ಯಾಂತ್ರೀಕರಣ: 11ಸಾವಿರ ಮಂದಿಯ ನೌಕರಿಗೆ ಕತ್ತರಿ
Team Udayavani, Jun 25, 2017, 3:45 AM IST
ಹೊಸದಿಲ್ಲಿ: ಕಂಪನಿಯ ಕೆಲವು ವಿಭಾಗಗಳಲ್ಲಿ ಯಾಂತ್ರೀಕರಣ ಅಳವಡಿಸಿದ್ದರಿಂದಾಗಿ 11 ಸಾವಿರ ಮಂದಿಯನ್ನು ಕರ್ತವ್ಯದಿಂದ ಬಿಡುಗಡೆಗೊಳಿಸಲಾಗಿದೆ ಎಂದು ಮಾಹಿತಿ ತಂತ್ರಜ್ಞಾನ ಸಂಸ್ಥೆ ಇನ್ಫೋಸಿಸ್ ಹೇಳಿದೆ.
ಈ ಕ್ರಮ ಅಳವಡಿಸಿದ್ದರಿಂದ ಪ್ರತಿ ಉದ್ಯೋಗಿ ಮೇಲೆ ಕಂಪನಿ ಹೂಡುತ್ತಿದ್ದ ಆದಾಯದಲ್ಲಿ ಶೇ. 1.2ರಷ್ಟು ಉಳಿತಾ ಯವಾಗಿದೆ ಎಂದು ವಕ್ತಾರ ಹೇಳಿದ್ದಾರೆ. ಇನ್ಫೋಸಿಸ್ ಸಂಸ್ಥಾಪಕರು ಮತ್ತು ಆಡಳಿತ ಮಂಡಳಿ ನಡುವೆ ಭಿನ್ನಾಭಿಪ್ರಾಯ ಇಲ್ಲ. ಆಡಳಿತ ಮಂಡಳಿಯವರಿಗೆ ಮತ್ತು ಉದ್ಯೋಗಿಗಳಿಗೆ ಇರುವ ವೇತನದಲ್ಲಿ ಅಂತರ ಇರುವುದನ್ನು ಗಮನಿಸಲಾಗಿದೆ ಎಂದೂ ಸ್ಪಷ್ಟನೆ ನೀಡಿದ್ದಾರೆ.
ಬೆಂಗಳೂರಿನಲ್ಲಿ ಶನಿವಾರ ನಡೆದ 36ನೇ ವಾರ್ಷಿಕ ಸಭೆಯ ಬಳಿಕ ಅವರು ಮಾತನಾಡಿದರು. ಭಿನ್ನಾಭಿಪ್ರಾಯದ ಬಗ್ಗೆ ಮಾಧ್ಯಮಗಳೇ ತಪ್ಪು ಮಾಹಿತಿಯಿಂದ ಕೂಡಿದ ವರದಿಗಳನ್ನು ಪ್ರಕಟಿಸಿವೆ ಎಂದರು. ಆಡಳಿತ ಮಂಡಳಿ ಹಾಲಿ ಅಧ್ಯಕ್ಷ ಆರ್.ಶೇಷಸಾಯಿ 2018ರ ಮೇ ನಲ್ಲಿ ನಿವೃತ್ತರಾಗಲಿದ್ದಾರೆ. 13 ಸಾವಿರ ಕೋಟಿ ರೂ. ಬಂಡವಾಳ ಹೂಡಿಕೆಗೂ ಸಭೆ ಒಪ್ಪಿಗೆ ನೀಡಿದೆ.