ಸಿಎಂ ಆದರೂ ಸಾಲ; ಸಿದ್ದರಾಮಯ್ಯ ಆಸ್ತಿ ಮೌಲ್ಯ 7 ಕೋಟಿ ರೂ.ಹೆಚ್ಚಳ
Team Udayavani, Apr 21, 2018, 6:00 AM IST
ಬೆಂಗಳೂರು: ಬಾದಾಮಿಯಲ್ಲಿ ಸ್ಪರ್ಧಿಸುವ ಬಗ್ಗೆ ಇನ್ನೂ ಗುಟ್ಟು ಬಿಟ್ಟು ಕೊಡದ ಮುಖ್ಯಮಂತ್ರಿ ಸಿದ್ದರಾಮಯ್ಯ ಶುಕ್ರವಾರ ಚಾಮುಂಡೇಶ್ವರಿ ಕ್ಷೇತ್ರದಿಂದ ನಾಮಪತ್ರ ಸಲ್ಲಿಸಿದ್ದು, ಅವರ ಒಟ್ಟಾರೆ ಆಸ್ತಿ 20 ಕೋಟಿ ರೂ. ಆಗಿದ್ದು, ಕಳೆದ ಬಾರಿಗಿಂತ 7 ಕೋಟಿಯಷ್ಟು ಹೆಚ್ಚಿದೆ. ಅಂದಹಾಗೆ ಸಿಎಂ ವಿರುದ್ಧ ತೊಡೆತಟ್ಟಿರುವ ಮಾಜಿ ಸಿಎಂ ಎಚ್.ಡಿ.ಕುಮಾರಸ್ವಾಮಿ ಅವರೂ ರಾಮನಗರದಿಂದ ನಾಮಪತ್ರ ಸಲ್ಲಿಸಿದ್ದು, 167.14 ಕೋಟಿ ರೂ. ಆಸ್ತಿ ಇರುವುದಾಗಿ ಘೋಷಿಸಿಕೊಂಡಿದ್ದಾರೆ.
ಇದಲ್ಲದೇ ಕಾಂಗ್ರೆಸ್, ಬಿಜೆಪಿ, ಜೆಡಿಎಸ್ ಪಕ್ಷಗಳು ಸೇರಿ ಒಟ್ಟು 552 ಅಭ್ಯರ್ಥಿಗಳು ನಾಮಪತ್ರ ಸಲ್ಲಿಸಿ ಆಸ್ತಿ ಘೋಷಣೆ ಮಾಡಿಕೊಂಡಿದ್ದಾರೆ.
ಸಿಎಂ 5 ವರ್ಷದಲ್ಲಿ ಸ್ಥಿರಾಸ್ತಿ ಖರೀದಿಸಿಲ್ಲ: ಸಿಎಂ ಸಿದ್ದರಾಮಯ್ಯ ಕಳೆದ ಐದು ವರ್ಷಗಳಲ್ಲಿ ಯಾವುದೇ ಸ್ಥಿರಾಸ್ತಿ ಖರೀದಿಸಿಲ್ಲ. ಆದರೆ ಅವರ ಸ್ಥಿರಾಸ್ತಿ 7.30 ಕೋಟಿ, ಚರಾಸ್ತಿ 3.90 ಕೋಟಿ ಹೊಂದಿದ್ದಾರೆ. ಜತೆಗೆ 2.59 ಕೋಟಿ ಸಾಲ ಇದೆ. ಪತ್ನಿ ಪಾರ್ವತಿ ಅವರ ಚರಾಸ್ತಿ 40.79 ಲಕ್ಷ ರೂ, ಸ್ಥಿರಾಸ್ತಿ 7.20 ಕೋಟಿ ರೂ. ಇದ್ದು, 2.26 ಕೋಟಿ ಸಾಲ ಹೊಂದಿದ್ದಾರೆ.
ಎಚ್ಡಿಕೆ ಆಸ್ತಿ 42.90 ಕೋಟಿ ರೂ.: ಮಾಜಿ ಸಿಎಂ ಎಚ್.ಡಿ.ಕುಮಾರಸ್ವಾಮಿ ಆಸ್ತಿ 42.90 ಕೋಟಿ ಆಗಿದ್ದು, ಕುಟುಂಬದ ಬಳಿ 167.14 ಕೋಟಿ ರೂ. ಚರಾಸ್ತಿ ಮತ್ತು ಸ್ಥಿರಾಸ್ತಿ ಇದೆ. ಎಚ್ಡಿಕೆ ಅವರ ಬಳಿ 7.80 ಕೋಟಿ ರೂ. ಚರಾಸ್ತಿ ಮತ್ತು 35.10 ಕೋಟಿ ರೂ. ಬೆಲೆ ಬಾಳುವ ಸ್ಥಿರಾಸ್ತಿ ಇದೆ. ಅನಿತಾ ಕುಮಾರಸ್ವಾಮಿ ಅವರ ಬಳಿ 94.22 ಕೋಟಿ ರೂ. ಚರಾಸ್ತಿ ಮತ್ತು ಪ್ರಸಕ್ತ ಮಾರುಕಟ್ಟೆ ಬೆಲೆಯ 30 ಕೋಟಿ ರೂ. ಸ್ಥಿರಾಸ್ತಿ ಇದೆ.
4 ಕ್ಯಾರೆಟ್ ವಜ್ರ: ಎಚ್ಡಿಕೆ ಬಳಿ 750 ಗ್ರಾಂ ಚಿನ್ನಾಭರಣ, 12.5 ಕೆಜಿ ಬೆಳ್ಳಿ ಮತ್ತು 4 ಕ್ಯಾರೆಟ್ ವಜ್ರ ಇದೆ. ಅನಿತಾ ಅವರ ಬಳಿ 2 ಕೆಜಿ 660 ಗ್ರಾಂ ಚಿನ್ನಾಭರಣ, 17 ಕೆಜಿ ಬೆಳ್ಳಿ ಮತ್ತು 30 ಕ್ಯಾರೆಟ್ ವಜ್ರವಿದೆ. ದಂಪತಿ ಬಳಿ ಒಟ್ಟು 1ಕೋಟಿ ರೂ. 17 ಲಕ್ಷ 85 ಸಾವಿರ ರೂ. ಬೆಲೆ ಬಾಳುವ ಚಿನ್ನಾಭರಣವಿದೆ.
ಜೆಡಿಎಸ್, ಕೈ ಬಾಕಿ
ಜೆಡಿಎಸ್ 24, ಕಾಂಗ್ರೆಸ್ ಐದು ಕ್ಷೇತ್ರಗಳಲ್ಲಿ ಇನ್ನೂ ಟಿಕೆಟ್ ಘೋಷಿಸಬೇಕಿದೆ. ಜೆಡಿಎಸ್ಗೆ ಕೆಲವೆಡೆ ಅಭ್ಯರ್ಥಿಗಳ ಕೊರತೆ ಇರುವುದರಿಂದ ಬಿಜೆಪಿ ಹಾಗೂ ಕಾಂಗ್ರೆಸ್ನ ಪೂರ್ಣ ಪಟ್ಟಿ ಬಿಡುಗಡೆ ಬಳಿಕ ಅತೃಪ್ತರನ್ನು ಸೆಳೆಯಲು ಕಾಯುತ್ತಿದೆ ಎಂದು ಮೂಲಗಳಿಂದ ತಿಳಿದುಬಂದಿದೆ.