ಚೆನ್ನೈಯಲ್ಲಿ ಧನಂಜಯಗೆ ಬೌಲಿಂಗ್ ಟೆಸ್ಟ್
Team Udayavani, Feb 2, 2019, 2:26 AM IST
ಕೊಲಂಬೊ: ಅಕ್ರಮ ಬೌಲಿಂಗ್ ಶೈಲಿಯಿಂದ ಕಳೆದ ವರ್ಷ ನಿಷೇಧಕೊಳ್ಳಗಾದ ಶ್ರೀಲಂಕಾದ ಸ್ಪಿನ್ನರ್ ಅಖೀಲ ಧನಂಜಯ ಚೆನ್ನೈಯಲ್ಲಿ ಬೌಲಿಂಗ್ ಟೆಸ್ಟ್ ಎದುರಿಸಲಿದ್ದಾರೆ ಎಂದು ಶ್ರೀಲಂಕಾ ಕ್ರಿಕೆಟ್ ಮಂಡಳಿ ತಿಳಿಸಿದೆ.
‘ಸ್ಪಿನ್ನರ್ ಅಖೀಲ ಧನಂಜಯ ಈಗಾಗಲೇ ಚೆನ್ನೈಗೆ ತೆರಳಿದ್ದು, ಶ್ರೀರಾಮಚಂದ್ರ ಉನ್ನತ ಶಿಕ್ಷಣ ಹಾಗೂ ಸಂಶೋಧನಾ ಕಾಲೇಜಿನ ಕ್ರೀಡಾ ವಿಜ್ಞಾನ ವಿಭಾಗದಲ್ಲಿ ಬೌಲಿಂಗ್ ಪರೀಕ್ಷೆ ಎದುರಿಸಲಿದ್ದಾರೆ’ ಎಂದು ಶ್ರೀಲಂಕಾ ಕ್ರಿಕೆಟ್ ಮಂಡಳಿ ಹೇಳಿದೆ.
ಕಳೆದ ವರ್ಷ ಇಂಗ್ಲೆಂಡ್ ವಿರುದ್ಧದ ಟೆಸ್ಟ್ ಸರಣಿಯ ವೇಳೆ ಧನಂಜಯ ಅವರ ಬೌಲಿಂಗ್ ಶೈಲಿ ಸಂಶಯಾಸ್ಪದವಾಗಿತ್ತು. ಇದಾದ ಬಳಿಕ ಡಿಸೆಂಬರ್ನಲ್ಲಿ ಐಸಿಸಿ ಅವರ ಬೌಲಿಂಗಿಗೆ ನಿಷೇಧ ಹೇರಿತ್ತು. ಏಕದಿನ ಕ್ರಿಕೆಟಿನಲ್ಲಿ ಶ್ರೀಲಂಕಾದ ಅತ್ಯುತ್ತಮ ಬೌಲರ್ ಎನಿಸಿರುವ ಧನಂಜಯ ಕಳೆದ 16 ಏಕದಿನಗಳಲ್ಲಿ 28 ವಿಕೆಟ್, 5 ಟೆಸ್ಟ್ಗಳಲ್ಲಿ 27 ವಿಕೆಟ್ ಉರುಳಿಸಿದ್ದಾರೆ.