ಲೇಡಿ ಕಮಾಂಡೋ ರೆಡಿ

Team Udayavani, Jul 1, 2018, 6:00 AM IST

ನವದೆಹಲಿ: ಜಮ್ಮು-ಕಾಶ್ಮೀರದಲ್ಲಿ ಕಲ್ಲು ತೂರಾಟದಂಥ ಸಮಸ್ಯೆ ಸಾಮಾನ್ಯ. ಆದರೆ, ಇತ್ತೀಚಿನ ದಿನಗಳಲ್ಲಿ ಯುವಕರ ಜೊತೆಗೆ ಕಣಿವೆ ರಾಜ್ಯದ ಯುವತಿಯರೂ ಭದ್ರತಾ ಪಡೆಗಳ ವಿರುದ್ಧ ಕಲ್ಲು ತೂರಾಡುವಂಥ ಘಟನೆಗಳು ಹೆಚ್ಚುತ್ತಿವೆ. ಇವರನ್ನು ಸಮರ್ಥವಾಗಿ ಎದುರಿಸಲು ಇದೀಗ ಲೇಡಿ ಕಮಾಂಡೋಗಳು ಸಿದ್ಧರಾಗಿದ್ದಾರೆ. 

ಇಲ್ಲಿ ನಿಯೋಜಿಸಲ್ಪಡುವ ಮಹಿಳಾ ಕಮಾಂಡೋಗಳಿಗೆ ಈಗಾಗಲೇ ಸಿಆರ್‌ಪಿಎಫ್(ಕೇಂದ್ರ ಮೀಸಲು ಪೊಲೀಸ್‌ ಪಡೆ) ವಿಶೇಷ ತರಬೇತಿಯನ್ನು ನೀಡಿದೆ. ಈ ತಂಡಕ್ಕೆ “ಸೂಪರ್‌-500′ ಎಂದು ನಾಮಕರಣ ಮಾಡಲಾಗಿದೆ. ಉಗ್ರರ ವಿರುದ್ಧದ ಕಾರ್ಯಾಚರಣೆ ವೇಳೆ ಕಲ್ಲು ತೂರಾಟದ ಮೂಲಕ ಭದ್ರತಾಪಡೆ ಗಳಿಗೆ ಅಡ್ಡಿ ಉಂಟುಮಾಡುವವರನ್ನು ಎದುರಿಸುವುದೇ ಸೇನೆಗೆ ದೊಡ್ಡ ತಲೆನೋವಾಗಿದೆ. ಇಂಥ ಸಮಯದಲ್ಲಿ ಮಹಿಳಾ ಕಮಾಂಡೋಗಳಿರುವ “ಕ್ರ್ಯಾಕ್‌ ಟೀಮ್‌’ ಕಾರ್ಯನಿರ್ವಹಿಸಲಿದೆ.

ಕಠಿಣ ತರಬೇತಿ
ಸಿಆರ್‌ಪಿಎಫ್ನ ಈ ಕಮಾಂಡೋಗಳಿಗೆ ಕಠಿಣವಾದ ವಿಶೇಷ ತರಬೇತಿ ನೀಡಲಾಗಿದೆ. ರಾತ್ರಿ ಹೊತ್ತಲ್ಲೂ ಕಾರ್ಯನಿರ್ವಹಿಸಲು ಅನುಕೂಲವಾಗು ವಂತೆ ಕಣ್ಣಿಗೆ ಪಟ್ಟಿ ಕಟ್ಟಿ ಕಾರ್ಯಾಚರಿಸಲು ಕಲಿಸಲಾಗಿದೆ. ಜತೆಗೆ, ಶಸ್ತ್ರಾಸ್ತ್ರಗಳಲ್ಲಿ ದೋಷ ಕಂಡುಬಂದರೆ, ಕೇವಲ ಒಂದೇ ನಿಮಿಷದಲ್ಲಿ ಅದನ್ನು ರಿಪೇರಿ ಮಾಡುವಂಥ ಕೌಶಲ್ಯವನ್ನೂ ಹೇಳಿಕೊಡಲಾ ಗಿದೆ ಎಂದು ಭದ್ರತಾ ಮೂಲಗಳು ತಿಳಿಸಿವೆ.