ಮಾರ್ಗನ್‌ ಸೆಂಚುರಿ; ಇಂಗ್ಲೆಂಡ್‌ ಜಯಭೇರಿ

Team Udayavani, May 26, 2017, 10:45 AM IST

ಇಂಗ್ಲೆಂಡ್‌-ದಕ್ಷಿಣ ಆಫ್ರಿಕಾ ಏಕದಿನ ಸರಣಿ
ಲೀಡ್ಸ್‌: ಐಸಿಸಿ ಚಾಂಪಿಯನ್ಸ್‌ ಟ್ರೋಫಿ ಪಂದ್ಯಾವಳಿಗೆ ಪೂರ್ವಭಾವಿಯಾಗಿ ನಡೆಯುತ್ತಿರುವ 3 ಪಂದ್ಯಗಳ ಏಕದಿನ ಸರಣಿಯ ಮೊದಲ ಮುಖಾ ಮುಖೀಯಲ್ಲಿ ಆತಿಥೇಯ ಇಂಗ್ಲೆಂಡ್‌ 72 ರನ್ನುಗಳ ಅಂತರದಿಂದ ದಕ್ಷಿಣ ಆಫ್ರಿಕಾವನ್ನು ಮಣಿಸಿದೆ.

ಹೇಡಿಂಗ್ಲೆ ಅಂಗಳದಲ್ಲಿ ಟಾಸ್‌ ಸೋತು ಬ್ಯಾಟಿಂಗಿಗೆ ಇಳಿಸಲ್ಪಟ್ಟ ಇಂಗ್ಲೆಂಡ್‌, ನಾಯಕ ಎವೋನ್‌ ಮಾರ್ಗನ್‌ ಅವರ ಆಕ್ರಮಣಕಾರಿ ಶತಕದ ನೆರವಿನಿಂದ 6 ವಿಕೆಟಿಗೆ 339 ರನ್‌ ಪೇರಿಸಿದರೆ, ದಕ್ಷಿಣ ಆಫ್ರಿಕಾ 45 ಓವರ್‌ಗಳಲ್ಲಿ 267 ರನ್ನುಗಳಿಗೆ ಆಲೌಟ್‌ ಆಯಿತು. 

ಇಂಗ್ಲೆಂಡಿನ ಆರಂಭ ಅಷ್ಟೇನೂ ಬಿರುಸಿನಿಂದ ಕೂಡಿರಲಿಲ್ಲ. ಆದರೆ 35ನೇ ಓವರ್‌ ಬಳಿಕ ಒಮ್ಮೆಲೇ ರನ್‌ ಪ್ರವಾಹ ಹರಿದು ಬರತೊಡಗಿತು. ಮಾರ್ಗನ್‌ ಆಕ್ರಮಣಕಾರಿ ಬ್ಯಾಟಿಂಗ್‌ ಮೂಲಕ ಹರಿಣಗಳ ದಾಳಿಯನ್ನು ಪುಡಿಗುಟ್ಟತೊಡಗಿದರು. ಇವರಿಗೆ ಮೊಯಿನ್‌ ಅಲಿ ಅವರಿಂದ ಪ್ರಚಂಡ ಬೆಂಬಲ ಸಿಕ್ಕಿತು. 13.3 ಓವರ್‌ಗಳಿಂದ 6ನೇ ವಿಕೆಟಿಗೆ 117 ರನ್‌ ಹರಿದು ಬಂತು. ಮಾರ್ಗನ್‌ 93 ಎಸೆತಗಳಿಂದ 107 ರನ್‌ ಸಿಡಿಸಿದರು. ಅವರ ಈ 11ನೇ ಏಕದಿನ ಶತಕದಲ್ಲಿ 7 ಬೌಂಡರಿ, 5 ಸಿಕ್ಸರ್‌ ಒಳಗೊಂಡಿತ್ತು. ಅಲಿ 51 ಎಸೆತಗಳಿಂದ ಅಜೇಯ 77 ರನ್‌ ಬಾರಿಸಿ ದರು. 5 ಬೌಂಡರಿ, 5 ಸಿಕ್ಸರ್‌ ಎತ್ತಿ ತವರಿನ ಕ್ರಿಕೆಟ್‌ ಪ್ರಿಯರನ್ನು ಭರಪೂರ ರಂಜಿಸಿದರು.

