ಟ್ವೆಂಟಿ20 ಕ್ರಿಕೆಟ್: 400 ವಿಕೆಟ್ ಕಿತ್ತ ಬ್ರಾವೊ
Team Udayavani, Dec 22, 2017, 9:25 AM IST
ಸಿಡ್ನಿ: ಕೆಎಫ್ಸಿ ಬಿಗ್ ಬಾಶ್ ಲೀಗ್ನಲ್ಲಿ ಮೆಲ್ಬರ್ನ್ ರೆನೆಗಡೆಸ್ ತಂಡವನ್ನು ಪ್ರತಿನಿಧಿಸುತ್ತಿರುವ ಡ್ವೇನ್ ಬ್ರಾವೊ ಅವರು ಟ್ವೆಂಟಿ20 ಕ್ರಿಕೆಟ್ನಲ್ಲಿ 400 ವಿಕೆಟ್ ಕಿತ್ತ ಮೊದಲ ಕ್ರಿಕೆಟಿಗ ಎಂದೆನಿಸಿಕೊಂಡಿದ್ದಾರೆ.
ಹೋಬರ್ಟ್ ಹುರಿಕೇನ್ಸ್ ವಿರುದ್ಧದ ಪಂದ್ಯದಲ್ಲಿ ಬ್ರಾವೊ ಈ ಸಾಧನೆ ಮಾಡಿದರು. ಈ ಪಂದ್ಯದಲ್ಲಿ ಬ್ರಾವೊ 28 ರನ್ ವೆಚ್ಚದಲ್ಲಿ 5 ವಿಕೆಟ್ ಕಿತ್ತ ಕಾರಣ ಮೆಲ್ಬರ್ನ್ ರೆನೆಗಡೆಸ್ ತಂಡವು ಹೋಬರ್ಟ್ ಹುರಿಕೇನ್ಸ್ ತಂಡವನ್ನು 7 ವಿಕೆಟ್ ಅಂತರದಿಂದ ಸೋಲಿಸಲು ಸಾಧ್ಯವಾಯಿತು.
ಕಳೆದ ವರ್ಷ ಸಪ್ಟೆಂಬರ್ನಲ್ಲಿ ಪಾಕಿಸ್ಥಾನ ವಿರುದ್ಧದ ಪಂದ್ಯದಲ್ಲಿ ಬ್ರಾವೊ ಕೆರಿಬಿಯನ್ ತಂಡವನ್ನು ಟ್ವೆಂಟಿ20 ಪಂದ್ಯದಲ್ಲಿ ಪ್ರತಿನಿಧಿಸಿದ್ದರು. ಯಾವುದೇ ಮಾದರಿಯ ಕ್ರಿಕೆಟ್ನಲ್ಲಿ ರಾಷ್ಟ್ರೀಯ ತಂಡಕ್ಕೆ ಮರಳುವ ಸಾಧ್ಯತೆಯಿಲ್ಲ ಎಂದು ಬ್ರಾವೊ ಈ ಸಂದರ್ಭದಲ್ಲಿ ಹೇಳಿದ್ದಾರೆ.
ಅಂತಾರಾಷ್ಟ್ರೀಯ ಪಂದ್ಯಕ್ಕೆ ಸಂಬಂಧಿಸಿ ನನ್ನನ್ನು ವೆಸ್ಟ್ಇಂಡೀಸ್ ತಂಡದಿಂದ ಕೈಬಿಟ್ಟಿದ್ದಾರೆ. ಫಿಟ್ ಇದ್ದಾಗಲೂ ನನ್ನನ್ನು ಕೈಬಿಡಲಾಗಿದೆ. ಇದೀಗ ನನಗೆ 34 ವರ್ಷ. ಹಾಗಾಗಿ ತಂಡಕ್ಕೆ ಮರಳುವ ಸಾಧ್ಯತೆ ಕಷ್ಟ ಎಂದು ಬ್ರಾವೊ ಹೇಳಿದ್ದಾರೆ.