ಕೊಹ್ಲಿ ಬ್ಯಾಟಿಂಗ್ ವೈಫಲ್ಯಕ್ಕೆ ಅಭಿಮಾನಿ ಆತ್ಮಹತ್ಯೆ ಯತ್ನ !
Team Udayavani, Jan 8, 2018, 12:35 PM IST
ರತ್ನಪುರಿ (ಮಧ್ಯ ಪ್ರದೇಶ): ಕೇಪ್ಟೌನ್ ಟೆಸ್ಟ್ ಪಂದ್ಯದ ಮೊದಲ ಇನ್ನಿಂಗ್ಸ್ನಲ್ಲಿ ಭಾರತ ತಂಡದ ನಾಯಕ ವಿರಾಟ್ ಕೊಹ್ಲಿ ವೈಫಲ್ಯ ಅನುಭವಿಸಿದ್ದಕ್ಕೆ ಆಘಾತಗೊಂಡ ಅವರ ಕಟ್ಟಾ ಅಭಿಮಾನಿಯೋರ್ವ ಆತ್ಮಹತ್ಯೆಗೆ ಯತ್ನಿಸಿದ ಘಟನೆ ಮಧ್ಯಪ್ರದೇಶದ ರತ್ನಪುರಿ ಯಿಂದ (ರತ್ಲಾಮ್) ವರದಿಯಾಗಿದೆ.
ಈ 63ರ ಹರೆಯದ ಅಭಿಮಾನಿಯ ಹೆಸರು ಬಾಬುಲಾಲ್ ಬೈರ್ವ. ಮೈಮೇಲೆ ಪೆಟ್ರೋಲ್ ಸುರಿದುಕೊಂಡು ಬೆಂಕಿ ಹಚ್ಚಿಕೊಂಡು ಆತ್ಮ ಹತ್ಯೆಗೆ ಮುಂದಾಗಿದ್ದರು. ಇದನ್ನು ಕಂಡ ಪತ್ನಿ ಬೊಬ್ಬೆ ಹೊಡೆದಾಗ ಆಸುಪಾಸಿನವರು ಬಂದು ಕೂಡಲೇ ಅವರನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿದರು. ಮುಖ ಮತ್ತು ತಲೆಗೆ ಸುಟ್ಟ ಗಾಯಗಳಿಂದ ತೀವ್ರ ಹಾನಿಯಾಗಿದೆ ಎನ್ನಲಾಗಿದೆ.
ದಕ್ಷಿಣ ಆಫ್ರಿಕಾ ವಿರುದ್ಧದ ಕೇಪ್ಟೌನ್ ಟೆಸ್ಟ್ ಪಂದ್ಯದ ಮೊದಲ ದಿನ ಕೊಹ್ಲಿ ಕೇವಲ 5 ರನ್ ಮಾಡಿ ನಿರ್ಗಮಿಸಿದಾಗ ನೊಂದ ಬಾಬುಲಾಲ್ ಈ ಕೃತ್ಯವೆಸಗಿದ್ದಾರೆ ಎಂದು “ಅಮರ್ ಉಜಾಲಾ’ ಪತ್ರಿಕೆ ವರದಿ ಮಾಡಿದೆ. ಭಾರತದಲ್ಲಿ ಇಂಥ ಘಟನೆ ಇದೇ ಮೊದಲೇ ನಲ್ಲ. ಟೀಮ್ ಇಂಡಿಯಾ ಅತ್ಯಂತ ಕಳಪೆ ಪ್ರದರ್ಶನ ನೀಡಿದಾಗ ಅನೇಕರು ಆತ್ಮಹತ್ಯಗೆ ಮುಂದಾದದ್ದಿದೆ. 2007ರ ಐಸಿಸಿ ವಿಶ್ವಕಪ್ ವೇಳೆ ಭಾರತ ತಂಡ ಬಾಂಗ್ಲಾದೇಶ ಹಾಗೂ ಶ್ರೀಲಂಕಾಕ್ಕೆ ಶರಣಾಗಿ ಲೀಗ್ ಹಂತದಲ್ಲೇ ಹೊರಬಿದ್ದಾಗ ಇಂಥ ಘಟನೆ ಸಂಭವಿಸಿತ್ತು.