ಚುನಾವಣಾ ಖರ್ಚು ವೆಚ್ಚ: ದಿಗ್ವಿಜಯ್, ಪ್ರಜ್ಞಾಗೆ ಚುನಾವಣಾ ಆಯೋಗದ ನೊಟೀಸ್
Team Udayavani, May 4, 2019, 11:25 AM IST
ಹೊಸದಿಲ್ಲಿ : ಚುನಾವಣಾ ಖರ್ಚು ವೆಚ್ಚಗಳ ಪಟ್ಟಿಯಲ್ಲಿ ಲೋಪ ದೋಷಗಳು ಕಂಡು ಬಂದಿರುವ ಕಾರಣ ಚುನಾವಣಾ ಆಯೋಗ ಕಾಂಗ್ರೆಸ್ ನಾಯಕ ದಿಗ್ವಿಜಯ್ ಸಿಂಗ್ ಮತ್ತು ಅವರ ಎದುರಾಳಿಯಾಗಿರುವ ಬಿಜೆಪಿಯ ಸಾಧ್ವಿ ಪ್ರಜ್ಞಾ ಠಾಕೂರ್ ಅವರಿಗೆ ನೊಟೀಸ್ ಜಾರಿ ಮಾಡಿದೆ. ಈ ಇಬ್ಬರೂ ನಾಯಕರು ಮಧ್ಯ ಪ್ರದೇಶದ ಭೋಪಾಲ್ ಕ್ಷೇತ್ರದಿಂದ ಲೋಕಸಭೆಗೆ ಸ್ಪರ್ಧಿಸುತ್ತಿದ್ದಾರೆ.
ಕಾಂಗ್ರೆಸ್ ನ ದಿಗ್ವಿಜಯ್ ಸಿಂಗ್ ಅವರು ನಿನ್ನೆ ಶುಕ್ರವಾರದ ವರೆಗಿನ ತನ್ನ ಚುನಾವಣಾ ಖರ್ಚು ವೆಚ್ಚ 21,30,136 ರೂ. ಎಂದು ತೋರಿಸಿದ್ದಾರೆ. ಆದರೆ ಚುನಾವಣಾ ಆಯೋಗದ ವಿಶೇಷ ಖರ್ಚು-ವೆಚ್ಚ ವೀಕ್ಷಕ ತಂಡದವರ ಪ್ರಕಾರ ದಿಗ್ವಿಜಯ್ ಖರ್ಚು ಮಾಡಿರುವ ಮೊತ್ತ 39,47,674 ಎಂದು ಮಾಧ್ಯಮ ಮೂಲಗಳು ವರದಿ ಮಾಡಿವೆ.
ಇದೇ ಪ್ರಜ್ಞಾ ಠಾಕೂರ್ ತಾನು 6,27,663 ರೂ. ಗಳನ್ನು ಚುನಾವಣೆಗಾಗಿ ಖರ್ಚು ಮಾಡಿರುವುದಾಗಿ ವಿವರ ಸಲ್ಲಿಸಿದ್ದಾರೆ. ಆದರೆ ಆಕೆಯ ನೈಜ ಖರ್ಚು ವೆಚ್ಚ ಮೊತ್ತ 13,51,756 ರೂ. ಎಂದು ಚುನಾವಣಾ ಆಯೋಗಕ್ಕೆ ಗೊತ್ತಾಗಿದೆ.
ಚುನಾವಣಾ ಆಯೋಗದ ಮಾರ್ಗದರ್ಶಿ ಸೂತ್ರಗಳ ಪ್ರಕಾರ ಚುನಾವಣಾ ಪ್ರಕ್ರಿಯೆ ಮುಗಿದ 90 ದಿನಗಳ ಒಳಗೆ ನೋಂದಾಯಿತ ರಾಜಕೀಯ ಪಕ್ಷಗಳು ಚುನಾವಣೆಗಾಗಿ ತಾವು ಖರ್ಚು ಮಾಡಿರುವ ಹಣದ ಲೆಕ್ಕಪತ್ರವನ್ನು ಆಯೋಗಕ್ಕೆ ಸಲ್ಲಿಸಬೇಕಿದೆ.