ವಿಮಾನದಲ್ಲಿ ಅಭಿಮಾನ ಮೆರೆದ ಅನಿಲ್‌ ಕುಂಬ್ಳೆ

Team Udayavani, Oct 11, 2018, 6:00 AM IST

ಬೆಂಗಳೂರು: ಇದು ವಿಮಾನ ಪ್ರಯಾಣದ ವೇಳೆ ಮಾಜಿ ಕ್ರಿಕೆಟಿಗ ಅನಿಲ್‌ ಕುಂಬ್ಳೆ ಅಭಿಮಾನಿಯೊಬ್ಬರೊಂದಿಗೆ ಬೆರೆತು ಅವರ ಹೃದಯ ಗೆದ್ದ ಘಟನೆ. ಸ್ವತಃ ಅಭಿಮಾನಿ ಸೋಹಿನಿ ಎಂಬವರು ಇದನ್ನು ಬಹಳ ಸಂತಸದಿಂದ ಟ್ವೀಟ್‌ ಮೂಲಕ ಹಂಚಿಕೊಂಡಿದ್ದಾರೆ.

ಸೋಹಿನಿ ಬೆಂಗಳೂರಿನಿಂದ ಮುಂಬಯಿಗೆ ವಿಮಾನದಲ್ಲಿ ಪಯಣಿಸುತ್ತಿದ್ದರು. ಇದೇ ವಿಮಾನದಲ್ಲಿ ಮಾಜಿ ಕ್ರಿಕೆಟಿಗ ಅನಿಲ್‌ ಕುಂಬ್ಳೆ ಕೂಡ ಇರುವುದನ್ನು ಗಮನಿಸಿದ ಸೋಹಿನಿ, ಬಹಳ ಖುಷಿಯಿಂದ ಟ್ವೀಟ್‌ ಮಾಡುತ್ತಾರೆ. “ಲೆಜೆಂಡ್ರಿ ಅನಿಲ್‌ ಕುಂಬ್ಳೆ ಕೂಡ ಇದೇ ವಿಮಾನದಲ್ಲಿದ್ದಾರೆ. ಅವರ ಬಳಿ ಹೋಗಿ, ಅವರು ನಮಗೆ ಕೊಡಿಸಿದ ಕ್ರಿಕೆಟಿನ ಎಲ್ಲ ಸಂತಸ, ಗೆಲುವು ಹಾಗೂ ಸ್ಮರಣೀಯ ಕ್ಷಣಗಳಿಗೆ ದೊಡ್ಡದೊಂದು ಕೃತಜ್ಞತೆ ಸಲ್ಲಿಸಬೇಕೆಂದು ಅನಿಸುತ್ತಿದೆ. ಮುಖ್ಯವಾಗಿ ಮುಖಕ್ಕೆ ಬ್ಯಾಂಡೇಜ್‌ ಸುತ್ತಿಕೊಂಡು ಬೌಲಿಂಗ್‌ ನಡೆಸಿದ ಆ ಗಳಿಗೆಯನ್ನೊಮ್ಮೆ ಅವರೊಂದಿಗೆ ಸ್ಮರಿಸಿಕೊಳ್ಳಬೇಕೆನಿಸಿದೆ. ಆದರೇಕೋ ಹಿಂಜರಿಕೆ ಆಗುತ್ತಿದೆ’ ಎಂಬುದಾಗಿ ಹೇಳಿಕೊಳ್ಳುತ್ತಾರೆ.

ಇದನ್ನು ಗಮನಿಸಿದ ಅನಿಲ್‌ ಕುಂಬ್ಳೆ, ಕೂಡಲೇ ಆ ಅಭಿಮಾನಿಯ ಟ್ವೀಟ್‌ಗೆ ಸಕಾರಾತ್ಮಕವಾಗಿ ಸ್ಪಂದಿಸುತ್ತಾರೆ. “ದಯವಿಟ್ಟು ವಿಮಾನ ಟೇಕ್‌ಆಫ್ ಆದೊಡನೆ ನನ್ನ ಬಳಿ ಬನ್ನಿ’ ಎಂದು ಆಹ್ವಾನ ನೀಡುತ್ತಾರೆ. ನುಡಿದಂತೆ ನಡೆದುಕೊಳ್ಳುತ್ತಾರೆ. ಸೋಹಿನಿ ಅವರ ಬೋರ್ಡಿಂಗ್‌ ಪಾಸ್‌ ಮೇಲೆ ಹಸ್ತಾಕ್ಷರ ನೀಡುತ್ತಾರೆ. “ಥ್ಯಾಂಕ್ಯೂ ಅನಿಲ್‌ ಕುಂಬ್ಳೆ, ವಿನಮ್ರತೆಯನ್ನು ನಿಮ್ಮಿಂದ ಕಲಿಯಬೇಕಿದೆ’ ಎಂದು ಲೆಜೆಂಡ್ರಿ ಕ್ರಿಕೆಟಿಗನ ಹಸ್ತಾಕ್ಷರದ ಬೋರ್ಡಿಂಗ್‌ ಪಾಸ್‌ ಚಿತ್ರವನ್ನು ಪೋಸ್ಟ್‌ ಮಾಡಿದ್ದಾರೆ. ಇದಕ್ಕೀಗ ತಾನು ಫ್ರೆಮ್‌ ಹಾಕಿಸಿ ಇಡುತ್ತೇನೆ ಎಂದು ಸೋಹಿನಿ ಹೆಮ್ಮೆಯಿಂದ ಹೇಳಿದ್ದಾರೆ.