ಶಾಲಾ ಮಕ್ಕಳ “ಶೂ ಭಾಗ್ಯ’ ಯೋಜನೆಗೆ ಈ ವರ್ಷ ಕತ್ತರಿ?
Team Udayavani, Feb 8, 2017, 3:45 AM IST
ಬೆಂಗಳೂರು: ಸರ್ಕಾರಿ ಶಾಲಾ ಮಕ್ಕಳಿಗೆ ಕಳೆದ ಶೈಕ್ಷಣಿಕ ಸಾಲಿನಲ್ಲಿ ಸರ್ಕಾರ ನೀಡಿದ್ದ “ಶೂ’ಗಳು ಸವೆದು ಹಾಳಾಗುತ್ತಿದ್ದರೂ ಪ್ರಸಕ್ತ ಶೈಕ್ಷಣಿಕ ಸಾಲಿನಲ್ಲಿ “ಶೂ ಮತ್ತು ಸಾಕ್ಸ್’ಗಳನ್ನು ಒದಗಿಸಿಲ್ಲ. ಇದರಿಂದಾಗಿ ಪ್ರಸಕ್ತ ಶೈಕ್ಷಣಿಕ ವರ್ಷದಲ್ಲಿ ಮಕ್ಕಳು “ಶೂ ಭಾಗ್ಯ’
ದಿಂದ ವಂಚಿತರಾಗುವಂತಾಗಿದೆ.
ಪ್ರಸಕ್ತ ಶೈಕ್ಷಣಿಕ ವರ್ಷ ಮುಗಿಯುತ್ತಾ ಬಂದರೂ ಈವರೆಗೆ ಶೂ ಭಾಗ್ಯಕ್ಕೆ ಹಣಕಾಸು ಇಲಾಖೆಯ ಅನುಮೋದನೆಯೇ ಸಿಕ್ಕಿಲ್ಲ. ಹಣ ನೀಡುವಂತೆ ಹಣಕಾಸು ಇಲಾಖೆಗೆ ಪ್ರಸ್ತಾವನೆ ಸಲ್ಲಿಸಿ ಕಾಯುತ್ತಾ ಕುಳಿತಿದೆ. ಸರ್ಕಾರಿ ಶಾಲಾ ಮಕ್ಕಳು ಖಾಸಗಿ ಶಾಲಾ ಮಕ್ಕಳಿಗೆ ಸರಿಸಮನಾಗಿ ಕಾಣಿಸಿಕೊಳ್ಳಬೇಕು ಎಂಬ ಕಾರಣಕ್ಕೆ 2015-16ನೇ ಸಾಲಿನ ಬಜೆಟ್ನಲ್ಲಿ ಸಿಎಂ ಸಿದ್ದರಾಮಯ್ಯ “ಶೂ ಭಾಗ್ಯ’ ಯೋಜನೆ ಘೋಷಿಸಿದ್ದರು. ಬಜೆಟ್ನಲ್ಲಿ ಘೋಷಿಸಿದ್ದ ಶೂ ಭಾಗ್ಯ ಮಕ್ಕಳಿಗೆ ಸಿಕ್ಕಿದ್ದು ಶೈಕ್ಷಣಿಕ ಸಾಲಿನ ಕೊನೆಯಲ್ಲಿ. ಅಂದರೆ, 2015ರ ಜೂನ್ನಲ್ಲಿ ಸಿಗಬೇಕಿದ್ದ ಶೂ ಮತ್ತು ಸಾಕ್ಸ್, ಏಪ್ರಿಲ್ 2016ರ ವೇಳೆಗೆ ತಲುಪಿತ್ತು. ಆದರೆ, ಈ ವರ್ಷ ಮಕ್ಕಳು ಪರೀಕ್ಷೆ ಮುಗಿಸಿ ಮನೆಗೆ ಹೋದರೂ ದೊರೆಯುವುದು ಅನುಮಾನ. ಹೇಗಿದ್ದರೂ ಕಳೆದ ವರ್ಷ ಶೈಕ್ಷಣಿಕ ವರ್ಷದ ಕೊನೆಯಲ್ಲಿ ನೀಡಿರುವ ಶೂ ಮತ್ತು ಸಾಕ್ಸ್ ಗಳನ್ನು ವಿದ್ಯಾರ್ಥಿಗಳು 2016-17ನೇ ಸಾಲಿನ ವ್ಯಾಸಂಗದ ವೇಳೆ ಬಳಸಿದ್ದಾರೆ. ಹಾಗಾಗಿ ಕಳೆದ ವರ್ಷದ ಶೂ, ಸಾಕ್ಸ್ಗಳಲ್ಲೇ ಅವರ ಈ ವರ್ಷದ ಶೈಕ್ಷಣಿಕ ಅವಧಿಯನ್ನೂ ಪೂರೈಸಲಿ ಎಂದು ಇಲಾಖೆಯೂ ಮೌನ ವಹಿಸಿದೆ.
