CONNECT WITH US  

ಸಾರ್ವತ್ರಿಕ ಆರೋಗ್ಯ ಸೇವೆ ಅನುಷ್ಠಾನ ಅಗತ್ಯ  

ಇಂದು ವಿಶ್ವ ಆರೋಗ್ಯ ದಿನ

ಉಡುಪಿ: 1950ರಿಂದ ವಿಶ್ವ ಆರೋಗ್ಯ ಸಂಸ್ಥೆಯ ನೇತೃತ್ವದಲ್ಲಿ ಪ್ರತೀ ವರ್ಷ ಎ. 7ರಂದು ವಿಶ್ವದಾದ್ಯಂತ ಆರೋಗ್ಯ ದಿನ ಆಚರಿಸಲಾಗುತ್ತಿದೆ. "ಸಾರ್ವತ್ರಿಕ ಆರೋಗ್ಯ ಸೇವೆ' ಈ ಬಾರಿಯ ವಿಶ್ವ ಆರೋಗ್ಯ ದಿನಾಚರಣೆಯ ಘೋಷ ವಾಕ್ಯ. 

ಆರೋಗ್ಯ ಸೇವೆ ಪಡೆಯುವುದು ಆರ್ಥಿಕ ಹೊರೆಯಾಗಬಾರದು, ಎಲ್ಲಿ ಮತ್ತು ಯಾವ ರೀತಿಯ ಆರೋಗ್ಯ ಸೇವೆ ಆವಶ್ಯಕತೆ ಇದೆಯೋ ಅದು ದೊರೆಯಬೇಕು. ಇಂದು ಜಗತ್ತಿನ ಸರಿಸುಮಾರು ಅರ್ಧದಷ್ಟು ಜನತೆ ಉತ್ತಮ ಆರೋಗ್ಯ ಸೇವೆ ಯಿಂದ ವಂಚಿತರಾಗುತ್ತಿದ್ದಾರೆ. ನೂರು ಮಿಲಿಯನ್‌ ಜನರು ತಮ್ಮ ಆರೋಗ್ಯ ಸಮಸ್ಯೆಯಿಂದಾಗಿಯೇ ಬಡವರಾಗಿದ್ದಾರೆ. ಸರಿಸುಮಾರು 800 ಮಿಲಿಯನ್‌ ಜನರು (ಶೇ.12) ತಮ್ಮ ಆದಾಯದ ಕನಿಷ್ಠ ಶೇ.10ನ್ನು ಆರೋಗ್ಯ ಸೇವೆಗಾಗಿ ವ್ಯಯಿಸುತ್ತಿದ್ದಾರೆ ಎನ್ನುತ್ತದೆ ವಿಶ್ವ ಆರೋಗ್ಯ ಸಂಸ್ಥೆ. 

ಸರಕಾರಗಳ ಪ್ರಯತ್ನ
ಸರ್ವರಿಗೂ ಆರೋಗ್ಯ ಸೇವೆ ಒದಗಿಸುವ  ನಿಟ್ಟಿನಲ್ಲಿ ಕೇಂದ್ರ, ರಾಜ್ಯ ಸರಕಾರಗಳು ಮಹತ್ವದ ಹೆಜ್ಜೆಗಳನ್ನಿರಿಸಿವೆ. ಖಾಸಗಿ ಆಸ್ಪತ್ರೆ ಗಳಲ್ಲಿಯೂ ಕಡಿಮೆ ವೆಚ್ಚದಲ್ಲಿ ಚಿಕಿತ್ಸೆ ದೊರೆ ಯುವಂತೆ ಮಾಡಲು ಕಾಯ್ದೆಗೆ ತಿದ್ದುಪಡಿ ಮಾಡುವ ಪ್ರಯತ್ನಗಳು ನಡೆದಿವೆ.

ಕರಾವಳಿಯಲ್ಲಿ ಖಾಸಗಿ ಪಾರಮ್ಯ
ಕರಾವಳಿ ಜಿಲ್ಲೆಗಳಲ್ಲಿ ಖಾಸಗಿ ವೈದ್ಯಕೀಯ ಸಂಸ್ಥೆಗಳ ಸಂಖ್ಯೆ ಹೆಚ್ಚಿವೆ. ಜನರಲ್ಲೂ ಸರಕಾರಿ ಆರೋಗ್ಯ ಸೇವೆಯ ಮೇಲೆ ನಿರ್ಲಕ್ಷ್ಯ, ಆತಂಕ ಇನ್ನೂ ಇದೆ. ಉತ್ತಮ ಸೇವೆ ದೊರೆಯುವ ಸರಕಾರಿ ಆಸ್ಪತ್ರೆಗಳೂ ಇವೆ. ಇನ್ನು ಕೆಲವು ಆಸ್ಪತ್ರೆಗಳಲ್ಲಿ ಅಗತ್ಯ ಸೌಕರ್ಯಗಳು ಇರುವುದಿಲ್ಲ, ಉತ್ತಮ ವೈದ್ಯಕೀಯ ಸೇವೆ ದೊರೆಯುತ್ತಿಲ್ಲ. ಖಾಸಗಿ ಚಿಕಿತ್ಸಾ ಕೇಂದ್ರಗಳು, ಆಸ್ಪತ್ರೆಗಳು ಹೆಚ್ಚಿರುವುದರಿಂದ ಜನರು ಕೂಡ ಅವುಗಳನ್ನೇ ನೆಚ್ಚಿಕೊಂಡಿದ್ದಾರೆ.

