ಆಧಾರ್ ದುರ್ಬಳಕೆ ಅರಿಯಲು ಅವಕಾಶ
Team Udayavani, Dec 12, 2017, 7:05 AM IST
ಹೊಸದಿಲ್ಲಿ: ಪ್ರತಿಯೊಂದು ವಿಚಾರಕ್ಕೂ ಆಧಾರ್ ಬೇಕು ಎಂದಿರುವಾಗ ಅದರ ದುರುಪಯೋಗದ ಸಾಧ್ಯತೆಯೂ ಇರುತ್ತದೆ. ಅದಕ್ಕಾಗಿಯೇ ಭಾರತೀಯ ವಿಶಿಷ್ಟ ಗುರುತಿನ ಚೀಟಿ ಪ್ರಾಧಿಕಾರ (ಯುಐಡಿಎಐ) ವಿಶೇಷ ವ್ಯವಸ್ಥೆ ಜಾರಿಗೆ ತಂದಿದೆ. ಪ್ರಾಧಿಕಾರದ ವೆಬ್ಸೈಟ್ನಲ್ಲಿ ಆಧಾರ್ ಸಂಖ್ಯೆ ನಮೂದಿಸಿ ಅದನ್ನು ಪರಿಶೀಲನೆ ನಡೆಸುವ ಅವಕಾಶ ಕಲ್ಪಿಸಲಾಗಿದೆ. ಎಲ್ಲೆಲ್ಲಿ ಆಧಾರ್ ಲಿಂಕ್ ಮಾಡಲಾಗಿದೆ ಎಂಬ ಮಾಹಿತಿಯನ್ನು ಕುಳಿತಲ್ಲಿಂದಲೇ ತಿಳಿದುಕೊಳ್ಳಬಹುದು.
ಅದು ಹೇಗೆ ಗೊತ್ತೇ?
ಪ್ರಾಧಿಕಾರದ ವೆಬ್ಸೈಟ್ uidai.gov.in ಲಾಗ್ಇನ್ ಆಗಬೇಕು. ಅದರಲ್ಲಿ ಆಧಾರ್ ಸರ್ವಿಸಸ್ ಎಂಬ ಆಯ್ಕೆಯಲ್ಲಿ ಆಧಾರ್ ಅಥೆಂಟಿಕೇಷನ್ ಹಿಸ್ಟ್ರಿ ಆಯ್ಕೆ ಸಿಗುತ್ತದೆ. ಅದನ್ನು ಕ್ಲಿಕ್ ಮಾಡಿ, ಆಧಾರ್ ನಂಬರ್ ನಮೂದಿಸಬೇಕು. ಕೂಡಲೇ ಮೊಬೈಲ್ಗೆ ಒಟಿಪಿ ಬರುತ್ತದೆ. ಅದನ್ನು ಬರೆದ ತಕ್ಷಣ, 7 ತಿಂಗಳ ಅವಧಿಯಲ್ಲಿ ಯಾವ ಸೇವೆಗಳಿಗೆ ಆಧಾರ್ ಲಿಂಕ್ ಮಾಡಿದ್ದೀರಿ ಎಂಬ ಮಾಹಿತಿ ಸಿಗುತ್ತದೆ. ಸಂಶಯ ಕಂಡುಬಂದರೆ ಸಹಾಯವಾಣಿ 1947ಕ್ಕೆ ದೂರು ಸಲ್ಲಿಸಬಹುದು.