CONNECT WITH US  

ಫೆಬ್ರವರಿಯಿಂದ ಕದ್ರಿ ವೃತ್ತದಲ್ಲಿ ಸಿಗ್ನಲ್‌ ವ್ಯವಸ್ಥೆ

ಕುಡ್ಲ: ದಿನದಿಂದ ದಿನಕ್ಕೆ ಹದಗೆಡುತ್ತಿರುವ ಸಂಚಾರ ವ್ಯವಸ್ಥೆಯನ್ನು ಸುಸ್ಥಿತಿಗೆ ತರಲು ಸಂಚಾರ ಪೊಲೀಸರು ಕೆಲವು ಕ್ರಮಗಳನ್ನು ಕೈಗೊಳ್ಳುತ್ತಿದ್ದು, ಪ್ರಮುಖ ವೃತ್ತಗಳಲ್ಲೊಂದಾದ ಕದ್ರಿ ಕೆಪಿಟಿ ವೃತ್ತಕ್ಕೆ ಸಿಗ್ನಲ್‌ ಅಳವಡಿಸಲು ನಗರ ಪೊಲೀಸ್‌ ಕಮಿಷನರೆಟ್‌ ಮುಂದಾಗಿದೆ. ದಿನದ 24 ಗಂಟೆಯೂ ವಾಹನ ದಟ್ಟಣೆಯನ್ನು ಹೊಂದಿರುವ ಹೊಂದಿರುವ ರಾಷ್ಟ್ರೀಯ ಹೆದ್ದಾರಿ ಮತ್ತು ವಿಮಾನ ನಿಲ್ದಾಣ ರಸ್ತೆಗೆ ಸಿಗ್ನಲ್‌ ಅಳವಡಿಸಲು ಪೊಲೀಸ್‌ ಇಲಾಖೆ ತಯಾರಿ ನಡೆಸಿದೆ. ಇಲ್ಲಿನ ವೃತ್ತವನ್ನು ತೆರವುಗೊಳಿಸಿ ಫ್ಲೈ ಓವರ್‌ ಅಥವಾ ಅಂಡರ್‌ ಪಾಸ್‌ ವ್ಯವಸ್ಥೆಯನ್ನು ಕಲ್ಪಿಸುವಂತೆ ನಗರ ಪೊಲೀಸರು ಹಲವು ಸಮಯಗಳಿಂದ ರಾಷ್ಟ್ರೀಯ ಹೆದ್ದಾರಿ ಇಲಾಖೆಗೆ ಬೇಡಿಕೆ ಸಲ್ಲಿಸಿದ್ದರು. ಆದರೆ ಇಲಾಖೆಯಿಂದ ಯಾವುದೇ ಪೂರಕ ಪ್ರತಿಕ್ರಿಯೆ ಸಿಗದ ಕಾರಣ ಪೊಲೀಸ್‌ ಇಲಾಖೆಯೇ ಈ ಕ್ರಮಕ್ಕೆ ಮುಂದಾಗಿದೆ.

