ಟಿ20 ವಿಶ್ವಕಪ್‌ ಕ್ರಿಕೆಟ್‌: ಕೊನೆಗೂ ಗ್ರೀನ್‌ಗೆ ಹಸಿರು ನಿಶಾನೆ

Team Udayavani, Oct 21, 2022, 6:15 AM IST

ಸಿಡ್ನಿ: ಸ್ಫೋಟಕ ಬ್ಯಾಟಿಂಗ್‌ ಆಲ್‌ರೌಂಡರ್‌ ಕ್ಯಾಮೆರಾನ್‌ ಗ್ರೀನ್‌ ಅವರಿಗೆ ಕೊನೆಗೂ ಆಸ್ಟ್ರೇಲಿಯದ ಟಿ20 ವಿಶ್ವಕಪ್‌ ಕ್ರಿಕೆಟ್‌ ತಂಡದಲ್ಲಿ ಸ್ಥಾನ ಲಭಿಸಿದೆ.

ಮೀಸಲು ವಿಕೆಟ್‌ ಕೀಪರ್‌-ಬ್ಯಾಟರ್‌ ಜೋಶ್‌ ಇಂಗ್ಲಿಸ್‌ ಗಾಯಾಳಾಗಿ ಹೊರಬಿದ್ದ ಕಾರಣ ಗ್ರೀನ್‌ ಅವರಿಗೆ ಅವಕಾಶ ಸಿಕ್ಕಿತು. 27 ವರ್ಷದ ಜೋಶ್‌ ಇಂಗ್ಲಿಸ್‌ ನ್ಯೂ ಸೌತ್‌ ವೇಲ್ಸ್‌ನ  ಲಾ ಪೆರೌಸ್‌ ಕ್ಲಬ್‌ನಲ್ಲಿ ಗಾಲ್ಫ್ ಆಡುತ್ತಿದ್ದಾಗ ಸ್ನಾಯು ಸೆಳೆತಕ್ಕೆ ಒಳಗಾಗಿದ್ದರು. ಕೂಟದ ತಾಂತ್ರಿಕ ಸಮಿತಿ ಬದಲಾವಣೆಗೆ ಸಮ್ಮತಿ ನೀಡಿದ ಬಳಿಕ ಕ್ಯಾಮರಾನ್‌ ಗ್ರೀನ್‌ ಅವರನ್ನು ಸೇರಿಸಿಕೊಳ್ಳಲಾಯಿತು.

ಬಿಗ್‌ ಹಿಟ್ಟಿಂಗ್‌ ಬ್ಯಾಟರ್‌ ಆಗಿರುವ ಕ್ಯಾಮೆರಾನ್‌ ಗ್ರೀನ್‌ ಯಾವ ಕ್ರಮಾಂಕದಲ್ಲೂ ಹೊಂದಿಕೊಳ್ಳುವ ಆಟಗಾರ. ಕಳೆದ ಭಾರತ ಪ್ರವಾಸದ ವೇಳೆ ಡೇವಿಡ್‌ ವಾರ್ನರ್‌ ಅವರ ಓಪನಿಂಗ್‌ ಸ್ಥಾನವನ್ನು ಯಶಸ್ವಿಯಾಗಿ ತುಂಬಿದ್ದರು. 2 ಅರ್ಧಶತಕ ಬಾರಿಸಿ ಅಬ್ಬರಿಸಿದ್ದರು. ಇದಕ್ಕೂ ಮೊದಲು ನ್ಯೂಜಿಲೆಂಡ್‌ ಎದುರಿನ ಸರಣಿಯಲ್ಲೂ ಗ್ರೀನ್‌ ಆಟ ಅಮೋಘ ಮಟ್ಟದಲ್ಲಿತ್ತು. 7 ಟಿ20 ಪಂದ್ಯಗಳಿಂದ 136 ರನ್‌ ಪೇರಿಸುವ ಜತೆಗೆ ತಮ್ಮ ಮಧ್ಯಮ ವೇಗದ ಬೌಲಿಂಗ್‌ ಮೂಲಕ 5 ವಿಕೆಟ್‌ ಉರುಳಿಸಿದ್ದರು.

ಆದರೂ ಗ್ರೀನ್‌ ಅವರನ್ನು ವಿಶ್ವಕಪ್‌ ತಂಡದಿಂದ ಹೊರಗಿರಿಸಿದ್ದು ಆಸ್ಟ್ರೇಲಿಯದ ಕ್ರಿಕೆಟ್‌ ಅಭಿಮಾನಿಗಳಿಗೆ ಅಚ್ಚರಿಯಾಗಿ ಕಂಡಿತ್ತು. ಮಾಜಿಗಳನೇಕರು ಆಯ್ಕೆಸಮಿತಿಯ ನಡೆಯನ್ನು ಟೀಕಿಸಿದ್ದರು. ಇದೀಗ ಗ್ರೀನ್‌ ಆಗಮನದಿಂದ ಆಸೀಸ್‌ ತಂಡ ಹೆಚ್ಚು ಬಲಿಷ್ಠಗೊಂಡಿರುವುದರಲ್ಲಿ ಅನುಮಾನವಿಲ್ಲ.