ಆಹಾ ಇಲಿಯ ಮದುವೆಯಂತೆ!
Team Udayavani, Mar 21, 2019, 12:30 AM IST
ಆರ್ಥಿಕ ಪರಿಸ್ಥಿತಿ ಹದಗೆಟ್ಟರೂ, ಹವಾಮಾನ ವೈಪರೀತ್ಯ ಉಂಟಾದರೂ ಜನಜೀವನ ಪರಿಸ್ಥಿತಿ ಅಸ್ತವ್ಯಸ್ತಗೊಳ್ಳಬಹುದು. ಅಂಗಡಿ, ಆಸ್ಪತ್ರೆ, ಕಚೇರಿಗಳು ಸರಿಯಾಗಿ ತೆರೆಯದೇ ಇರಬಹುದು. ಶಾಲೆಗಳಿಗೆ ರಜೆ ಘೋಷಿಸಬಹುದು. ಆದರೆ ಎಂಥ ಸಂದರ್ಭದಲ್ಲೂ ಮುಚ್ಚದೆ ನಡೆದುಕೊಂಡುಹೋಗುವ ವ್ಯವಹಾರವೆಂದರೆ ಮದುವೆಯದು. ವರ್ಷಪೂರ್ತಿ ನಡೆಯುತ್ತಲೇ ಇರುತ್ತದೆ. ಎಲ್ಲಾದರೂ ಇಲಿಗಳಲ್ಲಿ ಮದುವೆಯಾಗುವ ಪದ್ಧತಿ ಏನಾದರೂ ಇದ್ದರೆ ದಿನಕ್ಕೆ ಸಾವಿರಾರು ಮದುವೆಗಳು ನಡೆಯುತ್ತಿದ್ದವು. ಅದೇಕೆ ಅಂತೀರಾ? ನಮ್ಮಲ್ಲಿ ವಯಸ್ಸಿಗೆ ಬಂದ ಹುಡುಗ ಹುಡುಗಿಯನ್ನು ಮದುವೆ ಮಾಡುತ್ತಾರಲ್ಲ, ಅದೇ ರೀತಿ ವಯಸ್ಸಿಗೆ ಬಂದ ಇಲಿಗಳ ನಡುವೆ ಮದುವೆ ಮಾಡುವುದೇ ಆದರೆ ಇಲಿಗಳಿಗೆ 3- 4 ತಿಂಗಳಾಗುತ್ತಲೇ ಮದುವೆ ಮಾಡಬೇಕಾಗಿ ಬರುತ್ತದೆ. ಅಯ್ಯೋ ನಮ್ಮಲ್ಲಿ 20 ವರ್ಷ ದಾಟಿರುತ್ತದೆ ಇಲಿಗಳಿಗ್ಯಾಕೆ ಅಷ್ಟು ಬೇಗ ಮದುವೆ ಎನ್ನಲಾಗುವುದಿಲ್ಲ, ಏಕೆಂದರೆ ಅವುಗಳ ಜೀವಿತಾವಧಿಯೇ ಕಡಿಮೆ ಎನ್ನುವುದನ್ನು ಮರೆಯಬಾರದು. ಅಲ್ಲದೆ ಇಲಿಗಳಿಗೆ 3- 4 ತಿಂಗಳಾಗುತ್ತಲೇ ಸಂತಾನೋತ್ಪತ್ತಿ ಮಾಡುವ ಸಾಮರ್ಥ್ಯವನ್ನು ಹೊಂದುತ್ತವೆ.
ದಕ್ಷಿಣ ಆಫ್ರಿಕಾದಲ್ಲಿ ಟ್ರೋಫಿ ಹಂಟರ್ಗಳು!
ಮನುಷ್ಯನಿಂದ ಜೀವ ವೈವಿಧ್ಯ ಮತ್ತು ಪ್ರಕೃತಿ ಎಂಥೆಂಥ ಸವಾಲುಗಳನ್ನು ಎದುರಿಸಬೇಕಾಗಿ ಬರುತ್ತಿದೆ ಎಂಬುದರ ಕುರಿತು ಹೆಚ್ಚೇನೂ ಹೇಳಬೇಕಿಲ್ಲ. ಇಲ್ಲಿ ಹೇಳಲು ಹೊರಟಿರುವ ಸುದ್ದಿ ತಿಳಿದು ಅಚ್ಚರಿ, ಕೋಪ ಎಲ್ಲವೂ ಏಕಕಾಲಕ್ಕೆ ಉಂಟಾದರೆ ಅದರಲ್ಲಿ ಅತಿಶಯೋಕ್ತಿಯಿಲ್ಲ. ದಕ್ಷಿಣ ಆಪ್ರಿಕಾದಲ್ಲಿ ಸಿಂಹಗಳನ್ನು ಹೆಚ್ಚಿನ ಸಂಖ್ಯೆಯಲ್ಲಿ ಬೆಳೆಸಲಾಗುತ್ತಿದೆ. ಇದರಲ್ಲಿ ಕೃತ್ರಿಮ ಯೋಚನೆ ಏನೂ ಕಾಣುವುದಿಲ್ಲ. ಆದರೆ ಈ ಸಿಂಹಗಳನ್ನು ಬೆಳೆಸುತ್ತಿರುವುದು ಬೇಟೆಯಾಡಲು ಎನ್ನುವ ಸಂಗತಿ ಆತಂಕಕಾರಿಯಾದುದು. ಮೋಜಿಗಾಗಿ, ತಮ್ಮ ಪ್ರತಿಷ್ಠೆಯನ್ನು ಹೆಚ್ಚಿಸಿಕೊಳ್ಳುವುದಕ್ಕಾಗಿ ಬೇಟೆಯಾಡುವವರನ್ನು “ಟ್ರೋಫಿ ಹಂಟರ್’ ಎಂದು ಕರೆಯುತ್ತಾರೆ. ದಕ್ಷಿಣ ಆಪ್ರಿಕಾದಲ್ಲಿ ಸಿಂಹಗಳನ್ನು ಬೇಟೆಗಾಗಿ ಸಾಕುತ್ತಿರುವುದರಿಂದ ಜಗತ್ತಿನ ಅನೇಕ ಮಂದಿ ಟ್ರೋಫಿ ಹಂಟರ್ಗಳು ಅದರತ್ತ ಆಕರ್ಷಿತರಾಗುತ್ತಿದ್ದಾರೆ. ಶಾಟ್ ಗನ್, ಹ್ಯಾಂಡ್ ಗನ್, ಸಿಂಹ ಬೇಟೆಗಾಗಿ ಬಳಕೆಯಾಗುತ್ತಿರುವ ಆಯುಧಗಳು. ಇದಲ್ಲದೆ ಕೆಲ ಮಂದಿ ಕ್ರಾಸ್ ಬೋ(ಬಿಲ್ಲು ಬಾಣ) ಬಳಸಿಯೂ ಸಿಂಹಗಳನ್ನು ಬೇಟೆಯಾಡುತ್ತಾರಂತೆ. ಆದಿಮಾನವನಿಂದ ಬಹಳ ದೂರ ಸಾಗಿ ಬಂದಿರುವ ನಾವು ಇಂದಿಗೂ ಮೃಗೀಯ ಪ್ರವೃತ್ತಿಯನ್ನು ಬಿಟ್ಟಿಲ್ಲ ಎನ್ನುವುದು ಇಂಥ ಘಟನೆಗಳಿಂದ ಸಾಬೀತಾಗುತ್ತದೆ.
– ಹರ್ಷವರ್ಧನ್ ಸುಳ್ಯ