ಲಂಬೋದರನ ವೇದಿಕೆಯಲ್ಲಿ ಯೋಗಿ ಕನಸು

Team Udayavani, Jan 11, 2019, 12:30 AM IST

“ನನ್ನ ಕೆರಿಯರ್‌ನಲ್ಲಿ ಇದು ಕಂಬ್ಯಾಕ್‌ ಸಿನಿಮಾ…’
– ಹೀಗೆ ಹೇಳುತ್ತಲೇ, “ಈ ಚಿತ್ರ ನನಗಷ್ಟೇ ಅಲ್ಲ, ಸಿನಿಮಾದಲ್ಲಿ ಕೆಲಸ ಮಾಡಿದ ಪ್ರತಿಯೊಬ್ಬರಿಗೂ ಗೆಲುವು ಕೊಡುತ್ತೆ ಎಂಬ ನಂಬಿಕೆ ನನಗಿದೆ’ ಎಂದು ನಟ ಯೋಗಿ ಹೇಳುತ್ತಾ ಹೋದರು. ಅವರು ಹೇಳಿದ್ದು “ಲಂಬೋದರ’ ಚಿತ್ರದ ಬಗ್ಗೆ. ಈ ವಾರ ರಾಜ್ಯಾದ್ಯಂತ ಚಿತ್ರ ತೆರೆಗೆ ಬರುತ್ತಿದೆ. ಚಿತ್ರತಂಡದ ಜೊತೆ ಆಗಮಿಸಿದ್ದ ಯೋಗಿ ತಮ್ಮ ಪಾತ್ರ ಕುರಿತು ಹೇಳಿಕೊಂಡರು. “ಇದುವರೆಗೆ ಸಾಕಷ್ಟು ಚಿತ್ರಗಳಲ್ಲಿ ಹಲವು ಪಾತ್ರ ನಿರ್ವಹಿಸಿದ್ದೇನೆ. ಇಲ್ಲಿ ವಿಶೇಷ ಪಾತ್ರ ಮಾಡಿದ್ದು ಖುಷಿ ಕೊಟ್ಟಿದೆ. ಇದೊಂದು ಮನರಂಜನಾತ್ಮಕ ಚಿತ್ರ. ನಗಿಸುವ ಪಾತ್ರ ತುಂಬ ಕಷ್ಟ. ಇಲ್ಲಿ ಕಲಿತುಕೊಳ್ಳಲು ಸಾಕಷ್ಟು ವಿಷಯಗಳಿತ್ತು. ನಿರ್ದೇಶಕ ಕೃಷ್ಣರಾಜ್‌ ಜೊತೆ ಹೊಸ ಅನುಭವ ಆಯ್ತು. ಅವರಿಗೆ ಏನೆಲ್ಲಾ ಬೇಕೋ ಅದು ಬರುವವರೆಗೂ ಬಿಡುತ್ತಿರಲಿಲ್ಲ. ಡೈಲಾಗ್‌ ಡೆಲಿವರಿ ವಿಷಯದಲ್ಲಂತೂ ಹೊಸತನ ತುಂಬಿದೆ. ಒಂದು ವರ್ಷದ ಬಳಿಕ ನನ್ನ ಚಿತ್ರ ಬಿಡುಗಡೆಯಾಗುತ್ತಿದೆ. ಎರಡು ಗಂಟೆ ಕುಳಿತು ಚಿತ್ರ ನೋಡುವ ಜನರಿಗೆ ಎಲ್ಲೂ ಮೋಸ ಆಗಲ್ಲ. ಇಲ್ಲಿ ಹಾಸ್ಯದ ಜೊತೆ ಸಂಬಂಧಗಳ ಮೌಲ್ಯ ಕುರಿತ ವಿಷಯಗಳೂ ಇವೆ. ಈಗಾಗಲೇ ಟ್ರೇಲರ್‌ಗೆ ಒಳ್ಳೆಯ ಮೆಚ್ಚುಗೆ ಸಿಕ್ಕಿದೆ. “ಲಂಬೋದರ’ ನನ್ನ ಕೆರಿಯರ್‌ನಲ್ಲಿ ವಿಶೇಷ ಚಿತ್ರವೂ ಹೌದು, ಕಂಬ್ಯಾಕ್‌ ಚಿತ್ರವೂ ಹೌದು’ ಎನ್ನಲು ಮರೆಯಲಿಲ್ಲ ಯೋಗಿ.

