CONNECT WITH US  

ಹೊರೆ ಹೊತ್ತ ಜನಸಾಮಾನ್ಯ

ಮುಖ್ಯಮಂತ್ರಿ ಕುಮಾರಸ್ವಾಮಿ ಮಂಡಿಸಿದ ಸಮ್ಮಿಶ್ರ ಸರಕಾರದ ಚೊಚ್ಚಲ ಬಜೆಟ್‌ನಲ್ಲಿ ಕೆಲವು ಹೊಸ ಕಾರ್ಯಕ್ರಮಗಳಿಗೆ ಆಗುವ ಹೆಚ್ಚುವರಿ ವೆಚ್ಚ ಭರಿಸಲು ಸಾಕಷ್ಟು ಸರ್ಕಸ್‌ ಮಾಡಲಾಗಿದೆ. ಪೆಟ್ರೋಲ್‌ ಮತ್ತು ಡೀಸೆಲ್‌, ಮದ್ಯ, ವಿದ್ಯುತ್‌ ಬಳಕೆ ಮತ್ತು ಮೋಟಾರು ವಾಹನ ಗಳ ಮೇಲೆ ಹೆಚ್ಚುವರಿ ತೆರಿಗೆ ವಿಧಿಸಿ ಹೊರೆಯ ಸ್ವಲ್ಪ ಭಾಗವನ್ನು ಜನ ಸಾಮಾನ್ಯರ ಮೇಲೆ ವರ್ಗಾಯಿಸಿದ್ದಾರೆ.

ರೈತರ ಸಾಲ ಮನ್ನಾ ಸೇರಿದಂತೆ ಪರಿಷ್ಕೃತ ಬಜೆಟ್‌ನಲ್ಲಿ ಪ್ರಕಟಿಸಿರುವ ಕೆಲವು ಹೊಸ ಕಾರ್ಯಕ್ರಮಗಳಿಗೆ ಆಗುವ ಹೆಚ್ಚುವರಿ ವೆಚ್ಚ ಭರಿಸಲು ಸಾಕಷ್ಟು ಸರ್ಕಸ್‌ ಮಾಡಿರುವ ಮುಖ್ಯಮಂತ್ರಿ ಎಚ್‌.ಡಿ. ಕುಮಾರ ಸ್ವಾಮಿ, ಪೆಟ್ರೋಲ್‌ ಮತ್ತು ಡೀಸೆಲ್‌, ಮದ್ಯ, ವಿದ್ಯುತ್‌ ಬಳಕೆ ಮತ್ತು ಮೋಟಾರು ವಾಹನ ಗಳ ಮೇಲೆ ಹೆಚ್ಚುವರಿ ತೆರಿಗೆ ವಿಧಿಸುವ ಮೂಲಕ ಹೊರೆಯ ಸ್ವಲ್ಪ ಭಾಗವನ್ನು ಜನ ಸಾಮಾನ್ಯರ ಮೇಲೆ ವರ್ಗಾಯಿಸಿದ್ದಾರೆ.

2018-19ನೇ ಸಾಲಿಗೆ ಒಟ್ಟು 2,18,488 ಕೋಟಿ ರೂ. ಮೊತ್ತದ ಬಜೆಟ್‌ ಮಂಡಿಸಿರುವ ಮುಖ್ಯಮಂತ್ರಿ ಕುಮಾರಸ್ವಾಮಿ, ಈ ಮೂಲಕ ಹಿಂದಿನ ಕಾಂಗ್ರೆಸ್‌ ಸರಕಾರದಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮಂಡಿಸಿದ್ದ 2,09,181 ಕೋಟಿ ರೂ. ಬಜೆಟ್‌ ಅನ್ನು 9307 ಕೋಟಿ ರೂ.ನಷ್ಟು ಪರಿಷ್ಕರಣೆ ಮಾಡಿದ್ದಾರೆ.

