ನಿಗಮ, 6 ಪ್ರಾಧಿಕಾರಗಳ ನೇಮಕ ತಡೆ: ಕುಮಾರಾದೇಶ

Team Udayavani, Jan 7, 2019, 4:48 AM IST

ಬೆಂಗಳೂರು: ಸಮ್ಮಿಶ್ರ ಸರಕಾರದಲ್ಲಿ ಸಾಕಷ್ಟು ಗೊಂದಲ ಸೃಷ್ಟಿಸಿದ್ದ ನಿಗಮ, ಮಂಡಳಿ ಅಧ್ಯಕ್ಷರನ್ನು ನೇಮಕ ಮಾಡಿ ಮುಖ್ಯಮಂತ್ರಿ ಕುಮಾರಸ್ವಾಮಿ ಆದೇಶ ಹೊರಡಿಸಿದ್ದು, 14 ನಿಗಮ, ಮಂಡಳಿ ಹಾಗೂ 8 ಸಂಸದೀಯ ಕಾರ್ಯದರ್ಶಿ ಹುದ್ದೆಗಳಿಗೆ ನೇಮಕ ಮಾಡಲಾಗಿದೆ. ಜೆಡಿಎಸ್‌ ಮತ್ತು ಕಾಂಗ್ರೆಸ್‌ ಸಚಿವರ ಖಾತೆಗಳ ಅಡಿಯಲ್ಲಿರುವ ತಲಾ 3 ನಿಗಮ-ಮಂಡಳಿ, ಪ್ರಾಧಿಕಾರಗಳ ಅಧ್ಯಕ್ಷರ ನೇಮಕ ತಡೆಹಿಡಿಯಲಾಗಿದೆ.

ಜೆಡಿಎಸ್‌ ಸಚಿವರಾದ ಎಚ್‌.ಡಿ. ರೇವಣ್ಣ ಅವರ ಖಾತೆ ಅಡಿಯಲ್ಲಿ ಬರುವ ಕರ್ನಾಟಕ ರಸ್ತೆ ಅಭಿವೃದ್ಧಿ ನಿಗಮ, ಸಾ.ರಾ. ಮಹೇಶ್‌ ಖಾತೆ ಅಡಿ ಇರುವ ರೇಷ್ಮೆ ಅಭಿವೃದ್ಧಿ ಮಂಡಳಿ, ಡಿ.ಸಿ. ತಮ್ಮಣ್ಣ ಅವರ ಸಾರಿಗೆ ಖಾತೆಯ ವ್ಯಾಪ್ತಿಗೆ ಬರುವ ಬಿಎಂಆರ್‌ಟಿಸಿ ನೇಮಕವನ್ನು ತಡೆಹಿಡಿಯಲಾಗಿದ್ದು, ಅದರೊಂದಿಗೆ ಬೆಂಗಳೂರಿನಲ್ಲಿರುವ ಪ್ರಮುಖ ಮಂಡಳಿಗಳಾದ ಮಾಲಿನ್ಯ ನಿಯಂತ್ರಣ ಮಂಡಳಿ ಮತ್ತು ಬಿಡಿಎಗಳ ನೇಮಕವನ್ನೂ ತಡೆಹಿಡಿಯುವ ಮೂಲಕ ಶಾಸಕರಾದ ಡಾ| ಸುಧಾಕರ್‌ ಮತ್ತು ಎಸ್‌.ಟಿ. ಸೋಮಶೇಖರ್‌ ಅವರಿಗೆ ಶಾಕ್‌ ನೀಡ ಲಾಗಿದೆ. ಡಾ|ಬಾಬು ಜಗಜೀವನ್‌ ರಾಮ್‌ ನಿಗಮದ ಅಧ್ಯಕ್ಷ ಸ್ಥಾನವನ್ನು ಶಾಸಕ ಪ್ರಸಾದ್‌ ಅಬ್ಬಯ್ಯ ನಿರಾಕರಿ ಸಿದ್ದರು ಎಂದು ತಿಳಿದು ಬಂದಿದೆ.

ಮುಖ್ಯಮಂತ್ರಿಯ ರಾಜಕೀಯ ಕಾರ್ಯದರ್ಶಿಯಾಗಿ ಸೂಚಿಸಲಾಗಿದ್ದ ಮೂರೂ ಹೆಸರುಗಳನ್ನು ತಡೆ ಹಿಡಿಯಲಾಗಿದೆ.
ಐವನ್‌ ಡಿ’ಸೋಜಾ ಸಹಿತ 8 ಶಾಸಕರನ್ನು ರಾಜ್ಯ ಸಂಸದೀಯ ಕಾರ್ಯದರ್ಶಿಗಳಾಗಿ ನೇಮಿಸಲಾಗಿದೆ.