ಆ್ಯಶಸ್ ಟ್ರೋಫಿ: ಸತತ ವಿಕೆಟ್ ಕಳೆದುಕೊಂಡ ಇಂಗ್ಲೆಂಡ್, ಮೊದಲ ಪಂದ್ಯ ಗೆದ್ದ ಆಸ್ಟ್ರೇಲಿಯಾ

Team Udayavani, Dec 11, 2021, 11:05 AM IST

ಬ್ರಿಸ್ಬೇನ್: ಆ್ಯಶಸ್ ಸರಣಿಯ ಮೊದಲ ಪಂದ್ಯದಲ್ಲಿ ಆಸ್ಟ್ರೇಲಿಯಾ ತಂಡವು ಇಂಗ್ಲೆಂಡ್ ವಿರುದ್ಧ ಜಯಭೇರಿ ಸಾಧಿಸಿದೆ. ಗಾಬಾ ಪಂದ್ಯವನ್ನು 9 ವಿಕೆಟ್ ಅಂತರದಿಂದ ಗೆದ್ದ ಪ್ಯಾಟ್ ಕಮಿನ್ಸ್ ಪಡೆ ಸರಣಿಯಲ್ಲಿ 1-0 ಅಂತರದ ಮುನ್ನಡೆ ಸಾಧಿಸಿದೆ.

ಎರಡು ವಿಕೆಟ್ ನಷ್ಟಕ್ಕೆ 220 ರನ್ ಗಳಿಸಿದ್ದಲ್ಲಿಂದ ನಾಲ್ಕನೇ ದಿನದಾಟ ಆರಂಭಿಸಿದ ಇಂಗ್ಲೆಂಡ್ ಇಂದು 297 ರನ್ ಗಳಿಗೆ ತನ್ನೆಲ್ಲಾ ವಿಕೆಟ್ ಕಳೆದುಕೊಂಡಿತು. ಶುಕ್ರವಾರದ ಆಟದಲ್ಲಿ ಕ್ರೀಸ್ ಕಚ್ಚಿ ಪ್ರತಿರೋಧ ತೋರಿದ್ದ ನಾಯಕ ಜೋ ರೂಟ್ ಮತ್ತು ಡೇವಿಡ್ ಮಲಾನ್ ಇಂದು ಆರಂಭದಲ್ಲೇ ವಿಕೆಟ್ ಒಪ್ಪಿಸಿದರು. ರೂಟ್ 89 ರನ್ ಗಳಿಸಿದರೆ, ಮಲಾನ್ 82 ರನ್ ಬಾರಿಸಿದರು.

ನಂತರ ಬಂದ ಆಟಗಾರರು ಯಾರೂ ಆಸೀಸ್ ಬೌಲಿಂಗ್ ಗೆ ಸೆಡ್ಡು ಹೊಡೆದು ನಿಲ್ಲುವ ಪ್ರಯತ್ನ ಮಾಡಲಿಲ್ಲ. ಸ್ಟೋಕ್ಸ್, ಪೋಪ್, ಬಟ್ಲರ್ ಅಗ್ಗಕ್ಕೆ ಔಟಾದರು.

ವಿಕೆಟ್ ಬರ ಅನುಭವಿಸುತ್ತಿದ್ದ ಸ್ಪಿನ್ನರ್ ನಥನ್ ಲಿಯಾನ್ ನಾಲ್ಕು ವಿಕೆಟ್ ಕಿತ್ತರು. ಈ ಮೂಲಕ ಟೆಸ್ಟ್ ಕ್ರಿಕೆಟ್ ನಲ್ಲಿ 400 ವಿಕೆಟ್ ಕಿತ್ತ ಮೈಲುಗಲ್ಲು ನೆಟ್ಟರು.

ಇದನ್ನೂ ಓದಿ:400 ಟೆಸ್ಟ್ ವಿಕೆಟ್ ಕಿತ್ತು ದಾಖಲೆ ಬರೆದ ನಥನ್ ಲಿಯಾನ್

ಗೆಲುವಿಗೆ ಕೇವಲ 20 ರನ್ ಗಳಿಸಬೇಕಾದ ಸುಲಭ ಗುರಿ ಪಡೆದ ಆಸೀಸ್ ತಂಡ ಒಂದು ವಿಕೆಟ್ ಕಳೆದುಕೊಂಡು ಜಯ ಸಾಧಿಸಿತು. ಆರಂಭಿಕನಾಗಿ ಬಂದ ಅಲೆಕ್ಸ್ ಕ್ಯಾರಿ 9 ರನ್ ಗಳಿಸಿ ಔಟಾದರು. ಮೊದಲ ಇನ್ನಿಂಗ್ಸ್ ನಲ್ಲಿ ಭರ್ಜರಿ ಶತಕ ಬಾರಿಸಿದ್ದ ಟ್ರಾವಿಸ್ ಹೆಡ್ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದರು.