ಆರಾಧನ ಸಂಪ್ರದಾಯದಲ್ಲಿ ಜನಪದ ಮಹಿಳೆ

Team Udayavani, Mar 8, 2019, 12:30 AM IST

ಜನಪದರ ಆರಾಧನೆಯಲ್ಲಿ ಮಹಿಳೆಗೆ ತುಂಬ ಪ್ರಾಶಸ್ತ್ಯ ಇದೆ. ನನ್ನ ಪತಿ ಕೋಲ ಕಟ್ಟುವ ಕಲಾವಿದರಾಗಿದ್ದರು. ದೈವಾರಾಧನೆ ನಡೆಯುವುದು ರಾತ್ರಿಯ ವೇಳೆ. ಸಾಮಾನ್ಯವಾಗಿ ಮಹಿಳೆಯರಿಗೆ ರಾತ್ರಿಯ ಕಾರ್ಯಕ್ರಮಗಳಿಗೆ ಹೋಗಲು ಅನುಮತಿ ಇಲ್ಲ. ಆದರೆ, ನನ್ನ ಪತಿ ತಾವು ಹೋದಲ್ಲೆಲ್ಲ ನನ್ನನ್ನು ಕರೆದೊಯ್ದಿದ್ದಾರೆ. ರಾತ್ರಿ ಕಾಲವೆಂದು ಅವರು ನನ್ನನ್ನು ಬೇಡವೆನ್ನಲಿಲ್ಲ. ಜೊತೆಗೆ, ದೈವಾರಾಧನೆಯಲ್ಲಿ ಪ್ರಮುಖ ಕೆಲಸಗಳನ್ನು ನಿರ್ವಹಿಸುವ ಹಕ್ಕು ಮತ್ತು ಹೊಣೆ ಮಹಿಳೆಯದ್ದೇ ಆಗಿರುತ್ತದೆ; ವಿಶೇಷವಾಗಿ ಕೋಲ ಕಟ್ಟುವವನ ಪತ್ನಿಯದ್ದು. ನಾನು ನನ್ನ ಕರ್ತವ್ಯವನ್ನು ಸಮರ್ಥವಾಗಿ ನಿರ್ವಹಿಸಿದ್ದೇನೆಂಬ ಅಭಿಮಾನವಿದೆ. 

ಹಿಂದಿನ ದಿನಗಳಲ್ಲಿ ದೈವಾರಾಧನೆಯಲ್ಲಿ ಆರಂಭದಿಂದ ಕೊನೆಯವರೆಗೂ ಅಂದರೆ, ರಾತ್ರಿ ಬೆಳಗಾತವರೆಗೂ ಮಹಿಳೆಯ ಸಹಭಾಗಿತ್ವ ಬೇಕೇಬೇಕು. ಪಾಡªನವನ್ನೂ ಹಾಡಬೇಕು, ಭೂತಕಟ್ಟುವ ಪರಿಕರಗಳನ್ನು ಸಿದ್ಧಪಡಿಸಬೇಕು, ಸಿರಿಯೋಲೆಗಳನ್ನು ತಯಾರು ಮಾಡಬೇಕು. ಮದುವೆಯಾದ ಆರಂಭದಲ್ಲಿ ನನಗೆ ಈ ಕೆಲಸಗಳ ಬಗ್ಗೆ ಅನುಭವವಿರಲಿಲ್ಲ. ಮದುವೆಗೆ ಪೂರ್ವದಲ್ಲಿ ತಂದೆತಾಯಿಯೊಂದಿಗಾಗಲಿ, ಸಹೋದರರ ಜೊತೆಗಾಗಲಿ ಕೋಲ ನಡೆಯುವಲ್ಲಿಗೆ ಹೋದವಳಲ್ಲ. ಮದುವೆಯಾದ ಬಳಿಕ ನನ್ನ ಪತಿಯೇ ನನಗೆ ದೈವಾರಾಧನೆಯಲ್ಲಿ ನಿರ್ವಹಿಸಬೇಕಾದ ಕೆಲಸವನ್ನು ಕಲಿಸಿಕೊಟ್ಟರು. ಪಾಡªನಗಳನ್ನು ಹೇಳಿಸಿದರು. ನನಗೆ ತುಂಬ ಪಾಡªನಗಳು ಕಂಠಪಾಠ ಇವೆ. ಉಡುಪಿಯ ಓಂತಿಬೆಟ್ಟು ಬಳಿ ಇರುವ ನಮ್ಮ ಊರಿನ ಆಸುಪಾಸಿನ “ಅಜಲು’ ಹಕ್ಕಿನ ಮಾದಿರ, ಮಾಂಕಾಳಿ ಆರಾಧನ ಸಂಪ್ರದಾಯದಲ್ಲಿಯೂ ನನ್ನವರೊಂದಿಗೆ ನಾನು ಭಾಗವಹಿಸಿದ್ದೇನೆ.

ಜನಪದರ ಬದುಕಿನಲ್ಲಾಗಲಿ, ಕಲೆಯಲ್ಲಾಗಲಿ ಗಂಡಸಿನಷ್ಟೇ ಪ್ರಾಮುಖ್ಯ ಹೆಣ್ಣಿಗೂ ಇದೆ.

ಅಮ್ಮಣಿ ಡಂಗು ಪಾಣಾರ
ಜಾನಪದ ಅಕಾಡೆಮಿ ಪ್ರಶಸ್ತಿ ಪುರಸ್ಕೃತ ಜನಪದ ಕಲಾವಿದೆ