ದಿನಕ್ಕೆ 24ರ ಬದಲು 25 ಗಂಟೆ? : ಪ‌ರಿಭ್ರಮಣೆಯಲ್ಲಿ ವಸುಂಧರೆ ಮಂದಗತಿ

Team Udayavani, Jun 7, 2018, 8:35 AM IST

ವಾಷಿಂಗ್ಟನ್‌ : ಒಂದು ದಿನದಲ್ಲಿ ಎಷ್ಟು ಗಂಟೆ ಎಂದರೆ, ಪ್ರಾಥಮಿಕ ಶಾಲೆಯ ವಿದ್ಯಾರ್ಥಿಯೂ ಇದಕ್ಕೆ 24 ಗಂಟೆ ಎಂದು ಉತ್ತರಿಸುತ್ತಾನೆ. ಆದರೆ, ಮುಂದೊಂದು ದಿನ, ಈ ಸಿದ್ಧ ಉತ್ತರ’ದ ಬದಲಾಗಿ, ದಿನಕ್ಕೆ 25 ಗಂಟೆ ಎಂದು ಹೇಳಬೇಕಾಗುತ್ತದೆ ಎಂದು ಅಮೆರಿಕದ ಭೂವಿಜ್ಞಾನಿಗಳ ತಂಡ ಹೇಳಿದೆ. ಇಂಥದ್ದೊಂದು ತರ್ಕ ಮುಂದಿಟ್ಟು ವಿಸ್ಕಾನ್ಸಿನ್‌ – ಮ್ಯಾಡಿಸನ್‌ ವಿಶ್ವವಿದ್ಯಾಲಯದ ಸ್ಟೀಫ‌ನ್‌ ಮೇಯರ್ಸ್‌ ನೇತೃತ್ವದ ಅಧ್ಯಯನ ತಂಡ ಎಲ್ಲರಲ್ಲೂ ಕುತೂಹಲ ಹುಟ್ಟಿಸಿದೆ.

ಏನಿದು ತರ್ಕ?: ಸದ್ಯಕ್ಕೆ ಭೂಮಿಯ ಒಂದು ಪರಿಭ್ರಮಣೆ ಅವಧಿ 24 ಗಂಟೆಯಿದ್ದು ಇದನ್ನು ಒಂದು ದಿನವೆಂದು ಹೇಳಲಾಗುತ್ತದೆ. ಆದರೆ, ಈ ಪರಿಭ್ರಮಣೆಯ ಮೇಲೆ ಸೌರವ್ಯೂಹದ ಇತರ ಗ್ರಹ, ಉಪಗ್ರಹಗಳ ಅಯಸ್ಕಾಂತೀಯ ಶಕ್ತಿಗಳು ಬಿಲಿಯನ್‌ ಗಟ್ಟಲೆ ವರ್ಷಗಳಿಂದಲೂ ಪರಿಣಾಮ ಬೀರುತ್ತಿವೆ. ಇವುಗಳಲ್ಲಿ ಭೂಮಿಯ ಉಪಗ್ರಹವಾದ ಚಂದ್ರನಲ್ಲಿರುವ ಅತ್ಯಲ್ಪ ಗುರುತ್ವಾಕರ್ಷಣ ಶಕ್ತಿಯ ಪ್ರಭಾವವೇ ಹೆಚ್ಚು. ಚಂದ್ರನ ಈ ಶಕ್ತಿ, ಭೂಮಿಯ ಪರಿಭ್ರಮಣೆ ವೇಗವು ವಾರ್ಷಿಕವಾಗಿ ಕೆಲ ಸೆಕೆಂಡ್‌ ಗಳಷ್ಟು ಕ್ಷೀಣಿಸುವಂತೆ ಮಾಡುತ್ತದೆ. ಹಾಗಾಗಿ ಮುಂದೊಂದು ದಿನ ಭೂಮಿ ತನ್ನ ಪರಿಭ್ರಮಣೆ ಮುಗಿಸಲು 25 ಗಂಟೆ ತೆಗೆದುಕೊಳ್ಳಬೇಕಾಗುತ್ತದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.

18 ಗಂಟೆಯಿಂದ 24 ಗಂಟೆ!: ಭೂಮಿ ಮೇಲೆ ಚಂದ್ರನ ಪರಿಣಾಮ ಬಿಲಿಯನ್‌ ಗಟ್ಟಲೆ ವರ್ಷಗಳಿಂದ ನಡೆದು ಬಂದಿದೆ. 1.4 ಬಿಲಿಯನ್‌ ವರ್ಷಗಳ ಹಿಂದೆ ಭೂಮಿಯ 1 ದಿನದ ಅವಧಿ 18 ಗಂಟೆ ಆಗಿತ್ತು. ಆದರೆ ಚಂದ್ರನ ನಿರಂತರ ಪ್ರಭಾವದಿಂದ ಈ ವೇಗ ವಾರ್ಷಿಕ ಲೆಕ್ಕಾಚಾರದಲ್ಲಿ ಕ್ಷೀಣಿಸಿ, ಈಗ 24 ಗಂಟೆಗೆ ಬಂದು ನಿಂತಿದೆ ಎಂದಿದ್ದಾರೆ ವಿಜ್ಞಾನಿಗಳು.