ದೇವಾಲಯ ಖಾಸಗಿ ಸೊತ್ತಲ್ಲ, ಮಹಿಳೆಯರಿಗೂ ಪ್ರವೇಶ ಕಲ್ಪಿಸಬೇಕು; ಸುಪ್ರೀಂ
Team Udayavani, Jul 18, 2018, 5:20 PM IST
ನವದೆಹಲಿ: ಕೇರಳದ ಪ್ರಸಿದ್ಧ ಶಬರಿಮಲೆ ದೇವಾಲಯದೊಳಗೆ ಮಹಿಳೆಯರ ಪ್ರವೇಶ ನಿಷೇಧಿಸಿರುವುದು ಸಂವಿಧಾನದ ಅಧ್ಯಾದೇಶಕ್ಕೆ ವಿರುದ್ಧವಾದದ್ದು ಎಂದು ಸುಪ್ರೀಂಕೋರ್ಟ್ ಬುಧವಾರ ಅಭಿಪ್ರಾಯವ್ಯಕ್ತಪಡಿಸಿರುವುದಾಗಿ ಎಎನ್ಐ ನ್ಯೂಸ್ ಏಜೆನ್ಸಿ ವರದಿ ಮಾಡಿದೆ.
ಶಬರಿಮಲೆಗೆ ಜೈವಿಕ ಕಾರಣಗಳಿಂದ ಮಹಿಳೆಯರ ಪ್ರವೇಶವನ್ನು ನಿರಾಕರಿಸುವುದು ಹಾಗೂ ಪ್ರವೇಶ ನಿಷೇಧ ಸಂವಿಧಾನದ ಉಲ್ಲಂಘನೆ ಎಂಬ ಕುರಿತ ಅರ್ಜಿಯ ವಿಚಾರಣೆಯನ್ನು ಮುಖ್ಯ ನ್ಯಾಯಮೂರ್ತಿ ದೀಪಕ್ ಮಿಶ್ರಾ, ಜಸ್ಟೀಸ್ ಗಳಾದ ಫಾಲಿ ನಾರಿಮನ್, ಎಎಂ ಖಾನ್ ವಿಲ್ಕರ್, ಡಿವೈ ಚಂದ್ರಾಚೂಡ್ ಹಾಗೂ ಇಂದು ಮಲೋತ್ರಾ ಅವರನ್ನೊಳಗೊಂಡ ಸಾಂವಿಧಾನಿಕ ಪೀಠ ಕೈಗೆತ್ತಿಕೊಂಡಿದೆ.
ನೀವು(ದೇವಾಲಯದ ಆಡಳಿತ ಮಂಡಳಿ) ಯಾವ ಆಧಾರದ ಮೇಲೆ ಮಹಿಳೆಯರ ಪ್ರವೇಶವನ್ನು ನಿರಾಕರಿಸಿದ್ದೀರಿ? ಇದು ಸಂವಿಧಾನದ ಅಧ್ಯಾದೇಶದ ಉಲ್ಲಂಘನೆ. ಒಂದು ಬಾರಿ ನೀವು ಸಾರ್ವಜನಿಕರಿಗೆ ಮುಕ್ತ ಪ್ರವೇಶ ಎಂಬುದಾಗಿ ಹೇಳಿದ ಮೇಲೆ, ಯಾರು ಬೇಕಾದರು ದೇವಸ್ಥಾನ ಪ್ರವೇಶಿಸಬಹುದು ಎಂದು ಮುಖ್ಯ ನ್ಯಾಯಮೂರ್ತಿ ಮಿಶ್ರಾ ಹೇಳಿದರು.
ಒಂದು ವೇಳೆ ಪುರುಷರು ದೇವಸ್ಥಾನ ಪ್ರವೇಶಿಸಬಹುದಾದರೆ, ಮಹಿಳೆಯರು ಕೂಡಾ ಹೋಗಬಹುದು. ಖಾಸಗಿ ದೇವಾಲಯ ಎಂಬ ಯಾವ ನಿಯಮವೂ ಇಲ್ಲ. ಒಂದು ವೇಳೆ ದೇವಸ್ಥಾನ ಹೌದಾದ ಮೇಲೆ ಇದೊಂದು ಸಾರ್ವಜನಿಕ ಸ್ಥಳ..ಅಲ್ಲಿಗೆ ಪ್ರತಿಯೊಬ್ಬರಿಗೂ ಹೋಗಲು ಅವಕಾಶ ಇರಬೇಕು ಎಂದು ಅಭಿಪ್ರಾಯ ವ್ಯಕ್ತಪಡಿಸಿದರು.
