CONNECT WITH US  

ಹೊಸ ಶುಲ್ಕ ನೀತಿ ಪ್ರಸಕ್ತ ವರ್ಷ ಅನುಮಾನ

ಬೆಂಗಳೂರು: ಖಾಸಗಿ ಶಾಲೆಗಳಲ್ಲಿ ವಸೂಲಿ ಮಾಡುತ್ತಿರುವ ಹೆಚ್ಚುವರಿ ಶುಲ್ಕಕ್ಕೆ ಕಡಿವಾಣ ಹಾಕುವ ಉದ್ದೇಶದಿಂದ ಸರ್ಕಾರ ಜಾರಿಗೆ ತರಲು ಉದ್ದೇಶಿಸಿರುವ ಶಿಕ್ಷಣ ಕಾಯ್ದೆಯನ್ನುವಿಧಾನಮಂಡಲದಲ್ಲಿ ಅಂಗೀಕಾರಗೊಳಿಸಿದ್ದರೂ, ಅಧಿಕೃತವಾಗಿ ಜಾರಿಗೊಳಿಸಲು ಮೀನಾಮೇಷ ಎಣಿಸುತ್ತಿದೆ. ಪರಿಣಾಮವಾಗಿ, ಈ ವರ್ಷ ಶುಲ್ಕ ವಸೂಲಿಗೆ ಯಾವ ಕಡಿವಾಣವೂ ಬೀಳುವುದಿಲ್ಲ!

ಶಾಲಾಭಿವೃದ್ಧಿಯ ಹೆಸರಿನಲ್ಲಿ ಅನುದಾನಿತ ಹಾಗೂ ಅನುದಾನ ರಹಿತ ಖಾಸಗಿ ಶಾಲೆಯ ಆಡಳಿತ ಮಂಡಳಿಗಳು ಮಕ್ಕಳ ಪಾಲಕರಿಂದ ಲೂಟಿ ಮಾಡುತ್ತಿರುವ ಹಣಕ್ಕೆ ಕಡಿವಾಣ ಹಾಕಲು ರಾಜ್ಯ ಶಿಕ್ಷಣ(ಎರಡನೇ ತಿದ್ದುಪಡಿ) ಕಾಯ್ದೆ 2017 ಇತ್ತೀಚೆಗೆ ವಿಧಾನ ಮಂಡಲದ ಉಭಯ ಸದನದಲ್ಲಿ ಅಂಗೀಕಾರಗೊಂಡಿದ್ದರೂ, ಗೆಜೆಟ್‌ ನೋಟಿಫಿಕೇಷನ್‌ ಹೊರಡಿಸಲು ವಿನಾ ಕಾರಣ ವಿಳಂಬವಾಗುತ್ತಿದೆ. ಸಿಬಿಎಸ್‌ಇ, ಐಸಿಎಸ್‌ಇ ಹಾಗೂ ರಾಜ್ಯಪಠ್ಯಕ್ರಮದ ಖಾಸಗಿ ಶಾಲೆಗಳಲ್ಲಿ ವಸೂಲಿ ಮಾಡುವ ಹೆಚ್ಚುವರಿ ಶುಲ್ಕಕ್ಕೆ ತಡೆ ಹಾಕುವ ಉದ್ದೇಶದಿಂದ ಹೊಸ ಶುಲ್ಕದ ಪ್ರಸ್ತಾವನೆಯನ್ನು 2016ರ ಅಕ್ಟೋಬರ್‌ನಲ್ಲೇ ರಾಜ್ಯ ಸರ್ಕಾರ ರಚನೆ ಮಾಡಿತ್ತಾದರೂ ಅಂತಿಮಗೊಂಡಿರಲಿಲ್ಲ. ಇತ್ತೀಚೆಗಷ್ಟೆ ಅಂತಿಮ ಗೊಳಿಸಿ, ವಿಧಾನ ಮಂಡಲದ ಉಭಯ ಸದನಲ್ಲೂ ಅಂಗೀಕರಿಸಲಾಗಿದೆ.

