ಅಫ್ಘಾನ್ ವಿರುದ್ಧ ಪ್ರಯಾಸದ ಗೆಲುವು: ಫೈನಲ್ ತಲುಪಿದ ಇಂಗ್ಲೆಂಡ್ ಅಂಡರ್ 19 ತಂಡ
Team Udayavani, Feb 2, 2022, 8:48 AM IST
ಆ್ಯಂಟಿಗಾ: ಅಂಡರ್ 19 ವಿಶ್ವಕಪ್ ಕೂಟದ ಮೊದಲ ಸೆಮಿ ಫೈನಲ್ ಪಂದ್ಯದಲ್ಲಿ ಅಫ್ಘಾನಿಸ್ಥಾನದ ವಿರುದ್ಧ ಪ್ರಯಾಸದ ಗೆಲುವು ದಾಖಲಿಸಿದ ಇಂಗ್ಲೆಂಡ್ ಫೈನಲ್ ತಲುಪಿದೆ.
ಇಲ್ಲಿನ ವಿವಿಯನ್ ರಿಚರ್ಡ್ ಸ್ಟೇಡಿಯಂನಲ್ಲಿ ನಡೆದ ಪಂದ್ಯಕ್ಕೆ ಮಳೆ ಅಲ್ಪಕಾಲ ಅಡ್ಡಿಯಾಯಿತು. 47 ಓವರ್ ಗೆ ಇಳಿಸಲ್ಪಟ್ಟ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಇಂಗ್ಲೆಂಡ್ ಆರು ವಿಕೆಟ್ ನಷ್ಟಕ್ಕೆ 231 ರನ್ ಗಳಿಸಿದರೆ, ಅಫ್ಘಾನ್ ತಂಡ 215 ರನ್ ಗಳಿಸಲಷ್ಟೇ ಶಕ್ತವಾಯಿತು. 15 ರನ್ ಗೆಲುವು ದಾಖಲಿಸಿದ ಇಂಗ್ಲೆಂಡ್ ಫೈನಲ್ ಗೆ ಎಂಟ್ರಿಯಾಯಿತು.
ಇಂಗ್ಲೆಂಡ್ ತಂಡಕ್ಕೆ ಅಫ್ಘಾನ್ ಬೌಲರ್ ಗಳು ಆರಂಭದಲ್ಲಿ ಬೆವರಿಳಿಸಿದರು. ಆರಂಭಿಕ ಥೋಮಸ್ 50 ರನ್ ಗಳಿಸಿದ್ದು ಬಿಟ್ಟರೆ ಬೇರೆಯವರಿಂದ ಉತ್ತಮ ಬೆಂಬಲ ಸಿಗಲಿಲ್ಲ. ಒಂದು ಹಂತದಲ್ಲಿ ಇಂಗ್ಲೆಂಡ್ 136 ರನ್ ಗೆ ಆರು ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿತ್ತು. ಆದರೆ ಏಳನೇ ವಿಕೆಟ್ ಗೆ ಜೊತೆಯಾದ ಬೆಲ್ ಮತ್ತು ಅಲೆಕ್ಸ್ ಹಾರ್ಟನ್ 95 ರನ್ ಜೊತೆಯಾಟ ನಡೆಸಿದರು. ಬೆಲ್ 56 ರನ್ ಗಳಿಸಿದರೆ, ಹಾರ್ಟನ್ 53 ರನ್ ಗಳಿಸಿದರು.
ಅಫ್ಘಾನ್ ಸ್ಪಿನ್ನರ್ ಗಳು ಉತ್ತಮ ದಾಳಿ ನಡೆಸಿದರು. ಮೂವರು ಸ್ಪಿನ್ನರ್ ಗಳು ಸೇರಿ 29 ಓವರ್ ಗಳಲ್ಲಿ ಕೇವಲ 94 ರನ್ ನೀಡಿ ನಾಲ್ಕು ವಿಕೆಟ್ ಕಿತ್ತರೆ, ಇಬ್ಬರು ವೇಗಿಗಳು 18 ಓವರ್ ನಲ್ಲಿ 134 ರನ್ ನೀಡಿ ದುಬಾರಿಯಾದರು.
ಇದನ್ನೂ ಓದಿ:ಭಾರತ-ಆಸ್ಟ್ರೇಲಿಯ: ಫೈನಲ್ ಗೂ ಮಿಗಿಲಾದ ಪೈಪೋಟಿ
ಗುರಿ ಬೆನ್ನತ್ತಿದ ಅಫ್ಘಾನ್ ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಗುರಿಯಾಯಿತು. ಇಶಾಕ್ 43, ಅಲ್ಲಾ ನೂರ್ 60, ಅಬ್ದುಲ್ ಹಾದಿ 37 ರನ್ ಗಳಿಸಿದರು. ಕೊನೆಯಲ್ಲಿ 47 ಓವರ್ ಗಳಲ್ಲಿ 9 ವಿಕೆಟ್ ಕಳೆದುಕೊಂಡು 215 ರನ್ ಅಷ್ಟೇ ಗಳಿಸಿತು. ಈ ಮೂಲಕ ಫೈನಲ್ ತಲುಪುವ ಐತಿಹಾಸಿಕ ಸಾಧನೆಯಿಂದ ವಂಚಿತವಾಯಿತು.
ಇಂದು ಭಾರತ ಮತ್ತು ಆಸ್ಟ್ರೇಲಿಯಾ ನಡುವೆ ಎರಡನೇ ಸೆಮಿ ಫೈನಲ್ ಪಂದ್ಯ ನಡೆಯಲಿದೆ.