಸರು ಹಿಂಬಾಲಿಸಿದ್ದರು. ಈತ ಕುಪ್ಪುಸ್ವಾಮಿಯನ್ನು ಭೇಟಿ ಮಾಡಬಹುದು. ಆಗ ಇಬ್ಬರನ್ನೂ ಒಟ್ಟಾಗಿ ಬಂಧಿಸಬಹುದು ಎಂಬ ಲೆಕ್ಕಾಚಾರ ಪೊಲೀಸರದ್ದಾಗಿತ್ತು. ಆದರೆ ನಕ್ಸಲರು ಶೃಂಗೇರಿ ಹಾಗೂ ಕೊಪ್ಪದಲ್ಲಿ ಸರ್ಕಾರಿ ಕಚೇರಿಗಳನ್ನು ಬಾಂಬ್‌ ಹಾಕಿ ಉಡಾಯಿಸುವ ಯೋಜನೆ ರೂಪಿಸಿರುವ ಬಗ್ಗೆ ಪೊಲೀಸರಿಗೆ ಮಾಹಿತಿ ದೊರೆತು ರಮೇಶನನ್ನು ಬಂಧಿಸಿದರು ಎಂದು ಹೇಳಲಾಗುತ್ತಿದೆ. ಇದರೊಂದಿಗೆ ಈ ಹಿಂದೆ ವಿವಿಧ ತಂಡಗಳನ್ನು ರಚಿಸಿಕೊಂಡು ಕಾರ್ಯನಿರ್ವಹಿಸುತ್ತಿದ್ದ ನಕ್ಸಲರು ಈಗ ಪಶ್ಚಿಮಘಟ್ಟ ವ್ಯಾಪ್ತಿಗೇ ಒಂದು ತಂಡವನ್ನು ರಚಿಸಿಕೊಂಡು ಒಟ್ಟಾಗಿ ಕೆಲಸ ಮಾಡುತ್ತಿದ್ದಾರೆ ಎಂಬ ಮಾಹಿತಿಯೂ ಲಭ್ಯವಾಗಿದೆ.

ಶಂಕಿತ ನಕ್ಸಲ್‌ ರಮೇಶ್‌ ಬಂಧನ
ಚಿಕ್ಕಮಗಳೂರು:
ಇತ್ತೀಚೆಗೆ ಬೆಂಗಳೂರಿನಲ್ಲಿ ಬಂಧಿತ ರಮೇಶ್‌ ಅಲಿಯಾಸ್‌ ಶಿವಕುಮಾರ್‌ ನಕ್ಸಲ್‌ ಸಂಘಟನೆಯ ರಾಜ್ಯದ ಮುಖಂಡನಾಗಿದ್ದು, ಈತನ ನೇತೃತ್ವದಲ್ಲಿ ನಕ್ಸಲರು ಮತ್ತೆ ದುಷ್ಕೃತ್ಯ ಸಂಚು ನಡೆಸಿದ್ದರು ಎಂದು ಎಸ್ಪಿ ಅಣ್ಣಾಮಲೈ ಹೇಳಿದರು. ರಮೇಶ್‌ ಮತ್ತು ಆತನ ಕೆಲ ಸಹಚರರು ಸೇರಿಕೊಂಡು ಸೆಪ್ಟಂಬರ್‌ ಅಂತ್ಯದೊಳಗಾಗಿ ಶೃಂಗೇರಿ, ಕೊಪ್ಪ ತಾಲೂಕುಗಳಲ್ಲಿ ಕೆಲವು ದುಷ್ಕೃತ್ಯಗಳನ್ನು ನಡೆಸಲು ಸಿದ್ಧರಾಗಿದ್ದರು ಎಂದು ವಿಚಾರಣೆ ವೇಳೆ ತಿಳಿದುಬಂದಿದೆ. ಬೆಂಗಳೂರಿನ ಜೆಪಿ ನಗರದಲ್ಲಿ ಇತ್ತೀಚೆಗೆ ಈತನನ್ನು ಬಂಧಿಸಲಾಗಿದ್ದು, ಈತನ ವಿರುದ್ಧ ರಾಯಚೂರಿನಲ್ಲಿ 19, ಆಂಧ್ರ ಪ್ರದೇಶದಲ್ಲಿ 2, ಉಡುಪಿಯಲ್ಲಿ 1 ಹಾಗೂ ಚಿಕ್ಕಮಗಳೂರಿನಲ್ಲಿ 1 ಪ್ರಕರಣ ಸೇರಿ ಒಟ್ಟಾರೆ 23 ಪ್ರಕರಣಗಳು ದಾಖಲಾಗಿವೆ ಎಂದರು.

2006ರಿಂದ ಸಕ್ರಿಯ: ಚಿಕ್ಕಮಗಳೂರು ಜಿಲ್ಲೆಯಲ್ಲಿ ಈತ 2006ರಿಂದ ನಕ್ಸಲ್‌ ಚಟುವಟಿಕೆ ನಡೆಸುತ್ತಿದ್ದು, ಅದಕ್ಕೂ ಮೊದಲು ರಾಯಚೂರಿನಲ್ಲಿದ್ದ. ಇತ್ತೀಚೆಗೆ ಶೃಂಗೇರಿಯಲ್ಲಿ ದೊರೆತ ನಕ್ಸಲ್‌ ಕರಪತ್ರ ಹಾಗೂ ಬ್ಯಾನರ್‌ಗಳ ಪ್ರಕರಣದಲ್ಲಿಯೂ ಈತನ ಕೈವಾಡವಿದೆ. ಬಂಧಿತನಿಂದ ಅರಣ್ಯದಲ್ಲಿ ರಾತ್ರಿವೇಳೆ ತಂಗಲು ಬಳಸುವ ಪದಾರ್ಥಗಳು ಸೇರಿದಂತೆ ವಿವಿಧ ಪರಿಕರಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಕೆಲವೊಂದು ಆಯುಧಗಳನ್ನು ಅರಣ್ಯದಲ್ಲಿ ಬಚ್ಚಿಟ್ಟಿರುವುದಾಗಿ ವಿಚಾರಣೆ ವೇಳೆ ಹೇಳಿದ್ದಾನೆ. ಈತನನ್ನು ಬೆಂಗಳೂರಿನಲ್ಲಿ ನ್ಯಾಯಾಲಯಕ್ಕೆ ಹಾಜರುಪಡಿಸಿ 10 ದಿನ ಪೊಲೀಸ್‌ ವಶಕ್ಕೆ ಪಡೆದುಕೊಳ್ಳಲಾಗಿದೆ. ಈಗ ಚಿಕ್ಕಮಗಳೂರಿಗೆ ಕರೆತರಲಾಗಿದ್ದು, ವಿಚಾರಣೆ ನಡೆಯುತ್ತಿದೆ ಎಂದರು.

- ಎಸ್‌.ಕೆ.ಲಕ್ಷ್ಮೀಪ್ರಸಾದ್‌

Trending videos

Back to Top