ರಾಜ್ಯ ಶಿಕ್ಷಣ (ಎರಡನೇ ತಿದ್ದುಪಡಿ) ಕಾಯ್ದೆ 2017ರ ಪ್ರಕಾರ ರಾಜ್ಯ ಪಠ್ಯಕ್ರಮದ ಖಾಸಗಿ ಶಾಲೆಗಳ ಜತೆಗೆ ಸಿಬಿಎಸ್‌ಇ ಹಾಗೂ ಐಸಿಎಸ್‌ಇ ಶಾಲೆಗಳು ಕೂಡ ಏಕರೂಪ ಶುಲ್ಕ ನೀತಿ ಅನುಸರಿಸಬೇಕು. ಆದರೆ, ಒಂದೆಡೆ ಬಹುತೇಕ ಖಾಸಗಿ ಶಾಲೆಗಳು ಮಕ್ಕಳ ನೋಂದಣಿ ಪೂರ್ಣಗೊಳಿಸಿದರೆ, ಇನ್ನೊಂದೆಡೆ ಸರ್ಕಾರ ಕಾಯ್ದೆಯ ಗೆಜೆಟ್‌ ನೋಟಿಫಿಕೇಷನ್‌
ಹೊರಡಿಸಿಲ್ಲ.

ಸೀಟು ಬಹುತೇಕ ಭರ್ತಿ: ಪ್ರಾಥಮಿಕ ತರಗತಿಗಳಿಗೆ ಕಡ್ಡಾಯ ಶಿಕ್ಷಣ ಹಕ್ಕು ಕಾಯ್ದೆಯ ಶೇ.25ರಷ್ಟು ಸೀಟು ಹೊರತುಪಡಿಸಿ, ಉಳಿದ ಶೇ.75ರಷ್ಟು ಸೀಟುಗಳು ಬಹುತೇಕ ಭರ್ತಿಯಾಗಿವೆ. ನಿಯಮಾನುಸಾರ ಮೇ 27 ರ ನಂತರ ದಾಖಲಾತಿ ಪ್ರಕ್ರಿಯೆ ನಡೆಯುತ್ತಾದರೂ 'ಡಿಮ್ಯಾಂಡ್‌' ದೃಷ್ಟಿಯಿಂದ ಒಂದೂವರೆ ತಿಂಗಳ ಮುಂಚೆಯೇ ಎಲ್ಲ ಶಾಲೆಗಳಲ್ಲಿ ಸೀಟುಗಳನ್ನು ಪೋಷಕರು ಕಾಯ್ದಿರಿಸಿಕೊಂಡಿದ್ದಾರೆ. ಆದರೆ, ಮೇ 27ರ ನಂತರ ಅಧಿಕೃತವಾಗಿ ದಾಖಲಾತಿ ಪ್ರಕ್ರಿಯೆ ಪ್ರಾರಂಭಿಸಬೇಕೆಂದು ಪ್ರವೇಶಾತಿ ಮಾರ್ಗಸೂಚಿಯನ್ನು ಸಾರ್ವಜನಿಕ ಶಿಕ್ಷಣ ಇಲಾಖೆ ಹೊರಡಿಸಿದ್ದರೂ ಖಾಸಗಿ ಶಾಲೆಗಳು ಈಗಲೇ ನೋಂದಣಿ ಮಾಡಿಕೊಳ್ಳುತ್ತಿರುವ ಬಗ್ಗೆ ಆಕ್ಷೇಪಗಳೂ ವ್ಯಕ್ತವಾಗಿವೆ.

ದುಬಾರಿ ಶುಲ್ಕ: ಖಾಸಗಿ ಶಾಲೆಗಳ ಪ್ರವೇಶಾತಿಗೆ ದುಬಾರಿ ಶುಲ್ಕ ನಿಗದಿ ಮಾಡಿರುವ ದೂರುಗಳು ಕೇಳಿಬರುತ್ತಿವೆ. ಈಗಾಗಲೇ ಸೀಟು ಕಾಯ್ದಿರಿಸಿಕೊಂಡಿರುವ ಪಾಲಕರ ಬಳಿ ಮುಂಗಡವಾಗಿ ರಸೀದಿಯಿಲ್ಲದೆ ಹಣ ಪಡೆದು ದಾಖಲಾತಿ ಸಂದರ್ಭದಲ್ಲಿ ಮತ್ತಷ್ಟು ಶುಲ್ಕಕ್ಕೆ ಬೇಡಿಕೆ ಸಹ ಇಡಲಾಗಿದೆ. ದುಬಾರಿ ಶುಲ್ಕ ಪಾವತಿಸಲು ಒಪ್ಪಿರುವ ಪಾಲಕರು ಮಕ್ಕಳ ಭವಿಷ್ಯಕ್ಕೆ ಹೆದರಿ ಎಲ್ಲಿಯೂ ಇದನ್ನು ಬಹಿರಂಗ ಮಾಡುತ್ತಿಲ್ಲ.

- ರಾಜು ಖಾರ್ವಿ ಕೊಡೇರಿ

Trending videos

Back to Top