ಸಿಗ್ನಲ್‌ ಅಳವಡಿಕೆಗಾಗಿ ಈಗಾಗಲೇ ಕಂಬ ಅಳವಡಿಸುವ ಹಾಗೂ ವಿದ್ಯುತ್‌ ಸಂಪರ್ಕ ಕಲ್ಪಿಸುವ ಕೇಬಲ್‌ಗ‌ಳ ವ್ಯವಸ್ಥೆ ಮಾಡಲಾಗಿದೆ. ತಿಂಗಳಾಂತ್ಯಕ್ಕೆ ಪ್ರಾಯೋಗಿಕವಾಗಿ ಸಿಗ್ನಲ್‌ ಅನುಷ್ಠಾನಗೊಳಿಸಲಾಗುತ್ತಿದೆ. ಬಳಿಕ ಅದನ್ನು ಪೂರ್ಣ ಪ್ರಮಾಣದಲ್ಲಿ ಜಾರಿಗೆ ತರುವುದು ಪೊಲೀಸರ ಉದ್ದೇಶ. ಈ ಬಗ್ಗೆ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಅಧಿಕಾರಿಗಳು, ನಗರ ಸಂಚಾರಿ ಪೊಲೀಸ್‌ ಅಧಿಕಾರಿಗಳು ಹಾಗೂ ಸಿಗ್ನಲ್‌ ಲೈಟ್‌ ಅನುಷ್ಠಾನದ ಗುತ್ತಿಗೆ ಪಡೆದ ಕಂಪೆನಿ ಅಧಿಕಾರಿಗಳ ಚರ್ಚೆ ಪ್ರಗತಿಯಲ್ಲಿದೆ. ಹೆದ್ದಾರಿಯಲ್ಲಿ ಸಿಗ್ನಲ್‌ ಅಳವಡಿಕೆಯಿಂದ ಸಂಚಾರ ದಟ್ಟಣೆ ನಿಯಂತ್ರಿಸಬಹುದಲ್ಲದೇ, ಒಂದೊಂದು ವೃತ್ತಕ್ಕೆ ನಾಲ್ಕೈದು ಸಿಬಂದಿಯನ್ನು ನಿಯೋಜಿಸುವುದು ತಪ್ಪುತ್ತದೆ. ಇದರಿಂದ ಸಿಬಂದಿ ನಿರ್ವಹಣೆ ಸುಧಾರಿಸೀತು ಎಂಬುದು ಪೊಲೀಸರ ಲೆಕ್ಕಾಚಾರ.

ಕೆಲಸ ಮಾಡುತ್ತಿಲ್ಲ ನಗರದ ಬಹುತೇಕ ಸಿಗ್ನಲ್‌
ನಗರದ ಕೆಲವೆಡೆ ಲಕ್ಷಾಂತರ ರೂಪಾಯಿ ಖರ್ಚು ಮಾಡಿ ಹೊಸದಾಗಿ ಸಿಗ್ನಲ್‌ ವ್ಯವಸ್ಥೆ ಮಾಡಿದರೆ ಇನ್ನೂ ಕೆಲವೆಡೆ ಸಿಗ್ನಲ್‌ ಗಳನ್ನು ಮೇಲ್ದರ್ಜೆಗೇರಿಸಲಾಗಿತ್ತು. ಆದರೆ ಈಗ ಲಾಲ್‌ಬಾಗ್‌ ಮತ್ತು ಪಿವಿಎಸ್‌ ಹೊರತುಪಡಿಸಿ ಬಹುತೇಕ ಸಿಗ್ನಲ್‌ಗ‌ಳು  ಮೂಲೆ ಸೇರಿದೆ. 

ಪ್ರಾಯೋಗಿಕವಾಗಿ ಸಿಗ್ನಲ್‌ ಆರಂಭ
ಕದ್ರಿ ಕೆಪಿಟಿ ವೃತ್ತದಲ್ಲಿ ರಾಷ್ಟ್ರೀಯ ಹೆದ್ದಾರಿ ಇಲಾಖೆ ಯಾವುದೇ ಪರ್ಯಾಯ ವ್ಯವಸ್ಥೆ ಕಲ್ಪಿಸದೇ ಇರುವ ಕಾರಣ ನಗರ ಪೊಲೀಸ್‌ ಇಲಾಖೆ ವತಿಯಿಂದಲೇ ಕದ್ರಿ ವೃತ್ತದಲ್ಲಿ ಸಿಗ್ನಲ್‌ ಅಳವಡಿಸಲು ನಿರ್ಧರಿಸಿದ್ದೇವೆ. ಬಹುತೇಕ ತಿಂಗಳ ಅಂತ್ಯಕ್ಕೆ ಸಿಗ್ನಲ್‌ ವ್ಯವಸ್ಥೆ ಪ್ರಾಯೋಗಿಕವಾಗಿ ಕಾರ್ಯಾರಂಭ ಮಾಡಲಿದೆ. ಮುಂದೆ ಇದರ ಪರಿಣಾಮವನ್ನು ನೋಡಿಕೊಂಡು ಮುಂದುವರಿಯಲಾಗುತ್ತದೆ. 
- ಡಾ| ಎಂ.ಸಂಜೀವ ಪಾಟೀಲ್‌, ಮಂಗಳೂರು ಸಂಚಾರಿ ವಿಭಾಗದ ಡಿಸಿಪಿ

ಇಂದು ಹೆಚ್ಚು ಓದಿದ್ದು

Trending videos

Back to Top