ಎಚ್‌ಐವಿ ಪೀಡಿತರ ಸಂಖ್ಯೆ ಇಳಿಮುಖ 
2016ರ ಎಪ್ರಿಲ್‌ನಿಂದ 2017ರ ಮಾರ್ಚ್‌ವರೆಗೆ 366 ಮಂದಿ ಎಚ್‌ಐವಿ ಪಾಸಿಟಿವ್‌ ಪತ್ತೆಯಾಗಿತ್ತು. 2017ರ ಎಪ್ರಿಲ್‌ನಿಂದ 2018 ಫೆಬ್ರವರಿವರೆಗೆ 252 ಪಾಸಿಟಿವ್‌ ಪತ್ತೆಯಾಗಿದೆ.  ಜಿಲ್ಲೆಯಲ್ಲಿ ಪ್ರಸ್ತುತ ಒಟ್ಟು 3,265 ಮಂದಿ ಎಆರ್‌ಟಿ ಕೇಂದ್ರಗಳಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಈ ಹಿಂದಿನ ವರ್ಷಗಳಿಗೆ ಹೋಲಿಸಿದರೆ ಎಚ್‌ಐವಿ ಸೋಂಕಿತರ ಪ್ರಮಾಣ ಈಗ ಕಡಿಮೆಯಾಗುತ್ತಿದೆ ಎನ್ನುತ್ತಾರೆ ಆರೋಗ್ಯ ಇಲಾಖೆಯ ಅಧಿಕಾರಿಗಳು. ಸರಕಾರ, ಸಂಘ-ಸಂಸ್ಥೆಗಳು ಮತ್ತು ಖಾಸಗಿ ವೈದ್ಯಕೀಯ ಸಂಸ್ಥೆಗಳು ಒಮ್ಮನಸ್ಸಿ ನಿಂದ ಕಾರ್ಯಪ್ರವೃತ್ತವಾಗಬೇಕು. ಆರೋಗ್ಯ ಸೇವೆಗಾಗಿ ಜನಸಾಮಾನ್ಯ ಪರದಾಡುವ ಸ್ಥಿತಿಯನ್ನು ದೂರ ಮಾಡಿದಾಗ ಸಾರ್ವತ್ರಿಕ ಆರೋಗ್ಯ ಸೇವೆಯ ಕನಸು ನನಸಾಗಬಹುದು.

ಆರೋಗ್ಯ: ಉಡುಪಿ ಉತ್ತಮ
ಜಿಲ್ಲೆಯಲ್ಲಿ  ಶಿಶುಮರಣ ಪ್ರಮಾಣ ದರ 9 (1,000 ಜನನಕ್ಕೆ), ತಾಯಿ ಮರಣ ಪ್ರಮಾಣ ದರ 33 (ಒಂದು ಲಕ್ಷ ಜನನಕ್ಕೆ) ಇದ್ದು, ಇತರ ಜಿಲ್ಲೆಗಳಿಂದ ಉತ್ತಮವಾಗಿದೆ. ಜನ ಜಾಗೃತಿಯಿಂದ  ಪ್ರಮಾಣ ಮತ್ತಷ್ಟು ಕಡಿಮೆ ಮಾಡಬಹುದು. ಡಯಾಬಿಟಿಸ್‌ ರೋಗಿಗಳು ಶೇ.15 (30 ವರ್ಷಕ್ಕಿಂತ ಮೇಲ್ಪಟ್ಟವರು), ಅಧಿಕ ರಕ್ತದೊತ್ತಡದಿಂದ ಬಳಲುವವರು  ಶೇ. 25 (30 ವರ್ಷಕ್ಕಿಂತ ಮೇಲ್ಪಟ್ಟವರು) ಪ್ರಮಾಣ ಇದೆ. 

ಸಂತೋಷ್‌ ಬೊಳ್ಳೆಟ್ಟು

Trending videos

Back to Top