CONNECT WITH US  

ಶಾಲೆ ಮೆಟ್ಟಿಲು ಹತ್ತದ ಎಂಜಿನಿಯರ್‌ ಸಂಕಪ್ಪಣ್ಣ !

ತಾವೇ ಆವಿಷ್ಕರಿಸಿದ ಬೊಂಡ ಕೆತ್ತುವ ಯಂತ್ರದೊಂದಿಗೆ ಸಂಕಪ್ಪ. 

ಉಡುಪಿ: ಎಂಜಿನಿಯರಿಂಗ್‌ ತಲೆ ಎಂಜಿನಿಯರಿಂಗ್‌ ಪದವಿ ಓದದವರಿಗೂ ಇರಬಹುದು, ಎಂಜಿನಿಯರಿಂಗ್‌ ಓದಿಯೂ ಎಂಜಿನಿಯರಿಂಗ್‌ ತಲೆ ಇಲ್ಲದೆ ಇರಬಹುದು. ಆದರೆ ಶಾಲೆಯ ಮೆಟ್ಟಿಲನ್ನೇ ಹತ್ತದವರಿಗೆ ಎಂಜಿನಿಯರಿಂಗ್‌ ತಲೆ ಇರಬಹುದೆ? "ಇರಬಹುದು' ಎನ್ನುವುದು ತಪ್ಪಾಗುತ್ತದೆ. ಕಾರ್ಕಳ ತಾಲೂಕು ಬಜಗೋಳಿ ಮಾಳ ಹುಕ್ರಟ್ಟೆ ಕ್ರಾಸ್‌ನಲ್ಲಿ ಗೂಡಂಗಡಿ ನಡೆಸುವ ಸಂಕಪ್ಪರಿಗೆ ಇದೆ. ದಾಖಲೆ ಪ್ರಕಾರ ಇವರ ಹೆಸರು ಕೃಷ್ಣ ಕುಂದರ್‌. ಆಪ್ತರಿಗೆ ಇವರು ಸಂಕಪ್ಪಣ್ಣ.  
ಇವರು ಬಾಲ್ಯದಲ್ಲಿ ಶಾಲೆಯ ಮೆಟ್ಟಿಲು ಹತ್ತಿದವರಲ್ಲ. ಜೀವನೋಪಾಯಕ್ಕೆ ಮುಂಬೈಗೆ ಹೋದವರು. ಅಲ್ಲಿ ಆಟೋ ರಿಕ್ಷಾ ಚಾಲಕರ ಕೆಲಸ ಮಾಡುತ್ತಿದ್ದರು. ಅನಂತರ ಊರಿಗೆ ಬಂದು ಗೂಡಂಗಡಿ ತೆಗೆದರು. ಇವರು ಮುಂಬೈಯಲ್ಲಿ ಸುಮಾರು 20 ವರ್ಷಗಳ ಹಿಂದೆ ಕಂಡ ಒಂದು ಯಂತ್ರಕ್ಕೆ ಸ್ವಲ್ಪ ಬದಲಾವಣೆಗಳನ್ನು ಮಾಡಿ ಬೊಂಡ (ಎಳನೀರು) ಕೆತ್ತುವ ಯಂತ್ರವನ್ನು ಆವಿಷ್ಕರಿಸಿದರು. ಈ ಯಂತ್ರದಿಂದ ಸುಲಭವಾಗಿ ಬೊಂಡ ಕೆತ್ತಬಹುದು. ಎಷ್ಟೇ ಬಲಿತ ಬೊಂಡ ವಾದರೂ ಈ ಯಂತ್ರಕ್ಕೆ ಬಗ್ಗುತ್ತದೆ. ಬೊಂಡ ವನ್ನು ಮಧ್ಯೆ ಎರಡು ಹೋಳಾಗಿ ಮಾಡಲು ಆಗುತ್ತದೆ. ಬೊಂಡ ಕೆತ್ತುವ ಕೆಲಸ ಆಗುವುದು ಸ್ಪ್ರಿಂಗ್‌ ಆ್ಯಕ್ಷನ್‌ ನಿಂದ. ಬೊಂಡ ತೂತು ಮಾಡಲೂ ಡ್ರಿಲ್‌ ಒಂದು ಇದೆ. 

