8 ವರ್ಷಗಳ ಬಳಿಕ ಫೆಡರರ್‌- ಪೊಟ್ರೊ ಫೈಟ್‌

Team Udayavani, Sep 6, 2017, 9:21 AM IST

ನ್ಯೂಯಾರ್ಕ್‌: ಎಂಟು ವರ್ಷ ಗಳ ಬಳಿಕ ಯುಎಸ್‌ ಓಪನ್‌ನಲ್ಲಿ ಸ್ವಿಟ್ಸರ್‌ಲ್ಯಾಂಡಿನ ರಫೆಲ್‌ ನಡಾಲ್‌ ಮತ್ತು ಆರ್ಜೆಂಟೀನಾದ ಜುವಾನ್‌ ಮಾರ್ಟಿನ್‌ ಡೆಲ್‌ ಪೊಟ್ರೊ ಪರಸ್ಪರ ಎದುರಾಗಲಿದ್ದಾರೆ. ಇವರಿಬ್ಬರ ಕ್ವಾರ್ಟರ್‌ ಫೈನಲ್‌ ಕಾದಾಟ ಕಾಣಲು ಟೆನಿಸ್‌ ಅಭಿಮಾನಿಗಳು ಬುಧವಾರ ರಾತ್ರಿಯ ನಿರೀಕ್ಷೆಯಲ್ಲಿದ್ದಾರೆ.

ಪ್ರೀ-ಕ್ವಾರ್ಟರ್‌ ಫೈನಲ್‌ ಹಣಾಹಣಿ ಯಲ್ಲಿ ರೋಜರ್‌ ಫೆಡರರ್‌ ಜರ್ಮನಿಯ ಫಿಲಿಪ್‌ ಕೋಹ್ಲಶ್ರೀಬರ್‌ ವಿರುದ್ಧ 6-4, 6-2, 7-5 ಅಂತರದಿಂದ ನೇರ ಸೆಟ್‌ಗಳಲ್ಲಿ ಗೆದ್ದರು. ಇದರೊಂದಿಗೆ ನ್ಯೂಯಾರ್ಕ್‌ ನಲ್ಲಿ ಮೊದಲ ಬಾರಿಗೆ ಎಂಟರ ಸುತ್ತು ಪ್ರವೇಶಿಸುವ ಜರ್ಮನ್‌ ಟೆನಿಸಿಗನ ಕನಸು ಛಿದ್ರಗೊಂಡಿತು.

ಇನ್ನೊಂದು ಪಂದ್ಯದಲ್ಲಿ 24ನೇ ಶ್ರೇಯಾಂಕದ ಜುವಾನ್‌ ಮಾರ್ಟಿನ್‌ ಡೆಲ್‌ ಪೊಟ್ರೊ ಆಸ್ಟ್ರಿಯಾದ ಡೊಮಿನಿಕ್‌ ಥೀಮ್‌ ವಿರುದ್ಧ 5 ಸೆಟ್‌ಗಳ ಜಿದ್ದಾಜಿದ್ದಿ ಹೋರಾಟ ನಡೆಸಿ ಗೆದ್ದು ನಿಟ್ಟುಸಿರೆಳೆದರು. ಮೊದಲೆರಡು ಸೆಟ್‌ ಕಳೆದುಕೊಂಡಾಗ ಡೆಲ್‌ ಪೊಟ್ರೊ ನಿರ್ಗಮಿಸಿದರೆಂದೇ ಭಾವಿಸಲಾಗಿತ್ತು. ಆದರೆ ಅನಂತರ ಆಮೋಘ ಹೋರಾಟವೊಂದನ್ನು ಜಾರಿಯಲ್ಲಿ ರಿಸಿ ದರು. ಗೆಲುವಿನ ಅಂತರ 1-6, 2-6, 6-1, 7-6 (7-1), 6-4. 

“ಇದೇನೂ ಮ್ಯಾಜಿಕ್‌ ಅಲ್ಲ. ನಾನು ಸಿಕ್ಕಾಪಟ್ಟೆ ಸುಸ್ತಾಗಿದ್ದೇನೆ. ಉಸಿರಾಡಲೂ ಸಾಧ್ಯವಾಗುತ್ತಿಲ್ಲ…’ ಎಂಬುದು ಡೆಲ್‌ ಪೊಟ್ರೊ ಪ್ರತಿಕ್ರಿಯೆ.
2009ರ ಯುಎಸ್‌ ಓಪನ್‌ನಲ್ಲಿ ಫೆಡರರ್‌-ಡೆಲ್‌ ಪೊಟ್ರೊ ಮುಖಾಮುಖೀ ಯಾಗಿದ್ದರು. ಅಂದು ಫೆಡರರ್‌ ವಿರುದ್ಧ 3-6, 7-6 (7-3), 4-6, 7-6 (7-4), 6-2 ಅಂತರದ ಮ್ಯಾರಥಾನ್‌ ಹೋರಾಟದಲ್ಲಿ ಗೆದ್ದ 20ರ ಹರೆಯದ ಡೆಲ್‌ ಪೊಟ್ರೊ ಚಾಂಪಿಯನ್‌ ಆಗಿ ಮೂಡಿ ಬಂದಿದ್ದರು. 

ನಡಾಲ್‌ಗೆ ಎಳೆಯನ ಸವಾಲು
ನಡಾಲ್‌ಗೆ ರಶ್ಯದ 19ರ ಹರೆಯದ ಆ್ಯಂಡ್ರೆ ರುಬ್ಲೇವ್‌ ಸವಾಲಿಕ್ಕಲಿದ್ದಾರೆ. ನಡಾಲ್‌ ಉಕ್ರೇನಿನ ಆಲೆಕ್ಸಾಂಡರ್‌ ಡೊಲ್ಗೊ ಪೊಲೋವ್‌ ಅವರನ್ನು 6-2, 6-4, 6-1ರಿಂದ ಸುಲಭದಲ್ಲಿ ಹಿಮ್ಮೆಟ್ಟಿಸಿ ದರು. ಇನ್ನೊಂದು ಪಂದ್ಯದಲ್ಲಿ ರುಬ್ಲೇವ್‌ ಬೆಲ್ಜಿಯಂನ 9ನೇ ಶ್ರೇಯಾಂಕದ ಡೇವಿಡ್‌ ಗೊಫಿನ್‌ ವಿರುದ್ಧ 7-5, 7-6 (7-5), 6-3 ಅಂತರದ ಜಯ ಒಲಿಸಿಕೊಂಡರು. 

ಶ್ರೇಯಾಂಕ ರಹಿತ ರುಬ್ಲೇವ್‌ ಯುಎಸ್‌ ಓಪನ್‌ ಕ್ವಾರ್ಟರ್‌ ಫೈನಲ್‌ ತಲುಪಿದ ವಿಶ್ವದ ಕಿರಿಯ ಆಟಗಾರರಲ್ಲೊಬ್ಬರು. 2001ರಲ್ಲಿ ಆ್ಯಂಡಿ ರಾಡಿಕ್‌ ಕೂಡ 19ರ ಹರೆಯದಲ್ಲೇ ಈ ಹಂತಕ್ಕೆ ಬಂದಿದ್ದರು.