ಈ ವಿವಾದದಲ್ಲಿ ಮೂರನೇ ವ್ಯಕ್ತಿ ಮಧ್ಯಪ್ರವೇಶಿಸಬೇಕೆಂಬ ವಾದವನ್ನು ಪೀಠ ತಳ್ಳಿ ಹಾಕಿದೆ. ದೇವಾಲಯದೊಳಗೆ ಮಹಿಳೆಯರ ಪ್ರವೇಶ ನಿಷೇಧ, ಸಂಪ್ರದಾಯ ಎರಡೂ ಕೂಡಾ ಕಾನೂನು ಬಾಹಿರ. ಅದೇ ರೀತಿ ಅಸಂವಿಧಾನಿಕ ಎಂದು ಹಿರಿಯ ವಕೀಲ ಇಂದ್ರಾಣಿ ಜೈಸಿಂಗ್ ಕೋರ್ಟ್ ಗೆ ತಿಳಿಸಿದರು.
ಸುಮಾರು 800 ವರ್ಷಗಳ ಇತಿಹಾಸ ಹೊಂದಿರುವ ಶಬರಿಮಲೆ ಅಯ್ಯಪ್ಪ ಸ್ವಾಮಿ ದೇವಸ್ಥಾನದೊಳಗೆ ಮಹಿಳೆಯರ ಪ್ರವೇಶ ನಿಷೇಧಿಸಿರುವ ಸಂಪ್ರದಾಯವನ್ನು ಪ್ರಶ್ನಿಸಿ ಇಂಡಿಯನ್ ಯಂಗ್ ಲಾಯರ್ಸ್ ಅಸೋಸಿಯೇಶನ್ ಸುಪ್ರೀಂಕೋರ್ಟ್ ಗೆ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಸಲ್ಲಿಸಿತ್ತು.
ಶಬರಿಮಲೆ ದೇವಾಲಯದೊಳಗೆ 10-50ವರ್ಷದೊಳಗಿನ ಮಹಿಳಾ ಭಕ್ತರಿಗೆ ದೇವಾಲಯದೊಳಕ್ಕೆ ಪ್ರವೇಶ ನೀಡುವ ಬಗ್ಗೆ ಕೇರಳ ಸರ್ಕಾರ, ತಿರುವಾಂಕೂರ್ ದೇವಸ್ವಂ ಮಂಡಳಿ, ಶಬರಿಮಲೆಯ ಮುಖ್ಯ ಅರ್ಚಕ ಹಾಗೂ ಪಟ್ಟಣಂತಿಟ್ಟಾ ಜಿಲ್ಲಾಧಿಕಾರಿಗೆ ನಿರ್ದೇಶನ ನೀಡಬೇಕೆಂದು ಪಿಐಎಲ್ ನಲ್ಲಿ ಮನವಿ ಮಾಡಿಕೊಳ್ಳಲಾಗಿದೆ.
ಕಳೆದ ವರ್ಷ ಅಕ್ಟೋಬರ್ ತಿಂಗಳಿನಲ್ಲಿ ಈ ಅರ್ಜಿಯ ವಿಚಾರಣೆಯನ್ನು ಸುಪ್ರೀಂಕೋರ್ಟ್ ಪಂಚಸದಸ್ಯರ ಸಾಂವಿಧಾನಿಕ ಪೀಠಕ್ಕೆ ವರ್ಗಾಯಿಸಿತ್ತು. ಎಲ್ಲಾ ವಯಸ್ಸಿನ ಮಹಿಳೆಯರೂ ಶಬರಿಮಲೆ ದೇವಾಲಯ ಪ್ರವೇಶಿಸುವ ನಿಲುವಿಗೆ ಕೇರಳ ಸರ್ಕಾರ ಬೆಂಬಲ ಸೂಚಿಸಿದೆ. ಈ ವಿಚಾರದಲ್ಲಿ ರಾಜ್ಯ ಸರ್ಕಾರ 4ನೇ ಬಾರಿ ತನ್ನ ನಿಲುವನ್ನು ಬದಲಿಸುತ್ತಿದೆ ಎಂದು ಮುಖ್ಯ ನ್ಯಾಯಮೂರ್ತಿ ಮಿಶ್ರಾ ಹೇಳಿದರು. ಗುರುವಾರ ಮತ್ತೆ ವಿಚಾರಣೆ ಮುಂದುವರಿಯಲಿದೆ.