ರಾಯ್, ಎಡುಲ್ಜಿಗೆ 3.5 ಕೋಟಿ ರೂ. ವೇತನ
Team Udayavani, Oct 23, 2019, 11:21 PM IST
ಮುಂಬಯಿ: ವಿನೋದ್ ರಾಯ್, ಡಯಾನ ಎಡುಲ್ಜಿ 33 ತಿಂಗಳ ಬಿಸಿಸಿಐ ಆಡಳಿತಾಧಿಕಾರಿಗಳ ಹುದ್ದೆಯಿಂದ ನಿರ್ಗಮಿಸಿದ್ದಾರೆ. ಇವರಿಗೆ ತಲಾ 3.5 ಕೋಟಿ ರೂ. ವೇತನ ನೀಡಲು ನಿರ್ಧರಿಸಲಾಗಿದೆ.
ಆದರೆ ಇವರೊಂದಿಗೇ ಅಧಿಕಾರ ಸ್ವೀಕರಿಸಿದ ಖ್ಯಾತ ಇತಿಹಾಸಕಾರ, ಕ್ರೀಡಾ ಬರಹಗಾರ ರಾಮಚಂದ್ರ ಗುಹಾ ತಮ್ಮ ಪಾಲಿನ 40 ಲಕ್ಷ ರೂ. ಸಂಭಾವನೆಯನ್ನು ನಿರಾಕರಿಸಿದ್ದಾರೆ. ಇವರು ಕೆಲವು ತಿಂಗಳು ಮಾತ್ರ ಆಡಳಿತಾಧಿಕಾರಿಯಾಗಿದ್ದರು. ಈ ಕಿರು ಅವಧಿಗೆ ತಮಗೆ ವೇತನ ಬೇಡವೆಂದು ಹೇಳಿರುವ ಗುಹಾ, ಇದಕ್ಕೆ ಸ್ಪಷ್ಟ ಕಾರಣ ನೀಡಿಲ್ಲ. ಇದು ಖಾಸಗಿ ವಿಷಯ ಎಂದಷ್ಟೇ ಹೇಳಿದ್ದಾರೆ.
ಇದೇ ವೇಳೆ ಇನ್ನೊಬ್ಬ ಸದಸ್ಯ, ಉದ್ಯಮಿ ವಿಕ್ರಮ್ ಲಿಮಯೆ ಕೂಡ 50.5 ಲಕ್ಷ ರೂ. ವೇತನ ನಿರಾಕರಿಸಿದ್ದಾರೆ. ತಾನು ಆರಂಭಿಕ ಸಭೆಯಲ್ಲೇ ವೇತನ ನಿರಾಕರಿಸಿದ್ದೆ, ಅದೇ ನಿಲುವಿಗೆ ಬದ್ಧನಾಗಿದ್ದೇನೆ ಎಂದಿದ್ದಾರೆ.