ನಿರ್ದೇಶಕ ಕೃಷ್ಣರಾಜ್‌ಗೆ ಚಿತ್ರ ಬಿಡುಗಡೆಯಾಗುತ್ತಿರುವುದಕ್ಕೆ ಖುಷಿಯಾಗಿದೆಯಂತೆ. ಈಗಾಗಲೇ ಟ್ರೇಲರ್‌ಗೆ ಸಿಕ್ಕ ಮೆಚ್ಚುಗೆ ಅವರಿಗೆ ಮತ್ತಷ್ಟು ಧೈರ್ಯ ಹೆಚ್ಚಿಸಿದೆಯಂತೆ. “ಇಲ್ಲಿ ಹಾಸ್ಯದ ಜೊತೆ ಫ್ಯಾಮಿಲಿ ಸೆಂಟಿಮೆಂಟ್‌ ಕೂಡ ಇದೆ. ಯೋಗಿ ಅವರಿಗೆ ಮಾಸ್‌ ಫೀಲ್‌ ಇದೆ. ಆದರೆ, “ಲಂಬೋದರ’ ಹೊಸ ಫೀಲ್‌ ಕೊಡುವ ಚಿತ್ರವಾಗಲಿದೆ. ಇಲ್ಲಿ ಎಲ್ಲಾ ಪ್ಯಾಕೇಜ್‌ ಕೂಡ ಇದೆ. ಸ್ಕೂಲ್‌ ಎಪಿಸೋಡ್‌ನಿಂದ ಹಿಡಿದು, ಕಾಲೇಜ್‌, ಲವ್‌ ಆಗುವ ತನಕದ ವಿಷಯ ಇಲ್ಲಿದೆ. ಸುಮಾರು 150 ಕ್ಕೂ ಹೆಚ್ಚು ಚಿತ್ರಮಂದಿರದಲ್ಲಿ ಬಿಡುಗಡೆ ಮಾಡಲು ಯೋಚಿಸಿದ್ದೇವೆ’ ಅಂದರು ನಿರ್ದೇಶಕರು.

ಅರುಣಾ ಬಾಲರಾಜ್‌ ಅವರಿಲ್ಲಿ ಅಮ್ಮನ ಪಾತ್ರ ಮಾಡಿದ್ದಾರಂತೆ. ಅವರೇ ಹೇಳುವಂತೆ, “ಅಮ್ಮನ ಪಾತ್ರ ಇಲ್ಲಿದ್ದರೂ ಅದು ಮಾಮೂಲು ಪಾತ್ರವಂತೂ ಅಲ್ಲ. ಸಂಬಂಧಗಳ ಮೌಲ್ಯಕ್ಕೆ ಹೆಚ್ಚು ಒತ್ತು ಕೊಡಲಾಗಿದೆ. ನಿರ್ದೇಶಕ ಮತ್ತು ಅವರ ತಂಡದ ಶ್ರಮದಿಂದ ಒಳ್ಳೆಯ ಚಿತ್ರವಾಗಿದೆ. ಯೋಗಿಗೆ ಇಲ್ಲಿ ಪೊರಕೆ ಏಟು ಜಾಸ್ತಿ ಬಿದ್ದಿದೆ ಎನ್ನುತ್ತಲೇ ಹಾಗೊಂದು ನಗು ಹೊರಹಾಕಿ ಸುಮ್ಮನಾದರು ಅರುಣಾ ಬಾಲರಾಜ್‌.

ನಿರ್ಮಾಪಕ ರಾಘವೇಂದ್ರ ಭಟ್‌ಗೆ ಚಿತ್ರ ಚೆನ್ನಾಗಿ ಮೂಡಿಬಂದ ತೃಪ್ತಿ ಇದೆಯಂತೆ. ಕನ್ನಡಿಗರು ಒಳ್ಳೆಯ ಚಿತ್ರವನ್ನು ಕೈ ಬಿಡುವುದಿಲ್ಲ ಎಂಬ ನಂಬಿಕೆಯಲ್ಲೇ ಅತೀ ಹೆಚ್ಚು ಚಿತ್ರಮಂದಿರಗಳಲ್ಲಿ ಚಿತ್ರ ಬಿಡುಗಡೆ ಮಾಡುತ್ತಿರುವುದಾಗಿ ಹೇಳಿಕೊಂಡರು. ಹಾಸ್ಯ ಕಲಾವಿದ ಧರ್ಮಣ್ಣ, ಸಿದ್ದು ತಮ್ಮ ತಮ್ಮ ಪಾತ್ರಗಳ ಕುರಿತು ವಿವರ ಕೊಟ್ಟರು.