ತ್ರಿವಳಿ ತಲಾಕ್ ಅಪರಾಧೀಕರಣ ಮಸೂದೆ: ಮೋದಿ ಸಂಪುಟ ಅನುಮೋದನೆ
Team Udayavani, Dec 15, 2017, 3:59 PM IST
ಹೊಸದಿಲ್ಲಿ : ತ್ರಿವಳಿ ತಲಾಕನ್ನು ಅಪರಾಧೀಕರಿಸುವ, ತ್ರಿವಳಿ ತಲಾಕ್ ಮಸೂದೆ ಎಂದೆ ತಿಳಿಯಲ್ಪಟ್ಟಿರುವ “ಮುಸ್ಲಿಂ ಮಹಿಳೆಯರ (ವೈವಾಹಿಕ ಹಕ್ಕುಗಳ ರಕ್ಷಣೆ) ಮಸೂದೆಗೆ ಪ್ರಧಾನಿ ನರೇಂದ್ರ ಮೋದಿ ಸಚಿವ ಸಂಪುಟ ಇಂದು ಶುಕ್ರವಾರ ಅನುಮೋದನೆ ನೀಡಿದೆ.
ಇಂದು ಆರಂಭಗೊಂಡಿರುವ ಸಂಸತ್ತಿನ ಚಳಿಗಾಲದ ಅಧಿವೇಶನದಲ್ಲಿ ಈ ಮಸೂದೆಯನ್ನು ಕೈಗೆತ್ತಿಕೊಳ್ಳಲಾಗುವುದು.
ತ್ರಿವಳಿ ತಲಾಕ್ ಎನ್ನುವುದು ಮುಸ್ಲಿಮ್ ಪುರುಷರು ತಮ್ಮ ಪತ್ನಿಗೆ ತತ್ಕ್ಷಣ ನೀಡುವ ವಿವಾಹ ವಿಚ್ಛೇದನವಾಗಿದ್ದು ಆ ಪ್ರಕಾರ ಅವರು ಮೂರು ಬಾರಿ ತಲಾಕ್ ಪದವನ್ನು ಉಚ್ಚರಿಸುವುದು ಕ್ರಮವಾಗಿದೆ.
ಕಳೆದ ಆಗಸ್ಟ್ನಲ್ಲಿ ನೀಡಿದ ಮಹತ್ತರ ಮೈಲುಗಲ್ಲಿನ ತೀರ್ಪಿನಲ್ಲಿ ಸುಪ್ರೀಂ ಕೋರ್ಟ್, ತ್ರಿವಳಿ ತಲಾಕ್ ಅಸಾಂವಿಧಾನಿಕ ಎಂದು ಘೋಷಿಸಿತ್ತು.
ಇದೀಗ ಮೋದಿ ಸಚಿವ ಸಂಪುಟ ಅನುಮೋದಿಸಿರುವ ತ್ರಿವಳಿ ತಲಾಕ್ ಮಸೂದೆಯು ಈ ಬಗೆಯ ತಲಾಕ್ ಪ್ರಕರಣಗಳಲ್ಲಿ ಮುಸ್ಲಿಂ ಮಹಿಳೆಯರಿಗೆ ಜೀವನಾಂಶ ಕೋರುವ ಹಕ್ಕುನ್ನು ದಯಪಾಲಿಸುತ್ತದೆ.
ಮಾತ್ರವಲ್ಲದೆ ತ್ರಿವಳಿ ತಲಾಕನ್ನು ಜಾಮೀನು ರಹಿತ ಸಂಜ್ಞಾಪರಾಧವೆಂದು ಈ ಮಸೂದೆಯು ಪರಿಗಣಿಸುತ್ತದೆ ಮತ್ತು ತ್ರಿವಳಿ ತಲಾಕ್ ನೀಡುವ ಅಪರಾಧ ಎಸಗುವ ವ್ಯಕ್ತಿಗೆ ಮೂರು ವರ್ಷಗಳ ಜೈಲು ಶಿಕ್ಷೆಯನ್ನು ವಿಧಿಸುತ್ತದೆ.
“ತ್ರಿವಳಿ ತಲಾಕ್ ಕಾಯಿದೆಯನ್ನು ಜಾರಿಗೆ ತರಬಯಸಿರುವ ಪ್ರಧಾನಿ ನರೇಂದ್ರ ಮೋದಿ ಅವರು ಮುಸ್ಲಿಂ ಮಹಿಳೆಯರ ಹಕ್ಕುಗಳ ಬಗ್ಗೆ ಮಾತನಾಡುತ್ತಾರೆ; ಆದರೆ ಅದೇ ವೇಳೆ ಹಿಂದೂ ಸಹೋದರಿಯರನ್ನು ಕಡೆಗಣಿಸುತ್ತಾರೆ’ಎಂದು ಎಐಎಂ ಮುಖ್ಯಸ್ಥ ಅಸಾದುದ್ದೀನ್ ಓವೈಸಿ ಟೀಕಿಸಿದ್ದಾರೆ.