ಈ ಹೆಚ್ಚುವರಿ ಮೊತ್ತವನ್ನು ಭರಿಸಲು ಪೆಟ್ರೋಲ್‌, ಡೀಸೆಲ್‌, ಮದ್ಯ, ವಿದ್ಯುತ್‌ ಬಳಕೆ ಮತ್ತು ವಾಹನ ತೆರಿಗೆ ಹೆಚ್ಚಳದ ಮೂಲಕ ಹೆಚ್ಚುವರಿಯಾಗಿ 3177 ಕೋಟಿ ರೂ. ತೆರಿಗೆ ಸಂಗ್ರಹಿಸುವ ಗುರಿ ಹಾಕಿ ಕೊಳ್ಳಲಾಗಿದೆ. ಉಳಿದಂತೆ ಕೇಂದ್ರದ ಸಹಾಯಧನದಲ್ಲಿ 437 ಕೋಟಿ ರೂ. ಹೆಚ್ಚುವರಿ ನಿರೀಕ್ಷೆ ಮಾಡಲಾಗಿದೆ. ಉಳಿದಂತೆ ಆದಾಯ ಸಂಗ್ರಹಣೆಗೆ ಯಾವುದೇ ದಾರಿ ಆಯವ್ಯಯದಲ್ಲಿ ಕಾಣಿಸುತ್ತಿಲ್ಲ.

ರೈತರ ಸಾಲ ಮನ್ನಾ ಮತ್ತು ಸರ್ಕಾರಿ ನೌಕರರ ವೇತನ ಪರಿಷ್ಕರಣೆಯಿಂದ ಉಂಟಾ ಗಿರುವ ಆರ್ಥಿಕ ಹೊರೆಯ ನಡುವೆಯೂ ರಾಜ್ಯದ ಅಭಿವೃದ್ಧಿ ಯೋಜನೆಗಳಿಗೆ ಸಂಪನ್ಮೂಲ ಕೊರತೆ ಉಂಟಾಗದಂತೆ ಆರ್ಥಿಕ ನಿರ್ವಹಣೆ ಮಾಡಲಾಗುವುದು ಎಂದು ಹೇಳಿರುವ ಮುಖ್ಯಮಂತ್ರಿಗಳು, ಒಟ್ಟಾರೆ 2,13,734 ಕೋಟಿ ರೂ. ರಾಜಸ್ವ ಸಂಗ್ರಹಿಸುವ ಗುರಿ ಹೊಂದಿದ್ದು, ಈ ಪೈಕಿ ಸ್ವಂತ ತೆರಿಗೆ ಮೂಲಕ  106621 ಕೋಟಿ ರೂ., ತೆರಿಗೆಯೇತರ ರಾಜಸ್ವ- 8,181 ಕೋಟಿ ರೂ., ಕೇಂದ್ರದ ತೆರಿಗೆ ಪಾಲು- 36,215 ಕೋಟಿ ರೂ., ಕೇಂದ್ರದ ಸಹಾಯಧನ- 15,379 ಕೋಟಿ ರೂ. ನಿರೀಕ್ಷಿಸಲಾಗಿದೆ ಎಂದು ಹೇಳಿದ್ದಾರೆ. ಬಾಕಿ ಮೊತ್ತಕ್ಕೆ ಸಾಲ (47,134 ಕೋಟಿ ರೂ.) ಮಾಡಲಾಗುವುದು ಎಂದಿದ್ದಾರೆ.

ಅದೇ ರೀತಿ ಒಟ್ಟು 2,18,488 ಕೋಟಿ ರೂ. ವೆಚ್ಚ ಮಾಡುವುದಾಗಿ ಹೇಳಿರುವ ಅವರು, ಅದರಲ್ಲಿ ರಾಜಸ್ವ ವೆಚ್ಚ- 166,290 ಕೋಟಿ ರೂ., ಬಂಡವಾಳ ವೆಚ್ಚ- 41,063 ಕೋಟಿ ರೂ. ಹಾಗೂ ಸಾಲ ಮರುಪಾವತಿಗೆ 11,136 ಕೋಟಿ ರೂ. ತೆಗೆದಿಡಲಾಗುವುದು ಎಂದು ತಿಳಿಸಿದ್ದಾರೆ.

ಅನುದಾನ ಹೊಂದಾಣಿಕೆ: ಹಿಂದಿನ ಸಿದ್ದರಾಮಯ್ಯ ಸರಕಾರ ನಿಗದಿಪಡಿಸಿದ್ದ ಅನುದಾನದ ಪೈಕಿ ಕೆಲವು ಇಲಾಖೆಗಳಿಗೆ ನೀಡಿರುವ ಅನುದಾನ ಕಡಿತಗೊಳಿಸಿದ್ದಾರೆ. ಆದರೆ, ಇತರೆ ವೆಚ್ಚವನ್ನು 7115 ಕೋಟಿ ರೂ.ನಷ್ಟು ಹೆಚ್ಚಿಸಿದ್ದು, ಆ ಮೂಲಕ ಸಾಲ ಮನ್ನಾಕ್ಕೆ ಅನುದಾನ ಹೊಂದಿಸುವ ಪ್ರಯತ್ನ ಮಾಡಿದ್ದಾರೆ.

