54 ವರ್ಷಗಳ ಬಳಿಕ ಭಾರತದಲ್ಲಿ ಕೊಲೆ ಪ್ರಕರಣಗಳ ಸಂಖ್ಯೆ ಇಳಿಕೆ, ಕಿಡ್ನಾಪ್ ಪ್ರಕರಣ ಏರಿಕೆ
Team Udayavani, Oct 23, 2019, 9:31 AM IST
ನವದೆಹಲಿ: ಕಳೆದ 54 ವರ್ಷಗಳ ಬಳಿಕ ಭಾರತದಲ್ಲಿ ಕೊಲೆ ಪ್ರಕರಣಗಳ ಸಂಖ್ಯೆ ಗಣನೀಯ ಇಳಿಕೆ ಕಂಡಿರುವುದಾಗಿ ನ್ಯಾಷನಲ್ ಕ್ರೈಮ್ ರೆಕಾರ್ಡ್ಸ್ ಬ್ಯೂರೋ (ಎನ್ ಸಿಆರ್ ಬಿ) ಬಿಡುಗಡೆ ಮಾಡಿರುವ ನೂತನ ಅಂಕಿ-ಅಂಶಗಳ ವರದಿ ತಿಳಿಸಿದೆ. 2017ರಲ್ಲಿ ದೇಶದಲ್ಲಿ ಕೊಲೆ ಪ್ರಕರಣಗಳ ಸಂಖ್ಯೆ ತೀವ್ರ ಇಳಿಕೆ ಕಂಡಿದೆ.
ಎಸಿಆರ್ ಬಿ ಅಂಕಿಅಂಶದ ಪ್ರಕಾರ, 2017ರಲ್ಲಿ ಕೊಲೆ ಪ್ರಕರಣಗಳು ಶೇ.5.9ರಷ್ಟು ಇಳಿಕೆ ಕಂಡಿದೆ. 2017ರಲ್ಲಿ 28, 653 ಜನರನ್ನು ಕೊಲೆಗೈಯಲಾಗಿತ್ತು. 2016ರಲ್ಲಿ ನಡೆದ ಕೊಲೆಗಳ ಸಂಖ್ಯೆ 30,450 ಎಂದು ತಿಳಿಸಿದೆ.
ವರದಿ ಪ್ರಕಾರ, ಬಹುತೇಕ ಕೊಲೆ ಪ್ರಕರಣಗಳಿಗೆ ವಿವಾದಗಳೇ (7,898) ಕಾರಣ ಎಂದು ಹೇಳಿದ್ದು, ಅದೇ ರೀತಿ ವೈಯಕ್ತಿಕ ದ್ವೇಷ(4,660), ಸ್ವ ಹಿತಾಸಕ್ತಿ(2,103) ಉದ್ದೇಶಗಳಿಗಾಗಿ ಕೊಲೆ ಪ್ರಕರಣಗಳು ನಡೆದಿರುವುದಾಗಿ ವಿವರಿಸಿದೆ. ಒಂದೆಡೆ ಕೊಲೆ ಪ್ರಕರಣಗಳಲ್ಲಿ ಇಳಿಕೆ ಕಂಡಿದ್ದರೆ, ಅಪಹರಣ ಪ್ರಕರಣ ಏರಿಕೆ ಕಂಡಿದೆ.
ಎನ್ ಸಿಆರ್ ಬಿ ಅಂಕಿ-ಅಂಶದ ಪ್ರಕಾರ, 2017ರಲ್ಲಿ ಅಪಹರಣ ಪ್ರಕರಣಗಳು ಶೇ.9ರಷ್ಟು ಏರಿಕೆಯಾಗಿದೆ. 2016ರಲ್ಲಿ 88,008 ಅಪಹರಣ ಪ್ರಕರಣ ನಡೆದಿದ್ದರೆ, 2017ರಲ್ಲಿ 95,893 ಕಿಡ್ನಾಪ್ ಪ್ರಕರಣಗಳು ದಾಖಲಾಗಿದೆ. 1,00,555 ಅಪಹರಣ ಪ್ರಕರಣಗಳಲ್ಲಿ 23,814 ಪುರುಷರು, 76,741 ಮಂದಿ ಮಹಿಳೆಯರಾಗಿದ್ದಾರೆ ಎಂದು ವಿವರಿಸಿದೆ. 56,622 ಮಕ್ಕಳ ಅಪಹರಣ ಪ್ರಕರಣಗಳಲ್ಲಿ 14,296 ಹುಡುಗರು, 42,326 ಹುಡುಗಿಯರು ಎಂದು ವರದಿ ತಿಳಿಸಿದೆ.