ರಾಹುಲ್‌ ವರ್ತನೆ ಬಾಲಿಷ: ಆರ್‌ಜೆಡಿ ವಕ್ತಾರನಿಗೆ ಗೇಟ್‌ಪಾಸ್‌

Team Udayavani, Jul 24, 2018, 12:11 PM IST

ಪಾಟ್ನಾ : ಸಂಸತ್‌ ಕಲಾಪದಲ್ಲೇ ಪ್ರಧಾನಿ ನರೇಂದ್ರ ಮೋದಿಯನ್ನು ಆಲಿಂಗಿಸಿದ್ದ ಎಐಸಿಸಿ ಅಧ್ಯಕ್ಷ ರಾಹುಲ್‌ ಗಾಂಧಿ ಅವರನ್ನು ಟೀಕಿಸಿದ್ದ ಆರ್‌ಜೆಡಿ ರಾಷ್ಟ್ರೀಯ ವಕ್ತಾರ ಶಂಕರ್‌ ಚರಣ್‌ ತ್ರಿಪಾಠಿ ಅವರನ್ನು ಪಕ್ಷದ ಎಲ್ಲಾ ಹುದ್ದೆಗಳಿಂದ ವಜಾ ಗೊಳಿಸಲಾಗಿದೆ. 

ಆರ್‌ಜೆಡಿ ಪ್ರಧಾನ ಕಾರ್ಯದರ್ಶಿ ಖಾಮರ್‌ ಆಲಮ್‌ ಅವರು ಪಕ್ಷ ವಿರೋಧಿ ಚಟುವಟಿಕೆ ನಡೆಸಿರುವ ಕಾರಣಕ್ಕಾಗಿ ತ್ರಿಪಾಠಿ ಅವರನ್ನು ಹುದ್ದೆಯಿಂದ ವಜಾ ಮಾಡಿರುವುದಾಗಿ ತಿಳಿಸಿದ್ದಾರೆ. 

ರಾಹುಲ್‌ ಅವರು ಸಂಸತ್‌ನಲ್ಲಿ ಪ್ರಧಾನಿ ಎದುರು ಬಾಲಿಷವಾಗಿ ವರ್ತಿಸಿದ್ದಾರೆ. ಪ್ರಧಾನಿ ಅಭ್ಯರ್ಥಿ ಎಂದು ಬಿಂಬಿತವಾಗಿರುವ ವ್ಯಕ್ತಿ ಈ ರೀತಿ ವರ್ತಿಸಬಾರದು ಎಂದು ತ್ರಿಪಾಠಿ ಅವರು ಟೀಕಿಸಿದ್ದರು. 

ಆರ್‌ಜೆಡಿ ಮತ್ತು ಕಾಂಗ್ರೆಸ್‌ ಮಹಾ ಮೈತ್ರಿ ಮಾಡಿಕೊಂಡು ಬಿಹಾರದಲ್ಲಿ ಲೋಕಸಭಾ ಚುನಾವಣೆ ಎದುರಿಸುವ ಎಲ್ಲಾ ಸಿದ್ಧತೆಗಳನ್ನು ಮಾಡಿಕೊಂಡಿದೆ.