ದೀಪ್ತಿ ಶರ್ಮ, ಶಫಾಲಿ ವರ್ಮ ಆರ್ಭಟ : ವಿಂಡೀಸ್‌ ವಿರುದ್ಧ ಮತ್ತೂಂದು ವಿಕ್ರಮ

Team Udayavani, Nov 12, 2019, 5:28 AM IST

ಗ್ರಾಸ್‌ ಐಲೆಟ್‌ (ಸೇಂಟ್‌ ಲೂಸಿಯಾ): ಆಫ್ ಸ್ಪಿನ್ನರ್‌ ದೀಪ್ತಿ ಶರ್ಮ ಅವರ ಘಾತಕ ಬೌಲಿಂಗ್‌ ಮತ್ತು ಯುವ ಆರಂಭಿಕ ಆಟಗಾರ್ತಿ ಶಫಾಲಿ ವರ್ಮ ಅವರ ಮತ್ತೂಂದು ಅಮೋಘ ಇನ್ನಿಂಗ್ಸ್‌ ನೆರವಿನಿಂದ ವೆಸ್ಟ್‌ ಇಂಡೀಸ್‌ ಎದುರಿನ 2ನೇ ಟಿ20 ಪಂದ್ಯದಲ್ಲಿ ಪ್ರವಾಸಿ ಭಾರತ 10 ವಿಕೆಟ್‌ಗಳ ಭರ್ಜರಿ ಜಯ ಸಾಧಿಸಿದೆ. ಇದು 5 ಪಂದ್ಯಗಳ ಸರಣಿಯಲ್ಲಿ ಹರ್ಮನ್‌ಪ್ರೀತ್‌ ಕೌರ್‌ ಬಳಗಕ್ಕೆ ಒಲಿದ ಸತತ 2ನೇ ಗೆಲುವು.

ರವಿವಾರದ ಪಂದ್ಯದಲ್ಲಿ ಟಾಸ್‌ ಗೆದ್ದು ಮೊದಲು ಬ್ಯಾಟಿಂಗ್‌ ನಡೆಸಿದ ವೆಸ್ಟ್‌ ಇಂಡೀಸ್‌ ಗಳಿಸಿದ್ದು 7 ವಿಕೆಟಿಗೆ ಕೇವಲ 103 ರನ್‌. ದೀಪ್ತಿ ಶರ್ಮ 10 ರನ್ನಿಗೆ 4 ವಿಕೆಟ್‌ ಉಡಾಯಿಸಿ ಕೆರಿಬಿಯನ್ನರನ್ನು ಕಾಡಿದರು. ಇದು ದೀಪ್ತಿ ಶರ್ಮ ಅವರ ಅತ್ಯುತ್ತಮ ಬೌಲಿಂಗ್‌ ಸಾಧನೆಯಾಗಿದೆ. ಅಮೋಘ ಚೇಸಿಂಗ್‌ ನಡೆಸಿದ ಭಾರತ ಕೇವಲ 10.3 ಓವರ್‌ಗಳಲ್ಲಿ ವಿಕೆಟ್‌ ನಷ್ಟವಿಲ್ಲದೆ 104 ರನ್‌ ಬಾರಿಸಿತು.

ಶಫಾಲಿ ಸತತ 2ನೇ ಅರ್ಧ ಶತಕ
ಇಲ್ಲೇ ನಡೆದ ಮೊದಲ ಪಂದ್ಯದಲ್ಲಿ 73 ರನ್‌ ಬಾರಿಸಿ ಮಿಂಚಿದ್ದ 15ರ ಹರೆಯದ ಶಫಾಲಿ ವರ್ಮ, ದ್ವಿತೀಯ ಮುಖಾಮುಖೀಯಲ್ಲೂ ಅರ್ಧ ಶತಕ ದಾಖಲಿಸಿದರು. ಶಫಾಲಿ ಗಳಿಕೆ 35 ಎಸೆತಗಳಿಂದ ಅಜೇಯ 69 ರನ್‌. ಇದರಲ್ಲಿ 10 ಬೌಂಡರಿ, 2 ಸಿಕ್ಸರ್‌ ಒಳಗೊಂಡಿತ್ತು.

ಮತ್ತೋರ್ವ ಓಪನರ್‌ ಸ್ಮತಿ ಮಂಧನಾ ಔಟಾಗದೆ 30 ರನ್‌ ಮಾಡಿದರು. 28 ಎಸೆತಗಳ ಈ ಇನ್ನಿಂಗ್ಸ್‌ ನಲ್ಲಿ 4 ಬೌಂಡರಿ ಸೇರಿತ್ತು. ವಿಂಡೀಸ್‌ ಒಂದೂ ವಿಕೆಟ್‌ ಉರುಳಿಸಲಾಗದೆ ಹತಾಶೆಗೊಳಗಾಯಿತು.

ಭಾರತದ ಬೌಲಿಂಗ್‌ ದಾಳಿಗೆ ಕೆರಿಬಿಯನ್ನರ ಬಳಿ ಯಾವ ಹಂತದಲ್ಲೂ ಉತ್ತರವಿರಲಿಲ್ಲ. ಅನಿಸಾ ಮೊಹಮ್ಮದ್‌ ಪಡೆ ನಿರಂತರವಾಗಿ ವಿಕೆಟ್‌ ಉರುಳಿಸಿಕೊಳ್ಳುತ್ತ ಹೋಯಿತು. ಮಧ್ಯಮ ಸರದಿಯ ಶಡೀಮ್‌ ನೇಶನ್‌ 32 ಮತ್ತು ಓಪನರ್‌ ಹ್ಯಾಲಿ ಮ್ಯಾಥ್ಯೂಸ್‌ 23 ರನ್‌ ಮಾಡಿ ಒಂದಿಷ್ಟು ಹೋರಾಟ ತೋರಿದರು.

ಸರಣಿಯ 3ನೇ ಪಂದ್ಯ ನ. 14ರಂದು ಗಯಾನಾದ “ಪ್ರೊವಿಡೆನ್ಸ್‌ ಸ್ಟೇಡಿಯಂ’ನಲ್ಲಿ ನಡೆಯಲಿದೆ.

ಸಂಕ್ಷಿಪ್ತ ಸ್ಕೋರ್‌: ವೆಸ್ಟ್‌ ಇಂಡೀಸ್‌-20 ಓವರ್‌ಗಳಲ್ಲಿ 7 ವಿಕೆಟಿಗೆ 103 (ನೇಶನ್‌ 32, ಹ್ಯಾಲಿ 23, ನತಾಶಾ 17, ದೀಪ್ತಿ 10ಕ್ಕೆ 4, ಶಿಖಾ 18ಕ್ಕೆ 1, ರಾಧಾ 20ಕ್ಕೆ 1, ಪೂಜಾ 23ಕ್ಕೆ 1). ಭಾರತ-10.3 ಓವರ್‌ಗಳಲ್ಲಿ ವಿಕೆಟ್‌ ನಷ್ಟವಿಲ್ಲದೆ 104 (ಶಫಾಲಿ ಔಟಾಗದೆ 69, ಮಂಧನಾ ಔಟಾಗದೆ 30). ಪಂದ್ಯಶ್ರೇಷ್ಠ: ದೀಪ್ತಿ ಶರ್ಮ.


ಈ ವಿಭಾಗದಿಂದ ಇನ್ನಷ್ಟು

ಹೊಸ ಸೇರ್ಪಡೆ