ಮೆಂಟಲ್ ಹೈ ಕ್ಯಾಗೆ ಆಕ್ಷೇಪ
Team Udayavani, Apr 20, 2019, 6:00 AM IST
ಮುಂಬಯಿ: ಕಂಗನಾ ರನೌತ್ ಮತ್ತು ರಾಜಕುಮಾರ ರಾವ್ ನಟಿಸಿದ ಮೆಂಟಲ್ ಹೈ ಕ್ಯಾ ಸಿನಿಮಾಗೆ ಭಾರತೀಯ ಸೈಕಿಯಾಟ್ರಿಕ್ ಸೊಸೈಟಿ ಆಕ್ಷೇಪ ವ್ಯಕ್ತಪಡಿಸಿದೆ. ಈ ಸಿನಿಮಾ ಶೀರ್ಷಿಕೆಯು ಭಾರತದ ಮಾನಸಿಕ ಅಸ್ವಸ್ಥರನ್ನು ಅವಹೇಳನ ಮಾಡುವಂತಿದೆ. ಹೀಗಾಗಿ ತತ್ಕ್ಷಣವೇ ಶೀರ್ಷಿಕೆಗೆ ನೀಡಿದ ಅನುಮತಿ ಹಿಂಪಡೆಯಬೇಕು ಎಂದು ಸೆನ್ಸಾರ್ ಮಂಡಳಿಗೆ ಪತ್ರ ಬರೆದಿದೆ. ಇದು ಮಾನಸಿಕ ಆರೋಗ್ಯ ಕಾಯ್ದೆ 2017ಕ್ಕೆ ವಿರುದ್ಧವಾಗಿದೆ. ಈ ಕಾಯ್ದೆಯ ಪ್ರಕಾರ ದೇಶದಲ್ಲಿನ ಮಾನಸಿಕ ಅಸ್ವಸ್ಥರು ಹಾಗೂ ಅವರ ಆರೈಕೆಯಲ್ಲಿ ತೊಡಗಿರುವವರ ಘನತೆ ಕಾಪಾಡಬೇಕಿದೆ ಎಂದು ಪತ್ರದಲ್ಲಿ ವಿವರಿಸಲಾಗಿದೆ. ಸಿನಿಮಾ ಶೀರ್ಷಿಕೆಗೆ ಸಾಮಾಜಿಕ ಅಂತರ್ಜಾಲ ತಾಣದಲ್ಲೂ ಆಕ್ಷೇಪ ಕೇಳಿಬಂದಿದೆ.