ಕೊಟ್ಟೂರು ಕಲ್ಮಠಸ್ವಾಮಿ ಲೈಂಗಿಕಹಗರಣ ವಿಡಿಯೋ ವೈರಲ್‌!

Team Udayavani, Dec 8, 2017, 10:57 AM IST

ಗಂಗಾವತಿ: ಇಲ್ಲಿನ ಕಲ್ಮಠದ ಪೀಠಾಧಿಪತಿ ಡಾ.ಕೊಟ್ಟೂರು ಮಹಾಸ್ವಾಮಿ ಲೈಂಗಿಕ ಕ್ರಿಯೆಯ ವಿಡಿಯೋ ಸಾಮಾಜಿಕ 
ಜಾಲತಾಣ ಹಾಗೂ ಖಾಸಗಿ ವಾಹಿನಿಗಳಲ್ಲಿ ಗುರುವಾರ ವೈರಲ್‌ ಆಗಿದೆ. ಸ್ವಾಮೀಜಿಯ ಅಕ್ರಮ ಚಟುವಟಿಕೆ ಕಂಡು ಮಠದ ಭಕ್ತರು ಸ್ವಾಮಿಯ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

20 ವರ್ಷಗಳ ಹಿಂದೆ ಕೊಟ್ಟೂರೇಶ್ವರ ಸ್ವಾಮಿಗಳನ್ನು ಕಲ್ಮಠ ಪೀಠಾಧ್ಯಕ್ಷರನ್ನಾಗಿ ನೇಮಕ ಮಾಡಲಾಗಿತ್ತು. ಸ್ಥಳೀಯ ವೀರಶೈವ ಸಮಾಜದ ಮುಖಂಡರನ್ನು ಸ್ವಾಮೀಜಿ ವಿಶ್ವಾಸಕ್ಕೆ ತೆಗೆದುಕೊಳ್ಳದೆ ಮಠ ಹಾಗು ವಿದ್ಯಾಸಂಸ್ಥೆ ವ್ಯವಹಾರ ನಡೆಸುತ್ತಿದ್ದರು. ಕಳೆದ ಕೆಲವು ವರ್ಷಗಳಿಂದ ಮಠದಲ್ಲಿ ಮಹಿಳೆಯರನ್ನು ಕೆಲಸಗಳಿಗೆ ನೇಮಕ ಮಾಡಿಕೊಂಡು ಅನೈತಿಕ ಕಾರ್ಯ ಮಾಡುತ್ತಿದ್ದ
ಆರೋಪಗಳಿವೆ. ಎರಡು ದಿನಗಳ ಹಿಂದೆ ಧಾರವಾಡದ ಖಾಸಗಿ ಲಾಡ್ಜ್ವೊಂದರಲ್ಲಿ ಸ್ವಾಮೀಜಿ ಮಹಿಳೆಯರ ಜೊತೆ ಅಶ್ಲೀಲವಾಗಿರುವ ವಿಡಿಯೋ ಸಾಮಾಜಿಕ ಜಾಲ  ತಾಣ ಹಾಗೂ ಖಾಸಗಿ ಸುದ್ದಿವಾಹಿನಿಗಳಲ್ಲಿ ಗುರುವಾರ ಪ್ರಸಾರವಾಗಿದೆ. ಸುದ್ದಿ ಪ್ರಸಾರವಾಗುತ್ತಿದ್ದಂತೆ ಸ್ವಾಮೀಜಿ ಮೊಬೈಲ್‌ ಸ್ವಿಚ್‌ ಆಫ್‌ ಮಾಡಿ ನಾಪತ್ತೆಯಾಗಿದ್ದಾರೆ.

ಸಂಜೆ ವೀರಶೈವ ಸಮಾಜದ ಮುಖಂಡರು ಮಠದಲ್ಲಿ ಸಭೆ ಸೇರಿ ಸ್ವಾಮಿಯನ್ನು ಕೂಡಲೇ ಬದಲಾವಣೆ ಮಾಡಬೇಕು. ಇನ್ನೊಮ್ಮೆ ಸಭೆ ಸೇರಿ ಕಾನೂನು ರೀತಿಯಲ್ಲಿ ಕಲ್ಮಠ ಪೀಠಕ್ಕೆ ನೂತನ ಸ್ವಾಮೀಜಿಯನ್ನು ನೇಮಕ ಮಾಡಬೇಕೆಂದು ತೀರ್ಮಾನ ಮಾಡಿದರು.