Health Tips: ದಿನಕ್ಕೆರಡು ಖರ್ಜೂರ ಸೇವಿಸಿ ಆರೋಗ್ಯವಂತರಾಗಿ

Team Udayavani, Feb 18, 2017, 1:35 PM IST

ದಿನಕ್ಕೊಂದು ಸೇಬು ತಿನ್ನಲಾಗದೇ ಇದ್ದವರು ದಿನಕ್ಕೆರಡು ಖರ್ಜೂರ ತಿಂದು ಆರೋಗ್ಯವನ್ನು ಉತ್ತಮಗೊಳಿಸಬಹುದು. ಆದರೆ, ಹಿತಮಿತವಾದ ಸೇವನೆಯಿಂದ ಮಾತ್ರ ಉತ್ತಮ ಫ‌ಲಿತಾಂಶ ಪಡೆಯಲು ಸಾಧ್ಯ ಎಂಬುದನ್ನು ಮರೆಯದಿರಿ. 

ನಿತ್ಯವೂ ಎರಡು ಖರ್ಜೂರ ಸೇವಿಸುವುದರಿಂದ ಹೃದಯ ಸ್ತಂಭನದ ಸಾಧ್ಯತೆಯನ್ನು ಶೇ. 30ರಷ್ಟು ಕಡಿಮೆಗೊಳಿಸಬಹುದು ಎಂಬುದು ಸಂಶೋಧನೆಯೊಂದು ದೃಢಪಡಿಸಿದೆ. ರಾತ್ರಿಯಿಡಿ ತಣ್ಣೀರಿನಲ್ಲಿ ನೆನೆಸಿಟ್ಟು ಮರುದಿನ ತಿನ್ನುವುದರಿಂದ ಹೃದಯದ ಕ್ಷಮತೆ ಉತ್ತಮಗೊಳ್ಳುತ್ತದೆ. ಖರ್ಜೂರದಲ್ಲಿರುವ ನಾರಿನಂಶ ಜೀರ್ಣಕ್ರಿಯೆಯನ್ನು ಉತ್ತಮಗೊಳಿಸಿ, ಮಲಬದ್ಧತೆಯನ್ನು ನಿವಾರಿಸುತ್ತದೆ. 

ಇದರಲ್ಲಿ ಮೆಗ್ನೀಶಿಯಂ ಅಂಶವಿರುವುದರಿಂದ ಅಧಿಕ ರಕ್ತದೊತ್ತಡ ನಿಯಂತ್ರಣಕ್ಕೂ ಖರ್ಜೂರ ಸಹಕಾರಿ. ಖರ್ಜೂರದಲ್ಲಿರುವ ಗಂಧಕ ಮೆದುಳಿನ ಕ್ಷಮತೆಯನ್ನು ಹೆಚ್ಚಿಸುತ್ತದೆ. ಕಬ್ಬಿಣದಂಶ ಹೇರಳವಾಗಿರುವುದರಿಂದ ರಕ್ತಹೀನತೆಯಾಗದಂತೆ ತಡೆಯುತ್ತದೆ. ನಿಯಮಿತವಾದ ಖರ್ಜೂರ ಸೇವನೆಯಿಂದ ಆಮಶಂಕೆ ತೊಂದರೆಯನ್ನು ನಿವಾರಿಸಬಹುದಾಗಿದೆ.