ಈ ಕುರಿತು ಶಿಕ್ಷಣ ಇಲಾಖೆ ಅಧಿಕಾರಿಗಳನ್ನು ಪ್ರಶ್ನಿಸಿದಾಗ, ಅಡ್ಡಗೋಡೆಯ ಮೇಲೆ ದೀಪ ಇಟ್ಟಂತೆ ಮಾತನಾಡುತ್ತಾರೆ. ಶೂ, ಸಾಕ್ಸ್ ನೀಡಲು ಹಣ ಬೇಕಲ್ಲ? ಎಲ್ಲಿಂದ ತರೋದು? ಹಣಕಾಸು ಇಲಾಖೆ ಕೊಡಬೇಕು ತಾನೆ ಎಂದು ಹಿರಿಯ ಅಧಿಕಾರಿಯೊಬ್ಬರು ಹೇಳುತ್ತಾರೆ. 48 ಲಕ್ಷ ಮಕ್ಕಳು: ಶಿಕ್ಷಣ ಇಲಾಖೆಯ ಅಂಕಿ- ಅಂಶಗಳ ಪ್ರಕಾರ ಕಳೆದ ಸಾಲಿನಲ್ಲಿ 1 ರಿಂದ 10ನೇ ತರಗತಿವರೆಗಿನ 48 ಲಕ್ಷ ಮಕ್ಕಳಿಗೆ “ಶೂ ಭಾಗ್ಯ’ ಯೋಜನೆಯಡಿ ಒಂದು ಜತೆ ಶೂ ಮತ್ತು 2 ಜತೆ ಸಾಕ್ಸ್ ನೀಡಲಾಗಿತ್ತು. ಇದಕ್ಕಾಗಿ ಸುಮಾರು 113
ಕೋಟಿ ರೂ.ವೆಚ್ಚ ಮಾಡಲಾಗಿತ್ತು. 1 ರಿಂದ 5ನೇ ತರಗತಿವರೆಗಿನ ವಿದ್ಯಾರ್ಥಿಗಳಿಗೆ ಪ್ರತಿ ಜತೆ ಶೂಗೆ 225 ರೂ., 6ರಿಂದ 8ನೇ ತರಗತಿ ಮಕ್ಕಳ ಶೂಗೆ ತಲಾ 250 ರೂ. ಮತ್ತು 9ಹಾಗೂ 10ನೇ ತರಗತಿ ವಿದ್ಯಾರ್ಥಿಗಳಿಗೆ ನೀಡುವ ಶೂಗಳಿಗೆ ತಲಾ 275 ರೂ.
ದರ ನಿಗದಿ ಮಾಡಲಾಗಿತ್ತು.
ಶೂ ಮತ್ತು ಸಾಕ್ಸ್ ಖರೀದಿಸಿ ವಿತರಿಸುವ ಹೊಣೆಯನ್ನು ಆಯಾ ಶಾಲಾಭಿವೃದಿಟಛಿ ಮತ್ತು ನಿರ್ವಹಣಾ ಸಮಿತಿ (ಎಸ್ಡಿಎಂಸಿ)ಗಳಿಗೆ
ವಹಿಸಲಾಗಿತ್ತು. ಮುಂದಿನ ಶೈಕ್ಷಣಿಕ ವರ್ಷದ ಪ್ರಾರಂಭದಲ್ಲೇ ನೀಡಲಾಗುವುದು ಎಂದು ಕಳೆದ ವರ್ಷ ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ಇಲಾಖೆ ತಿಳಿಸಿತ್ತು. ಆದರೆ, ಈ ಬಾರಿ ಟೆಂಡರ್ ಪ್ರಕ್ರಿಯೆ ಇನ್ನೂ ನಡೆದಿಲ್ಲ.