ಇದಲ್ಲದೆ, ದುಂದುವೆಚ್ಚಗಳಿಗೆ ಕಡಿವಾಣ ಹಾಕುವ ಬಗ್ಗೆಯೂ ಬಜೆಟ್‌ನಲ್ಲಿ ಪ್ರಸ್ತಾಪಿಸಿ ರುವ ಮುಖ್ಯಮಂತ್ರಿಗಳು, ಮುಖ್ಯಮಂತ್ರಿಗಳ ಸಚಿವಾಲಯದಿಂದಲೇ ಮಿತವ್ಯಯದ ನಡೆ ಗಳನ್ನು ಆರಂಭಿಸಿದ್ದೇನೆ. ಸಹೋದ್ಯೋಗಿ ಸಚಿ ವರೂ ಇದನ್ನು ಅನುಸರಿಸುವ ವಿಶ್ವಾಸವಿದೆ ಎನ್ನುವ ಮೂಲಕ ಅನಗತ್ಯ ವೆಚ್ಚಗಳಿಗೆ ಕತ್ತರಿ ಹಾಕುವ ಮುನ್ಸೂಚನೆ ನೀಡಿದ್ದಾರೆ.

ಮದ್ಯದ ಬೆಲೆ ವರ್ಷದಲ್ಲಿ 
ಶೇ. 12ರಷ್ಟು ಏರಿಕೆ

ಹೆಚ್ಚುವರಿ ವೆಚ್ಚಗಳಿಗೆ ಆದಾಯ ಸಂಗ್ರಹಿಸಲು ಹೆಚ್ಚಾಗಿ ಅಬಕಾರಿ ಇಲಾಖೆಯನ್ನೇ ನೆಚ್ಚಿಕೊಂಡಿರುವ ರಾಜ್ಯ ಸರಕಾರ ತನ್ನ ಪರಿಷ್ಕೃತ ಬಜೆಟ್‌ನಲ್ಲಿ ಮದ್ಯದ ವಿವಿಧ ಸ್ಲಾಬ್‌ಗಳ ಮೇಲೆ ಅಬಕಾರಿ ಸುಂಕವನ್ನು ಶೇ. 4ರಷ್ಟು ಹೆಚ್ಚಿಸಿದ್ದು, ಇದರೊಂದಿಗೆ 2018-19ನೇ ಸಾಲಿನಲ್ಲಿ ಮದ್ಯದ ಬೆಲೆ ಶೇ. 12ರಷ್ಟು ಹೆಚ್ಚಾದಂತಾಗಿದೆ. ಹಿಂದಿನ ಸರಕಾರ ಮಂಡಿಸಿದ ಬಜೆಟ್‌ನಲ್ಲಿ ಮದ್ಯದ ಮೇಲಿನ ಅಬಕಾರಿ ಸುಂಕವನ್ನು ಶೇ. 8ರಷ್ಟು ಹೆಚ್ಚಳ ಮಾಡಿತ್ತು. 

ಉದಾಹರಣೆಗೆ ಹಿಂದಿನ ಸರಕಾರ ಶೇ. 8ರಷ್ಟು ಅಬಕಾರಿ ಸುಂಕ ಹೆಚ್ಚಿಸಿದ್ದರಿಂದ 500 ರೂ. ಮೌಲ್ಯದ ಒಂದು ಬಾಟೆಲ್‌ ಮದ್ಯದ ಬೆಲೆ 540 ರೂ. ಆಗಿತ್ತು. ಇದೀಗ ಶೇ. 4ರಷ್ಟು ಸುಂಕ ಹೆಚ್ಚಿಸಿರುವುದರಿಂದ ಆ ಬಾಟೆಲ್‌ನ ಬೆಲೆ 562 ರೂ. ಆದಂತಾಗುತ್ತದೆ.

