ಸಲಿಂಗಕಾಮಿಗಳನ್ನು ಅವಮಾನಿಸಿದ ವಿಂಡೀಸ್ ವೇಗಿ ವಿರುದ್ಧ ಕ್ರಮ
Team Udayavani, Feb 14, 2019, 12:30 AM IST
ಸೇಂಟ್ ಲೂಸಿಯ: ಪ್ರವಾಸಿ ಇಂಗ್ಲೆಂಡ್ ವಿರುದ್ಧ ನಡೆದ 3ನೇ ಟೆಸ್ಟ್ ಪಂದ್ಯದಲ್ಲಿ ಆತಿಥೇಯ ವೆಸ್ಟ್ ಇಂಡೀಸ್ ವೇಗಿ ಶಾನನ್ ಗ್ಯಾಬ್ರಿಯಲ್ ಸಲಿಂಗಕಾಮಿಗಳನ್ನು ನಿಂದಿಸಿ ಇಕ್ಕಟ್ಟಿಗೆ ಸಿಲುಕಿದ್ದಾರೆ. ಅವರಿಗೆ ಐಸಿಸಿ ಶಿಕ್ಷೆ ವಿಧಿಸಿದ್ದು, ಇದು ಏನೆನ್ನುವುದು ಖಚಿತವಾಗಿಲ್ಲ.
ಇಂಗ್ಲೆಂಡ್ ಬ್ಯಾಟ್ಸ್ಮನ್ ಜೋ ರೂಟ್ ಜತೆ ಅನುಚಿತ ಸಂಭಾಷಣೆ ನಡೆಸಿದ ಹಿನ್ನೆಲೆಯಲ್ಲಿ ಈ ಕ್ರಮ ತೆಗೆದುಕೊಳ್ಳಲಾಗಿದೆ. ಬೌಲಿಂಗ್ ವೇಳೆಯಲ್ಲಿ ಗ್ಯಾಬ್ರಿಯಲ್, ಸಲಿಂಗಕಾಮಿಗಳನ್ನು ಅವಮಾನಿಸುವಂತಹ ಮಾತುಗಳನ್ನಾಡಿದ್ದಾರೆಂದು ಹೇಳಲಾಗಿದೆ. ಅದೇನೆಂದು ಇನ್ನೂ ಸ್ಪಷ್ಟವಾಗಿಲ್ಲ. ಆದರೆ ಗ್ಯಾಬ್ರಿಯಲ್ಗೆ ಪ್ರತಿಕ್ರಿಯಿಸುವಾಗ ಜೋ ರೂಟ್, “ಇದನ್ನೆಲ್ಲ ಅವಮಾನಿಸಲು ಬಳಸಬೇಡ, ಸಲಿಂಗಕಾಮಿಯಾಗುವುದು ಅಪರಾಧವಲ್ಲ’ ಎಂದು ಹೇಳಿರುವುದು ಖಚಿತವಾಗಿದೆ. ಇದನ್ನೇ ಆಧರಿಸಿ ಐಸಿಸಿ ಗ್ಯಾಬ್ರಿಯಲ್ ವಿಚಾರಣೆ ನಡೆಸಿ ಕ್ರಮ ಕೈಗೊಳ್ಳಲು ನಿರ್ಧರಿಸಿದೆ.