ಸಿನ್ಸಿನಾಟಿ ಟೆನಿಸ್ ಚಾಂಪಿಯನ್ ಮುಗುರುಜಾ ಔಟ್
Team Udayavani, Aug 17, 2018, 6:00 AM IST
ಸಿನ್ಸಿನಾಟಿ: ಹಾಲಿ ಚಾಂಪಿಯನ್ ಗಾರ್ಬಿನ್ ಮುಗುರುಜಾ ಸಿನ್ಸಿನಾಟಿ ಟೆನಿಸ್ ಪಂದ್ಯಾವಳಿಯಿಂದ ಹೊರಬಿದ್ದಿದ್ದಾರೆ. ಬುಧವಾರ ರಾತ್ರಿ ಮಳೆ ನಡುವೆ ಸಾಗಿದ ದ್ವಿತೀಯ ಸುತ್ತಿನ ಪಂದ್ಯದಲ್ಲಿ ಉಕ್ರೇನಿನ ಲೆಸಿಯಾ ಸುರೆಂಕೊ 2-6, 6-4, 6-4 ಅಂತರದಿಂದ ಮುಗುರುಜಾ ಆಟವನ್ನು ಕೊನೆಗಾಣಿಸಿದರು.
ಸುರೆಂಕೊ ಅವರಿನ್ನು ರಶ್ಯದ ಎಕತೆರಿನಾ ಮಕರೋವಾ ವಿರುದ್ಧ ಆಡಲಿದ್ದಾರೆ. ಮಕರೋವಾ ಫ್ರಾನ್ಸ್ನ ಅಲಿಜೆ ಕಾರ್ನೆಟ್ ಅವರನ್ನು 6-2, 6-0 ಅಂತರದಿಂದ ಹಿಮ್ಮೆಟ್ಟಿಸಿದರು. ವಿಶ್ವದ ನಂ.1 ಆಟಗಾರ್ತಿ ಸಿಮೋನಾ ಹಾಲೆಪ್ ಪಂದ್ಯಕ್ಕೂ ಮಳೆಯಿಂದ ಅಡಚಣೆಯಾಗಿದೆ. ಪಂದ್ಯ ಸ್ಥಗಿತಗೊಂಡಾಗ ಅವರು ಆಸ್ಟ್ರೇಲಿಯದ ಅಜ್ಲಾ ಟೊಮ್ಲಾನೊವಿಕ್ ವಿರುದ್ಧ 4-6, 6-3, 4-3ರ ಮುನ್ನಡೆಯಲಿದ್ದರು. ಆ್ಯಂಜೆಲಿಕ್ ಕೆರ್ಬರ್ 3 ಸೆಟ್ಗಳ ಹೋರಾಟದ ಬಳಿಕ ಅನಾಸ್ತಿಸಿಯಾ ಪಾವುಚೆಂಕೋವಾ ವಿರುದ್ಧ 4-6, 7-5, 6-4 ಅಂತರದಿಂದ ಗೆದ್ದು ಬಂದರು.
ಯುಎಸ್ ಓಪನ್ ಚಾಂಪಿಯನ್ ಸ್ಲೋನ್ ಸ್ಟೀಫನ್ಸ್ ಜರ್ಮನಿಯ ಟಜಾನಾ ಮರಿಯಾ ವಿರುದ್ಧ 6-3, 6-2 ಅಂತರದಿಂದ ಸೋಲಿಸಿದರು. ಇವರ ಮುಂದಿನ ಎದುರಾಳಿ ಬೆಲ್ಜಿಯಂನ ಎಲಿಸೆ ಮಾರ್ಟೆನ್ಸ್. ಅವರು 3-6, 6-2, 7-6 (1)ರಿಂದ ಸ್ವೀಡನ್ನಿನ ರಬೆಕಾ ಪೀಟರ್ಸನ್ಗೆ ಸೋಲುಣಿಸಿದರು.
ಬೆಲರೂಸ್ನ ಅರಿನಾ ಸಬಲೆಂಕೊ ಜೆಕ್ ಗಣರಾಜ್ಯದ ಕ್ಯಾರೋಲಿನಾ ಪ್ಲಿಸ್ಕೋವಾ ಅವರನ್ನು 2-6, 6-3, 7-5ರಿಂದ; ಆಸ್ಟ್ರೇಲಿಯದ ಆ್ಯಶೆ ಬಾರ್ಟಿ 7-5, 6-3ರಿಂದ ಎಸ್ತೋನಿಯಾದ ಕಯಾ ಕನೆಪಿ ಅವರನ್ನು ಸೋಲಿಸಿ 3ನೇ ಸುತ್ತಿಗೆ ಮುನ್ನಡೆದರು.