67 ರನ್‌ ಮಾಡಿದ ಆರಂಭಕಾರ ಅಲೆಕ್ಸ್‌ ಹೇಲ್ಸ್‌ ಇಂಗ್ಲೆಂಡ್‌ ಸರದಿಯ ಮತ್ತೂಬ್ಬ ಪ್ರಮುಖ ಸ್ಕೋರರ್‌. ರೂಟ್‌ 37 ರನ್‌ ಹೊಡೆದರು. 

ದೊಡ್ಡ ಮೊತ್ತವನ್ನು ಬೆನ್ನಟ್ಟಲಿಳಿದ ದಕ್ಷಿಣ ಆಫ್ರಿಕಾ ಡಿ ಕಾಕ್‌ (5) ಅವರನ್ನು ಬೇಗನೇ ಕಳೆದುಕೊಂಡಿತು. ಆಮ್ಲ (73)-ಡು ಪ್ಲೆಸಿಸ್‌ (67) ದ್ವಿತೀಯ ವಿಕೆಟಿಗೆ 112 ರನ್‌ ಪೇರಿಸಿ ಹೋರಾಟವನ್ನು ಜಾರಿಯಲ್ಲಿರಿಸಿದರು. ಆದರೆ ಇವರಿಬ್ಬರು ನಾಲ್ಕೇ ರನ್‌ ಅಂತರದಲ್ಲಿ ಪೆವಿಲಿಯನ್‌ ಸೇರಿಕೊಂಡ ಬಳಿಕ ಇಂಗ್ಲೆಂಡ್‌ ಬೌಲರ್‌ಗಳಿಗೆ ಬಲ ಬಂತು. ಅನಂತರ ಸ್ವಲ್ಪ ಮಟ್ಟಿನ ಬ್ಯಾಟಿಂಗ್‌ ಹೋರಾಟ ಸಂಘಟಿಸಿದ್ದು ನಾಯಕ ಎಬಿ ಡಿ ವಿಲಿಯರ್ (45) ಮಾತ್ರ.

ಇಂಗ್ಲೆಂಡ್‌ ಪರ ವೋಕ್ಸ್‌ 4, ರಶೀದ್‌ ಮತ್ತು ಅಲಿ ತಲಾ 2 ವಿಕೆಟ್‌ ಹಾರಿಸಿದರು. ಬಿರುಸಿನ ಬ್ಯಾಟಿಂಗ್‌ ಜತೆಗೆ 2 ಪ್ರಮುಖ ವಿಕೆಟ್‌ ಕಿತ್ತ ಮೊಯಿನ್‌ ಅಲಿ ಪಂದ್ಯಶ್ರೇಷ್ಠ ಗೌರವಕ್ಕೆ ಪಾತ್ರರಾದರು.

ಸಂಕ್ಷಿಪ್ತ ಸ್ಕೋರ್‌: ಇಂಗ್ಲೆಂಡ್‌-6 ವಿಕೆಟಿಗೆ 339 (ಮಾರ್ಗನ್‌ 107, ಅಲಿ ಅಜೇಯ 77, ಹೇಲ್ಸ್‌ 61, ಫೆಲುಕ್ವಾಯೊ 59ಕ್ಕೆ 2, ಮಾರಿಸ್‌ 61ಕ್ಕೆ 2). ದಕ್ಷಿಣ ಆಫ್ರಿಕಾ-45 ಓವರ್‌ಗಳಲ್ಲಿ 267 (ಆಮ್ಲ 73, ಡು ಪ್ಲೆಸಿಸ್‌ 67, ಡಿ ವಿಲಿಯರ್ 45, ವೋಕ್ಸ್‌ 38ಕ್ಕೆ 4, ಅಲಿ 50ಕ್ಕೆ 2, ರಶೀದ್‌ 69ಕ್ಕೆ 2). ಪಂದ್ಯಶ್ರೇಷ್ಠ: ಮೊಯಿನ್‌ ಅಲಿ.

ಸರಣಿಯ ದ್ವಿತೀಯ ಪಂದ್ಯ ಮೇ 27ರಂದು ಸೌತಾಂಪ್ಟನ್‌ನಲ್ಲಿ ನಡೆಯಲಿದೆ.