ಹಿರಿಯಡಕ ಕೊಂಡಾಡಿಯಲ್ಲಿ ಶೇಖರ್‌ ಅವರು ಏಳು ತಿಂಗಳಿಂದ ಯಂತ್ರ ವನ್ನು ಅಂಗಡಿಯಲ್ಲಿ ಅಳವಡಿ ಸಿದ್ದಾರೆ. ಅವರ ಪ್ರಕಾರ ಬೊಂಡ ಕೆತ್ತಲು ಇದು ತುಂಬ ಸುಲಭವಾಗುತ್ತದೆ.  ಧರ್ಮಸ್ಥಳದ ಅಣ್ಣಪ್ಪ ಬೆಟ್ಟದ ಎದುರಿನ ಬೊಂಡದ ಅಂಗಡಿ, ಶೃಂಗೇರಿ ಬಸ್‌ ನಿಲ್ದಾಣದ ಬಳಿ, ಮೂಡ ಬಿದಿರೆ, ಸುರತ್ಕಲ್‌ ಬಳಿಯ ಅಂಗಡಿ ಯಲ್ಲಿ ಈ ಯಂತ್ರಗಳಿವೆ. ಬಜಗೋಳಿಯಲ್ಲಿಯೇ ಮೂರು ಯಂತ್ರ ಗಳಿವೆ. ಸಂಕಪ್ಪ ಅವರು ತಮ್ಮ ಅಂಗಡಿ ಯಲ್ಲಿಯೂ ಒಂದು ಯಂತ್ರ ವನ್ನು ಇರಿಸಿಕೊಂಡಿದ್ದಾರೆ. ಉಜಿರೆ ಎಂಜಿನಿಯರಿಂಗ್‌ ಕಾಲೇಜಿನವರು ಒಂದು ಯಂತ್ರವನ್ನು ಖರೀದಿಸಿದ್ದಾರೆ. ಶಂಕರಪುರ- ಎರ್ಮಾಳು ದೇವ ಸ್ಥಾನ ಗಳಲ್ಲಿ ಸೇವಾರೂಪವಾಗಿ ದಾನಿಗಳು ಕೊಟ್ಟಿದ್ದಾರೆ. ಬೆಂಗಳೂರಿನ ಕೆಲವರು ಬಂದು ನೋಡಿಹೋಗಿದ್ದಾರೆ. 

ಸಂಕಪ್ಪ ಅವರು ಕಬ್ಬಿಣ ಕುಟ್ಟುವವರು, ಪ್ಲೇಟ್‌ ಮಾಡುವವರು ಹೀಗೆ ಮೂರ್‍ನಾಲ್ಕು ಕಾರ್ಯಾಗಾರಗಳಲ್ಲಿ ಮಾಡಿಸಿ ಯಂತ್ರವನ್ನು ನಿರ್ಮಿಸು ತ್ತಾರೆ. 20 ಇಂಚಿನ ಸ್ಟೂಲ್‌ ಮೇಲೆ 1 ಅಡಿ x 2 ಅಡಿ ಉದ್ದಗಲದ ಹಲಗೆ ಇರುತ್ತದೆ. ಸ್ಪ್ರಿಂಗ್‌ ಆ್ಯಕ್ಷನ್‌ನಲ್ಲಿ ಬೊಂಡವನ್ನು ಸುಲಭವಾಗಿ ಕೆತ್ತ  ಬಹುದು. ಸಂಕಪ್ಪರ ಪ್ರಕಾರ ಯಂತ್ರದ ಮುಖ್ಯ ಭಾಗ ಕತ್ತಿಗೆ 50 ವರ್ಷ ಏನೂ ತೊಂದರೆ ಇಲ್ಲ. ಮರದ ಹಲಗೆ ಯನ್ನು ಹಾಳಾದಾಗ ಸರಿ ಪಡಿ ಸಲು ಅವಕಾಶವಿದೆ. ಸುಮಾರು 3,700 ರೂ. ತಗಲುತ್ತದೆ. ಅಂಗಡಿ ಗಳಲ್ಲಿ ಕುಳಿತುಕೊಳ್ಳುವ ಹೆಣ್ಮಕ್ಕಳಿಗೂ ಇದನ್ನು ಸುಲಭವಾಗಿ ನಿರ್ವಹಿಸ ಬಹುದು. ಹೆಚ್ಚು ಎಳನೀರು ಕೆತ್ತ ಬೇಕಾದ ದೇವಸ್ಥಾನಗಳು, ಬೊಂಡದ ಅಂಗಡಿ ಗಳಲ್ಲಿ ಇಂತಹ ಯಂತ್ರಗಳನ್ನು ಅಳ ವಡಿಸಬಹುದು. 

