ಭಾರತದಲ್ಲಿ ಒಂದೇ ದಿನ 1,752 ಜನರಿಗೆ ಸೋಂಕು: ವೈರಸ್ ಹೊಡೆತಕ್ಕೆ ನಲುಗಿದ ಮಹಾರಾಷ್ಟ್ರ

Team Udayavani, Apr 25, 2020, 7:55 AM IST

ನವದೆಹಲಿ: ಕೋವಿಡ್ -19 ಭಾರತದಾದ್ಯಂತ ತನ್ನ ಕಬಂಧ ಬಾಹುವನ್ನು ಚಾಚುತ್ತಲೇ ಇದ್ದು ಶುಕ್ರವಾರ ಬರೋಬ್ಬರಿ 1,752 ಜನರಿಗೆ ಸೋಂಕು ತಗುಲಿರುವುದು ದೃಢಪಟ್ಟಿದೆ. ಆ ಮೂಲಕ ಓಟ್ಟಾರೆ ವೈರಾಣು ಭಾಧಿತರ ಸಂಖ್ಯೆ 23,452ಕ್ಕೆ ತಲುಪಿದೆ ಎಂದು ಎನ್ ಡಿ ಟಿವಿ ವರದಿ ಮಾಡಿದೆ.

ಆರೋಗ್ಯ ಸಚಿವಾಲಯದ ಮಾಹಿತಿಯ ಪ್ರಕಾರ ಕಳೆದ 24 ಗಂಟೆಗಳಲ್ಲಿ 37 ಮಂದಿ ಈ ಮಾರಕ ವೈರಸ್ ಗೆ ಬಲಿಯಾಗಿದ್ದು ಸಾವಿನ ಸಂಖ್ಯೆ 723ಕ್ಕೆ ಏರಿಕೆಯಾಗಿದೆ. ಸೋಂಕಿತರಲ್ಲಿ 20% ಅಂದರೇ 7,748 ಮಂದಿ ಗುಣಮುಖರಾಗಿ ಮನೆಗೆ ತೆರಳಿದ್ದಾರೆ.

ಮಹಾರಾಷ್ಟ್ರದಲ್ಲಿ ಈ ವೈರಸ್ ಅಟ್ಟಹಾಸ ಮೆರೆಯುತ್ತಿದ್ದು ಈ ರಾಜ್ಯದಲ್ಲಿ 6,817 ಮಂದಿ ಸೋಂಕಿನಿಂದ ಬಳಲುತ್ತಿದ್ದಾರೆ. ಮೃತರ ಸಂಖ್ಯೆ ಕೂಡ ಹೆಚ್ಚಿದ್ದು 301 ಮಂದಿ ಪ್ರಾಣ ತ್ಯೆಜಿಸಿದ್ದಾರೆ ಎಂದು ತಿಳಿದುಬಂದಿದೆ.   ರಾಜ್ಯದ 90% ಪ್ರಕರಣಗಳು ಕೇವಲ ಮುಂಬೈ ನಗರವೊಂದರಲ್ಲೇ  ದಾಖಲಾಗಿದೆ.

ಗುಜರಾತ್, ದೆಹಲಿ, ರಾಜಸ್ಥಾನ್, ಮಧ್ಯಪ್ರದೇಶ, ತಮಿಳುನಾಡು ಮುಂತಾದ ರಾಜ್ಯಗಳಲ್ಲಿ ದಿನೇ ದಿನೇ ಸೋಂಕಿತರ ಪ್ರಮಾಣ ಶೇ. 50 ಕ್ಕಿಂತ ಹೆಚ್ಚಾಗುತ್ತಿದೆ. ಹಲವು ರಾಜ್ಯಗಳು ಮುಂಜಾಗೃತ ಕ್ರಮ ಕೈಗೊಂಡಿದ್ದು ಕೆಲವೆಡೆ ಲಾಕ್ ಡೌನ್ ಅನ್ನು ಕೊಂಚ ಮಟ್ಟಿಗೆ ಕಡಿಮೆಮಾಡಲಾಗಿದೆ.