ಜಿಎಸ್ ಟಿ ಫಸ್ಟ್ ಡೇ ಎಫೆಕ್ಟ್; ಊಟ, ತಿಂಡಿ ತಿನಿಸು ದರ ಏರಿಕೆ ಬರೆ
Team Udayavani, Jul 1, 2017, 11:19 AM IST
ಬೆಂಗಳೂರು: ಆರ್ಥಿಕ ಸುಧಾರಣೆಯ ಮಹತ್ತರ ಹೆಜ್ಜೆಯಾಗಿರುವ ಏಕರೂಪ ತೆರಿಗೆ ವ್ಯವಸ್ಥೆ ಜಿಎಸ್ ಟಿ ದೇಶಾದ್ಯಂತ ಜಾರಿಯಾಗುವ ಮೂಲಕ ದೇಶದ ಆರ್ಥಿಕ ಇತಿಹಾಸದಲ್ಲಿ ಹೊಸ ಯುಗಾರಂಭಗೊಂಡಿದೆ. ಜಿಎಸ್ ಟಿ ಜಾರಿಗೊಂಡ ಹಿನ್ನೆಲೆಯಲ್ಲಿ ಟೀ, ಕಾಫಿ ಸೇರಿದಂತೆ ತಿಂಡಿ ತಿನಿಸುಗಳ ದರ ಶನಿವಾರದಿಂದ ಏರಿಕೆಯಾಗಿದೆ.
ಜಿಎಸ್ ಟಿ ಜಾರಿಯಾಗುತ್ತಿದ್ದಂತೆಯೇ ಬೆಂಗಳೂರಿನಲ್ಲಿ ಮಧ್ಯರಾತ್ರಿಯಿಂದಲೇ ಊಟ, ತಿಂಡಿ, ತಿನಿಸು ಹಾಗೂ ಟೀ ಕಾಫಿಯ ಬೆಲೆಯಲ್ಲಿ 5 ರೂ.ವರೆಗೆ ಹೆಚ್ಚಳವಾಗಿದೆ.
ಬೆಣ್ಣೆ ಮೇಲೆ ಶೇ.6ರಿಂದ ಶೇ.12ರಷ್ಟು ಹೆಚ್ಚಳವಾಗಿದೆ. ಎಸಿ, ಫೈವ್ ಸ್ಟಾರ್ ಹೋಟೆಲ್ ಗಳ ಶೇ.6ರಷ್ಟಿದ್ದ ತೆರಿಗೆಯನ್ನು ಶೇ.12ಕ್ಕೆ ಏರಿಸಲಾಗಿದೆ. ಈ ಹಿನ್ನೆಲೆಯಲ್ಲಿ ದರ ಹೆಚ್ಚಳವಾಗಿದೆ ಎಂಬುದು ಹೋಟೆಲ್ ಮಾಲೀಕರ ವಾದವಾಗಿದೆ. ಪ್ರತಿಯೊಂದು ಫುಡ್ ಐಟಂಗಳ ಮೇಲಿನ ಬೆಲೆಯನ್ನು 5 ರೂಪಾಯಿಯಷ್ಟು ಹೆಚ್ಚಳ ಮಾಡಲಾಗಿದೆ ಎಂದು ಹೋಟೆಲ್ ಮಾಲೀಕರು ತಿಳಿಸಿದ್ದಾರೆ.