ನೇಪಾಳದಲ್ಲಿ ಕಾಪ್ಟರ್‌ ಪತನ: 6 ಸಾವು

Team Udayavani, Sep 9, 2018, 6:00 AM IST

ಕಠ್ಮಂಡು: ಏಳು ಮಂದಿಯನ್ನು ಹೊತ್ತೂಯ್ಯುತ್ತಿದ್ದ ಹೆಲಿಕಾಪ್ಟರ್‌ವೊಂದು ನೇಪಾಳದ ದಟ್ಟ ಅರಣ್ಯವೊಂದರಲ್ಲಿ ಶನಿವಾರ ಪತನಗೊಂಡಿದೆ. ಬೆಳಗ್ಗೆ ಸಂಪರ್ಕ ಕಡಿದುಕೊಂಡು ಕಣ್ಮರೆಯಾಗಿದ್ದ ಕಾಪ್ಟರ್‌ ಬಳಿಕ ಧಡಿಂಗ್‌ ಮತ್ತು ನುವಾಕೋಟ್‌ ಜಿಲ್ಲೆಯ ಗಡಿ ಭಾಗದಲ್ಲಿ ಪತನಗೊಂಡಿದ್ದು, ಪೈಲಟ್‌ ಸೇರಿದಂತೆ ಒಳಗಿದ್ದ 6 ಮಂದಿ ಮೃತಪಟ್ಟಿದ್ದಾರೆ. ಒಬ್ಬ ಮಹಿಳೆ ಮಾತ್ರ ಪವಾಡಸದೃಶ ರೀತಿಯಲ್ಲಿ ಪಾರಾಗಿದ್ದಾರೆ.

ಹಿರಿಯ ಕ್ಯಾಪ್ಟನ್‌ ನಿಶ್ಚಲ್‌ ಕೆ.ಸಿ. ಅವರು ಪೈಲಟ್‌ ಆಗಿ ಕಾರ್ಯನಿರ್ವಹಿಸುತ್ತಿದ್ದರು. ಜಪಾನ್‌ನ ಟ್ರೆಕ್ಕರ್‌ ಹಿರೋಮಿ ಕೊಮಾಟ್ಸು ಸೇರಿ 6 ಮಂದಿ ಪ್ರಯಾಣಿಕರೂ ಕಾಪ್ಟರ್‌ನಲ್ಲಿದ್ದರು. ಕಠ್ಮಂಡುವಿನಿಂದ ಬೆಳಗ್ಗೆ ಟೇಕ್‌ ಆಫ್ ಆಗಿದ್ದ ಕಾಪ್ಟರ್‌ ಸುಮಾರು 20 ಮೈಲುಗಳವರೆಗೆ ಸಂಚಾರ ನಡೆಸಿದ ಬಳಿಕ, ಕಠ್ಮಂಡು ಟವರ್‌ನಿಂದ ಸಂಪರ್ಕ ಕಡಿದುಕೊಂಡಿತ್ತು. ಪತನಗೊಂಡ ವಿಮಾನಕ್ಕೆ ಬೆಂಕಿ ಹತ್ತಿಕೊಂಡಿಲ್ಲ. ಆದರೆ, ದಟ್ಟ ಅರಣ್ಯವಾದ ಕಾರಣ ರಕ್ಷಣಾ ಪಡೆಗೆ ಘಟನಾ ಸ್ಥಳಕ್ಕೆ ತೆರಳಲು ವಿಳಂಬವಾಯಿತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.