ತೆರಿಗೆ ಸಂಗ್ರಹ ಗುರಿ
ಸಿದ್ದರಾಮಯ್ಯ ಬಜೆಟ್‌ನಲ್ಲಿ 2018-19ನೇ ಸಾಲಿನಲ್ಲಿ 1,03,444 ಕೋಟಿ ರೂ. ತೆರಿಗೆ ರಾಜಸ್ವ ಸಂಗ್ರಹಿಸುವ ಗುರಿಯನ್ನು 1,06,621 ಕೋಟಿ ರೂ.ಗೆ ಪರಿಷ್ಕರಿಸಿರುವ ಕುಮಾರಸ್ವಾಮಿ ಅವರು ಅಬಕಾರಿ ತೆರಿಗೆ ಸಂಗ್ರಹ ಪ್ರಮಾಣವನ್ನು 18,750 ಕೋಟಿ ರೂ.ನಿಂದ 19,750 ಕೋಟಿ ರೂ. ಮತ್ತು ಸಾರಿಗೆ ವಿಭಾಗದಿಂದ ತೆರಿಗೆ ಸಂಗ್ರಹ ಪ್ರಮಾಣವನ್ನು 6,600 ಕೋಟಿ ರೂ.ನಿಂದ 6656 ಕೋಟಿ ರೂ.ಗೆ ಹೆಚ್ಚಿಸಿದ್ದಾರೆ. ಇವೆರಡು ಸೇರಿದಂತೆ ವಿದ್ಯುತ್‌ ಬಳಕೆ ಮೇಲಿನ ತೆರಿಗೆ ಹಾಗೂ ಪೆಟ್ರೋಲ್‌ ಮತ್ತು ಡೀಸೆಲ್‌ ತೆರಿಗೆ ಹೆಚ್ಚಳದಿಂದ ಒಟ್ಟಾರೆ  3,177 ಕೋಟಿ ರೂ. ಹೆಚ್ಚುವರಿ ತೆರಿಗೆ ಸಂಗ್ರಹಿಸುವ ಗುರಿ ಹಾಕಿಕೊಂಡಿದ್ದಾರೆ.

ಸಂಪನ್ಮೂಲ ಸೃಷ್ಟಿ
ಕುಮಾರಸ್ವಾಮಿ ಮಂಡಿಸಿದ ಬಜೆಟ್‌ನಲ್ಲಿ 2018-19ನೇ ಸಾಲಿನ ರಾಜ್ಯದ ಒಟ್ಟು ಸ್ವಂತ ತೆರಿಗೆ ರಾಜಸ್ವ 2017-18 ನೇ ಸಾಲಿನ ಪರಿಷ್ಕೃತ ಅಂದಾಜು ಮೀರಿ ಶೇ. 16.25ರ ಹೆಚ್ಚಳದೊಂದಿಗೆ 1,06,621 ಕೋಟಿ ರೂ. ಆಗುತ್ತದೆ ಎಂದು ಹೇಳಲಾಗಿದೆ. ಸಿದ್ದರಾಮಯ್ಯ ಮಂಡಿಸಿದ ಬಜೆಟ್‌ನಲ್ಲಿ ಈ ಪ್ರಮಾಣ ಮೀರಿ ಶೇ.12.78 ರ ಹೆಚ್ಚಳದೊಂದಿಗೆ 1,03,444 ಕೋಟಿ ರೂ. ಆಗುತ್ತದೆ ಎಂದು ತಿಳಿಸಲಾಗಿತ್ತು. ಆದರೆ, ರಾಜ್ಯದ ಒಡೆತನದ ವಿವಿಧ ಮಂಡಗಳಿಗಳು, ನಿಗಮಗಳು ಮತ್ತು ಸ್ಥಳೀಯ ಸಂಸ್ಥೆಗಳ ಆಂತರಿಕ ಸಂಪನ್ಮೂಲ ಸೃಜನೆ ಮೂಲಕ ಹಾಗೂ ತಮ್ಮ ಹಣಕಾಸು ಸಾಮರ್ಥ್ಯ ಮತ್ತು ಸ್ವಂತ ರಾಜಸ್ವಗಳ ಆಧಾರದ ಮೇಲೆ ಮಾಡಿದ ಸಾಲಗಳ ಮೂಲಕ 16,760 ಕೋಟಿ ರೂ. ಗಳನ್ನು ಕ್ರೋಢೀಕರಿಸಲಾಗುವುದು ಎಂಬ ಸಿದ್ದರಾಮಯ್ಯ ಬಜೆಟ್‌ನಲ್ಲಿದ್ದ ಮೊತ್ತದಲ್ಲಿ ಯಾವುದೇ ಪರಿಷ್ಕರಣೆ ಮಾಡಿಲ್ಲ.

Trending videos

Back to Top