ದುಬಾರಿ ತಂತ್ರಜ್ಞಾನಿಗಳು- ದೇಸೀ ತಂತ್ರಜ್ಞಾನಿಗಳು!
ಇದೇ ರೀತಿ ಬೇರಾವುದಾದರೂ ಯಂತ್ರ ಆವಿಷ್ಕಾರಕ್ಕೆ ಮುಂದಾಗಿದ್ದೀರಾ ಎಂದು ಸಂಕಪ್ಪರನ್ನು ಕೇಳಿದರೆ "ಇದೊಂದು ವಿಷಯ ತಲೆಗೆ ಹೊಳೆ ಯಿತು. ಮಾಡಿದೆ' ಎನ್ನುತ್ತಾರೆ. ಇಂತಹ ದೇಸೀ ಎಂಜಿನಿಯರಿಂಗ್‌ ತಲೆ ನಮ್ಮ ಸುತ್ತಮುತ್ತಲಿರಬಹುದು. ನಾವು ಕೇವಲ ದುಬಾರಿ ಪ್ರಮಾಣ ಪತ್ರ ಹೊತ್ತವರನ್ನು ಮಾತ್ರ ಗುರುತಿಸಿದರೆ ಸಾಲದು, ದೇಸೀ ತಜ್ಞ ರನ್ನು ಗುರುತಿಸಬೇಕಲ್ಲವೆ? ಈ ದೇಸೀ ತಂತ್ರಜ್ಞಾನಿಯ ದೂರವಾಣಿ ಸಂಖ್ಯೆ 9880617076.

2.30 ಗಂಟೆಗೆ 1,600 ಬೊಂಡ ಕೆತ್ತನೆ!
ಇದರ ಸಾಮರ್ಥ್ಯ ಎಷ್ಟಿರಬಹುದು ಎಂದು ಸಂಕಪ್ಪರನ್ನು ಕೇಳಿದರೆ ಅವರು ಹೀಗೆನ್ನುತ್ತಾರೆ: ಹೋದ ವರ್ಷ ಮೂಡಬಿದಿರೆ ಜೈನಮಂದಿರದ ಹಾಲ್‌ನಲ್ಲಿ ವೈದ್ಯ ಹೊಸ್ಮಾರಿನ ಡಾ|ಶೀತಲ್‌ ಅವರ ಮಗಳ ಮದುವೆಯಲ್ಲಿ ಬೊಂಡದ ಶರಬತ್‌ ಆರ್ಡರ್‌ ಇತ್ತು. ಆಗ ಎರಡೂವರೆ ಗಂಟೆಗಳಲ್ಲಿ 1,600 ಬೊಂಡವನ್ನು ಕೆತ್ತಿ ಶರಬತ್‌ ಮಾಡಿಕೊಟ್ಟಿದ್ದೇನೆ. ಕಾರ್ಕಳ ಸಾಣೂರು ಬಳಿ ಹಾಲ್‌ನಲ್ಲಿ ಎಡೂ¤ರು ರಾಜೇಶ ಮಡಿವಾಳರ ಮದುವೆಯಲ್ಲಿ ಮುಕ್ಕಾಲು ಗಂಟೆಯಲ್ಲಿ 450 ಎಳನೀರು ಕೆತ್ತಿದ್ದೇನೆ.

ಮಟಪಾಡಿ ಕುಮಾರಸ್ವಾಮಿ

Trending videos

Back to Top